«Անհասկանալի է՝ սխալ են սկսել, որ հետո հեշտ բաց թողնե՞ն, թե՞ որովհետև այդպես են ցանկացել գործը վարել». «Փաստ»

«Փաստ» օրաթերթը գրում է.

Հասարակական–քաղաքական գործիչ, ԱԱԾ նախկին փոխտնօրեն Գուրգեն Եղիազարյանը անդրադառնալով ՀՀ երկրորդ նախագահ Ռոբերտ Քոչարյանին կալանավորելու փաստին, «Փաստի» հետ զրույցում հիշեցրեց, որ երբ 10 տարի առաջ իրենց կալանավորել են, ինքը հայտարարել է, որ այն, ինչ իշխանություններն արեցին, իրենք են նույն խնդրի առջև կանգնելու:

«Ես այն ժամանակ ասացի, որ իշխանություններն այդ ժամանակ շատ հիմար քայլ արեցին, քանի որ ստեղծեցին նախադեպ, իսկ վաղն էլ իրենք են մեզ փոխարինելու նույն այդ բանտախցերում: Ասեմ ավելին, ինձ հետաքրքրում է, թե հիմա ո՞ր բանտախցում է նստած Ռոբերտ Քոչարյանը, որովհետև ես եղել եմ 26–րդ բանտախցում և դեռ այն ժամանակ ասել եմ, որ նույն այդ բանտախցում պետք է Սերժիկն ու Ռոբիկը նստեն: Ինչ վերաբերում է Քոչարյանի այս ձևով կալանավորմանը, ապա ես վատ կարծիք ունեմ այս կալանավորելու մասին, քանի որ գործը սխալ են սկսել: Իմ կարծիքով, այն հոդվածով, ինչով հարուցել են գործը, հեշտ չեն կարողանալու առաջ անցնել»,– ասաց Գ. Եղիազարյանը:

Նրա կարծիքով, եթե իրավապահները մարտի 1–ի գործով ցանկանում էին հաջողության հասնել, ապա շատ հասարակ միջոց կար՝ գործը պետք էր սկզբից սկսել:

«Գործը պետք էր անմեղ քաղաքացիների սպանությունները բացահայտելուց սկսել: Այն 182 վիրավոր զինվորից, ովքեր բոլորը սրունքներից վիրավորվեցին: Իմ այն մի քանի հազար հայրենակիցների գործերից, ում ոտքերը, գլուխները, մեջքները ջարդվել էին: Եվ երբ այդ ամբողջ բազան կքննեին ու կհասնեին մի ելակետի, այն ժամանակ արդեն ավել–պակաս խոսակցություններ չէին լինի: Հիմա վերցրել են մի բան, որը միշտ կարելի է վիճարկել: Չէ՞ որ Սահմանադրությունն ուղղակի պարտադրում է հանրապետության նախագահին սահմանադրական կարգը վերականգնելու միջոցներ ձեռնարկել: Ոչ թե ասում է՝ ուզո՞ւմ եք, կարո՞ղ եք կամ չե՞ք կարող, այլ պարտադրում է: Եվ, իմ կարծիքով, այս ամենի մասով մեղադրող կողմը պատասխան չունի: Ինչևէ: Չեմ հասկանում միայն՝ սխալ են սկսել, որպեսզի հետո հե՞շտ բաց թողնեն, թե՞ սխալ են արել, որովհետև այդպես են ցանկացել գործը վարել»,– հարց ուղղեց Եղիազարյանը: 

Պատասխանելով «Փաստի» հարցին, թե այս պայմաններում հնարավոր կլինի՞ արդյոք երկրում իսկապես արդարության, սիրո և համերաշխության մթնոլորտ հաստատել, Գ. Եղիազարյանն ասաց, որ այդ հարցին կպատասխանի վարչապետի ընտրվելու 100 օրը լրանալուց հետո: 

Խոսելով այն մասին, թե այս քայլով Ռ. Քոչարյանին օգնեցին, որ վերադառնա ակտիվ քաղաքականությո՞ւն, թե՞ նա երբեք էլ դուրս չի եկել քաղաքականությունից, Գ. Եղիազարյանը նշեց, որ երկրորդ նախագահը երբեք էլ քաղաքականությունից դուրս չի եկել:

«Պետք չէր մի նոր քայլ կատարել՝ նրան քաղաքականության դաշտ բերելու համար: Նման ձևակերպումներն անիմաստ եմ համարում: Իսկ թե ուր հասանք այս ամենի արդյունքում, կասեմ այս իշխանությունների պաշտոնավարման 100 օրը լրանալուց հետո»,– ասաց Գ. Եղիազարյանը:

Նա նաև նշեց, որ անիմաստ է համարում Երևանի ավագանու արտահերթ ընտրություններով զբաղվելը, քանի որ Երևան քաղաքի բախտն արդեն իսկ որոշված է:

«Նիկոլի գլխում այդ հարցն արդեն որոշված է: Ինչ որոշի, դա էլ միանշանակ կլինի, մնացածը հետո կտեսնենք»,– ասաց Գ. Եղիազարյանը: 

Նրա կանխատեսմամբ, ոչ թե օգոստոսը թեժ կլինի, այլ սեպտեմբերը, իսկ արդյո՞ք հակահեղափոխությունը ոտքի կկանգնի հարցին պատասխանեց.

«Ես շարունակում եմ նույն կարծիքին մնալ և չեմ կարծում, որ երկրում հեղափոխություն է եղել: Սա հեղաշրջում էր, համարենք՝ թավշյա: Բայց «ղալաթ» կանեն, եթե ռուսական ռազմաբազա հանելու մասին կխոսեն: Էս հայ ազգի բախտի հետ են ուզում խաղա՞լ: Դա միայն թուրքի առաջարկ կլինի, հայը չի կարող նման առաջարկ անել»: 

Խոսելով ՀԱԿ անդամ Զոյա Թադևոսյանի աղմկահարույց հայտարարության մասին՝ նա նշեց, որ բոլորի կարծիքն էլ հարգում է, բայց իր կարծիքը չի համապատասխանում նրա ասածին:

«Այդ կարծիքը չեմ կիսում, բայց ցանկացած մարդու կարծիք հարգում եմ, ինչպես մնացած բոլոր կարծիքները»,– խոսքը եզրափակեց Գ. Եղիազարյանը:

Շարունակությունը՝ «Փաստ» օրաթերթի այսօրվա համարում