Ավագանուն վերագրում ենք ընդամենը . «Փաստ»

«Փաստ» օրաթերթը գրում է.

Երևանի քաղաքապետի ընտրությունների ոչ պաշտոնական քարոզարշավի մեկնարկն արդեն տրված է: Սրա մասին են վկայում մի շարք հավանական թեկնածուների գործունեությունն ու ակտիվությունը: Սակայն, եթե ուշադիր լինենք, ապա կտեսնենք, որ «Երևանի քաղաքապետի ընտրություններ» արտահայտությունն առնվազն թերի է, իսկ առավելագույնը սխալ` այն պարզ պատճառով, որ տեղի են ունենալու Երևանի ավագանու ընտրություններ:

Առաջին հայացքից կարող է թվալ, թե ինչ կարևոր է, չէ՞ որ վերջնական արդյունքում ընտրվում է քաղաքապետ, այս դեպքում, սակայն, կարելի է պարզապես հարց բարձրացնել` ուրեմն մեր ինչի՞ն էր պետք ավագանին:

Չէ՞ որ, վերջիվերջո, ավագանու ինստիտուտը ստեղծվեց, որպեսզի լայն հասարակությունը ազդեցության լծակներ ու ակտիվ մասնակցություն ունենա համայնքի, քաղաքի կառավարման գործում հենց ավագանու միջոցով: Հենց ավագանին է, որ պետք է որպես հակակշիռ հանդես գա գործադիրին: 

Սակայն այսօր, անընդհատ շեշտադրումներ անելով քաղաքապետի ընտրության, քաղաքապետի թեկնածուների անձի վրա, գիտակցաբար, թե ենթագիտակցորեն ավագանուն վերագրում ենք ընդամենը քաղաքապետի, անձի կցորդի գործառույթ: Սա բավական լուրջ խնդիր է, քանի որ խորհրդարանական կառավարումը չի ենթադրում միայն երկրի վարչապետի առաջին դեմք լինել, խորհրդարանական կառավարումն իր դրսևորումը պետք է ունենա պետական կառավարման բոլոր օղակներում և, ամենակարևորը, մայրաքաղաքի կառավարման մարմիններում:

Բացի այս, ապագա քաղաքապետի թեկնածուների, նրանց անձի շարունակական քննարկումները զարկ են տալիս այն մտայնություններին, որ մենք գործ ենք ունենալու պոպուլիզմի շղարշով պատված ընտրությունների ու քարոզարշավի հետ: Սա վատագույն զարգացումն է, որ կարող է լինել Երևանի ավագանու ընտրություններում, քանի որ անձի շուրջ ստեղծված աժիոտաժը մի կողմ է թողնելու ծրագրային քարոզարշավը, ծրագրային մոտեցումը Երևանի ավագանու ընտրություններին և, ընդհանրապես, երկրորդական դերում է հայտնվելու «քաղաքական ուժ գումարած ծրագիր» սկզբունքը: Մինչդեռ Երևանի ավագանու պարագայում շատ ավելի կարևոր է հիմնարար ծրագրերի առկայությունը, քան թե քաղաքապետի թեկնածուների ով կամ ինչ մասնագիտության տեր լինելը: Հուսանք, որ բուն քարոզարշավի մեկնարկին, այնուամենայնիվ, ներկայումս առկա տրամադրություններն ու մտայնությունները կնահանջեն և ասպարեզում կլինեն ոչ թե այս կամ այն թեկնածուները որպես անձինք, այլ կոնկրետ քաղաքական կուսակցություններ, որոնք հավակնություն կներկայացնեն մասնակցել Երևանի կառավարմանը որպես քաղաքական ուժ և իրենց հավակնությունների հիմքերն էլ արտացոլված կլինեն ներկայացված ծրագրերում: Հակառակ դեպքում, անկախ ընտրություններում հաղթողներից, մենք ականատես կլինենք քաղաքապետի տակ հարմար տեղավորված անդեմ ավագանու, որի գործառույթը կլինի միայն կողմ քվեարկելը: Իսկ սա բացառելու համար, հարկ է, որ ավագանին հանրային գիտակցության մեջ և ընդհանրապես արժևորվի, և համապատասխանի այն կարգավիճակին, որն ունի սահմանադրորեն:

Շարունակությունը՝ «Փաստ» օրաթերթի այսօրվա համարում