Կառավարության կռվանը` փող. «Փաստ»

«Փաստ» օրաթերթը գրում է.

Բարձաստիճան պաշտոնյաների այցելություններն ու աշխատանքային գործուղումները, նոր կառավարության ձևավորումից գրեթե անմիջապես հետո հայտնվեցին տարբեր հանրային ու մեդիահարթակների ուշադրության կենտրոնում: Սա բնական էր, քանի որ բյուջետային տնտեսումների, չարդարացված ծախսերի ու վատնումների դեմ պայքարի քարոզչության շրջանակներում նոր կառավարությունից բոլորը պահանջելու էին հաշվետվողականություն և, կարելի է ասել, համեստություն:

Միջազգային այցելությունների դեպքում հարցադրումները, որպես կանոն, միօրինակ էին` ի՞նչ արդյունք, բովանդակություն կամ նպատակահարմարություն ուներ այս կամ այն այցը: Այս հարցերը որոշակի շրջանակներ բարձրաձայնում են, այսպես ասած, նոր կառավարությանը կամ առնվազն դրա անդամներից որոշներին թիրախավորելու ու վարկաբեկելու համար, կան նաև շրջանակներ, որոնք իսկապես բովանդակային հարցեր են ներկայացնում, լինում են նաև դեպքեր, երբ նման հարցադրումները ընդամենը հերթապահ բնույթ են կրում:

Տարատեսակ մեդիահարթակներում հնչող հարանման խոսակցություններն ու հարցադրումները միշտ էլ լինելու են, սա նորմա է, որովհետև պարզից էլ պարզ է, որ նոր կառավարության բազմաթիվ անդամներ ժամանակին հանդես էին գալիս հենց նույնաբովանդակ քննադատությամբ` նախկին իշխանությունների նկատմամբ: Այսօրինակ խոսակցություններին զուտ հայտարարություններով պատասխանելը կլինի իշխանության ամենապարզունակ քայլը և կվերածվի պարզապես ժամավաճառության: Այս դեպքում, սակայն, հարց է առաջանում, թե ի՞նչ անել: Ըստ էության, նման թեմաները չեն ավարտվելու, սակայն դրանք կարող են կորցնել արդիականությունը, երբ հանրությանը ներկայացվեն հստակ արդյունքներ: Այդ արդյունքները, գուցե շատ պարզունակ կամ նույնիսկ կոպիտ հնչի, լինելու են հենց փողի տեսքով կամ ոմանց համար ավելի հաճելի է ասել` ներդրումների: Ի վերջո, և փոխվարչապետների այցելությունները Հյուսիսային Ամերիկա, և վարչապետի այցելությունը Եվրոպա, շաղկապվում էին մի կարևոր ակնկալիքի հետ` ովքեր և ինչքան մեզ փող կտան կամ, ինչպես արդեն ասեցինք, ավելի հաճելի լեզվով` ինչպիսի ներդրումներ կլինեն: Հենց սա է լինելու առաջիկայում նոր կառավարության գլխավոր կռվանը: 

Ի վերջո, պատահական չէր, որ ժամանակին Կարեն Կարապետյանն էր խոստանում մինչև մեկ միլիարդ դոլար ներդրում, պատահական չէր, որովհետև Հայաստանի տնտեսության ոտքի կանգնելու համար օդի ուջրի պես անհրաժեշտ են ներդրումները, հեղափոխությունը, իշխանափոխությունը, կոռուպցիայի դեմ պայքարը ընդամենը օժանդակող ու միջավայր ստեղծող իրողություններ են: Հենց այս խնդիրը պետք  է առաջնային լուծի նոր կառավարությունը: 

յստեղ սակայն պետք է խոստովանել, որ խնդիրը բավական լուրջ է, որովհետև Եվրոպան գրեթե բացեիբաց հայտարարում է, որ պատրաստ է վերանայել Հայաստանին հատկացվող ֆինանսական օժանդակությունը, երբ հստակ կտեսնի արտաքին քաղաքական վեկտորի փոփոխություն, ԱՄՆ–ն դեռ ուսումնասիրում է Հայաստանում կատարված գործընթացները և նոր իրողությունները` այս մասին էլ գրեթե ուղիղ տեքստով հայտարարում է ԱՄՆ դեսպանը,աշխարհաքաղաքական մեկ այլ բևեռից` Ռուսաստանից ներդրումներ առանձնապես չեն ակնկալվում, որովհետև նախ ՌԴ–ն Հայաստանի հետ հարաբերություններում չի ելնում չեչենական օրինակից և պատրաստ չէ այստեղ «փող լցնել»` իր քաղաքականության ծիրում պահելու համար` «Куда они денутся?», քանի որ ՌԴ–ն այստեղ ոչ թե ներդրումներ է իրականացնում, այլ ասենք «գույք` պարտքի դիմաց» ծրագիր: Հենց նման իրավիճակում նոր կառավարությունը պետք է ելք գտնի ներդրումներ, այն է` շոշափելի կռվաններ ցույց տալու համար, մնացածը, թերևս, անէական օժանդակ երևույթներ են: