«Նոր պղնձաձուլարանը պիտի կառուցվի չվարկաբեկված, սուտ խոստումներից հեռու, հուսալի գործարարի կողմից». «Փաստ»

«Փաստ» օրաթերթը գրում է.

«Արմենիան Քափըր Փրոգրամ» ՓԲԸ–ն պատրաստվում է նոր պղնձաձուլարան կառուցել: Պղնձաձուլարանի կառուցման ծրագրի նախապատրաստման աշխատանքները պետական աջակցություն են ստացել, որի նպատակով ստեղծվել է համապատասխան աշխատանքային խումբ: Խմբի ղեկավար է նշանակվել փոխվարչապետ Տիգրան Ավինյանի գրասենյակի ղեկավար Վարագ Սիսեռյանը, քարտուղարը ՀՀ տնտեսական զարգացման և ներդրումների նախարարության աշխատակազմի ճյուղային տնտեսության քաղաքականության վարչության պետ Արմեն Եգանյանն է: Աշխատանքային խմբի անհատական կազմում ընդգրկված են չորս նախարարությունների ներկայացուցիչներ` ՀՀ տնտեսական զարգացման և ներդրումների նախարարի տեղակալ Ավագ Ավանեսյանը, ՀՀ բնապահպանության նախարարի տեղակալ Գնել Սանոսյանը, ՀՀ ֆինանսների նախարարի տեղակալ Արման Պողոսյանը, ՀՀ էներգետիկ ենթակառուցվածքների և բնական պաշարների նախարարի տեղակալ Վարդան Գևորգյանը: «Վալլեքս» խմբի ընկերություններից ներկայացուցիչը պղնձի ծրագրի ղեկավար Կ. Ղազարյանն է:

Ինչպես հայտնի է, «Արմենիան Քափըր Փրոգրամ» ՓԲԸ–ն Ալավերդու պղնձաձուլական գործարանն է շահագործում արդեն երկար տարիներ: Թե ինչպիսի ազդեցություն է գործարանն ունեցել և շարունակում ունենալ Ալավերդու և հարակից շրջանների վրա, գաղտնիք չէ ոչ ոքի համար: Գաղտնիք չէ նաև այն, որ ընկերության սեփականատերը՝ Վալերի Մեջլումյանը, «Վալեքս գրուպ» ընկերության նախագահն է, իսկ այդ ընկերության մաս կազմող «Թեղուտ» ՓԲԸ–ն շահագործել է Թեղուտի հանքավայրը, որը այժմ չի գործում: Թեև պաշտոնական տեքստերում ասվում էր, որ այն չի շահագործվում տեխնիկական պատճառներով, բայց բնապահպաններն այլ բան էին մատնանշում՝ պոչամբարների փլուզման վտանգ կար:

Եվ ահա այսօր այս ընկերությունը, որի գործունեությունը, մեղմ ասած, վտանգել ու վտանգում է Լոռու մարզի բնակչության առողջությունը և մեծ վնաս հասցնում շրջակա միջավայրին, նոր պղնձաձուլարան կառուցելու ծրագիր է մշակում, այն էլ՝ կառավառուցելու ծրագիր է մշակում, այն էլ՝ կառավարության հետ համատեղ:

Այս դեպքում բազմաթիվ հարցեր են առաջանում: Վստահել, չվստահել, մտահոգվել, թե՝ ոչ: Պատասխանը միանշանակ չէ: Կառավարության նոր կազմին վստահում ենք, բայց և հին թալանչիների՝ ցանկալին իրականի տակ հրամցնելու փորձառությանը նույնպես:

Հայաստանի կանաչների միության նախագահ Հակոբ Սանասարյանը նշում է, որ կառավարության կազմի նոր անդամներին գուցե վստահում է, բայց չի կարող ասել, թե իրենք որքանով են տիրապետում այդ ոլորտին և արդյոք «Վալեքս գրուպ»–ի մասնագետների ասածներին ինչպես կարձագանքեն: Նշում է, որ պետք է նախևառաջ բոլոր փաստաթղթերը ստուգվեն, պետք է այդ ընկերությունը 18 տարի շարունակ իր կողմից խոստացված՝ տասնյակ հազարավոր տոննա մթնոլորտային արտանետումները վնասազերծելու և օգտահանելու համար անհրաժեշտ սարքավորումներ տեղադրի և շահագործի, տարիներ շարունակ հավել յալ արտանետումների համար հարկերն ու տուգանքները վճարի, նոր միայն նոր պղնձաձուլարանի մասին խոսք գնա: 

«Տարիներ շարունակ Ալավերդու բնակիչները այդ վնասակար նյութերն են շնչել, նորածին երեխաները իրենց առաջին ճիչի հետ միասին այդ գազերն են շնչել»,– նշեց նա: Ինչ վերաբերում է Թեղուտի հանքավայրին՝ բնապահպանը նկատեց, որ շահագործումը դադարեցնելու պատճառը նաև պոչամբարների ներկայիս աղետալի վիճակն է:

Սանասարյանի խոսքով՝ եթե Հայաստանում մետաղաձուլման գործարան պիտի կառուցվի, ապա այն պետք է կառուցի չվարկաբեկված, սուտ խոստումներից հեռու, հուսալի գործարարը, այլ ոչ կեղծիքներով ու խաբեությամբ Թեղուտի հանքավայրին տիրացած, տարիներ շարունակ ալավերդցիներին գազախեղդ անող Վալերի Մեջլումյանը:

Շարունակությունը՝ «Փաստ» օրաթերթի այսօրվա համարում