Հայաստանը դադարել է Ռուսաստանի համար լինել հարաբերությունների հասկանալի սուբյեկտ․ Դենիս Դվորնիկովը՝ Լավրովի հայտարարության մասին

Հայաստանը դադարել է Ռուսաստանի համար լինել հարաբերությունների հասկանալի սուբյեկտ: Tert.am-ի հետ զրույցում նման դիտարկում արեց  ռուս հրապարակախոս, քաղաքագետ, Միջազգային իրավունքի ռուսական ասոցիացիայի անդամ Դենիս Դվորնիկովը՝ խոսելով հայ-ռուսական հարաբերություններում վերջերս նկատվող զարգացումների վերաբերյալ:

«Այն, ինչ տեղի է ունենում այսօր, հակասում է իրավիճակին, երբ շատ որոշումներ կայացվում էին՝ հաշվի առնելով Մոսկվայի հաստատումը: Դա, անխոս, առաջացնում է անհարմարություն»,- ասաց նա:

Դենիս Դվորնիկովը, անդրադառնալով «Մարտի 1»-ի գործով Հայաստանում պաշտոնյաների նկատմամբ առաջադրված մեղադրանքների վերաբերյալ ՌԴ արտգործնախարար Սերգեյ Լավրովի հայտարարություններին, նշեց․

«Իմ կարծիքով՝ Լավրովի մեկնաբանությունը փորձ է՝ հայկական կողմից ստանալու բացատրություն, թե ինչ է տեղի ունենում, ով և ում շահերի հիման վրա է կայացնում որոշում, ինչպես կառուցել հետագայում հարաբերությունները»,- ասաց նա:

Հիշեցնենք, որ Ռուսաստանի Դաշնության արտաքին գործերի նախարար Սերգեյ Լավրովը, խոսելով ՀՀ նախկին նախագահ Ռոբերտ Քոչարյանի կալանավորման մասին, հայտարարել էր, որ Հայաստանի իշխանությունների քայլերը հակասում են ավելի վաղ արված այն պնդումներին, որ «թավշյա հեղափոխությունից» հետո նախկին իշխանությունների հանդեպ հետապնդումներ չեն լինելու։

Դենիս Դվորնիկովի նկատառմամբ՝ Ռուսաստանի արտգործնախարարությունը սովոր է պարզ սխեմաներին․լուծել բոլոր հարցերը գործընկեր երկրների էլիտաների միջոցով՝ անտեսելով այնպիսի ուղղվածությունը, ինչպիսին ժողովրդական դիվանագիտությունն է, ինչպիսին է բաց երկխոսությունը քաղաքացիների տարբեր խմբերի հետ:

«Բայց Հայաստանում ստեղծված իրավիճակը ցույց է տվել այդ ճանապարհի ոչ մշտական լինելը: Եվ հիմա ստիպված պետք է լինել նորից սովորել, զրուցել ամենամոտ աշխարհաքաղաքական գործընկերների հետ»,- ասաց նա:

Հարցին, թե ինչ կարծիք ունի Հայաստանի արձագանքի մասին՝ Լավրովի ասածների վերաբերյալ, Դենիս Դվորնիկովը պատասխանեց․ «Կարծում եմ, որ մոտակա ժամանակներում կլինի բարդ հարաբերությունների կարգավորում»:

Հիշեցնենք, որ Հայաստանի արտգործնախարարության խոսնակ Տիգրան Բալայանն արձագանքել է Ռուսաստանի արտգործնախարար Սերգեյ Լավրովի հայտարարությանը։

«Մենք հետևում ենք միջազգային արձագանքներին Հայաստանում տեղի ունեցող ներքին գործընթացների շուրջ, որոնք պայմանավորված են կառավարության ներքին առաջնահերթություններ հանդիսացող իրավական պետության և արդարադատության անկախ համակարգի կայացմամբ, կոռուպցիայի դեմ պայքարով։

Այս գործընթացները փոխկապակցված չեն Հայաստանի արտաքին քաղաքականության հետ և չպետք է տարընթերցման առիթ հանդիսանան»,- ասել էր նա:

Հայ-ռուսական հարաբերություններում մարտահրավերներ հաղթահարելու համար Դենիս Դվորնիկովի կարծիքով՝ ժամանակ և համբերություն է պետք: « Պետք է սեփական դիրքորոշման և գործընկերներից սպասումների մասին հստակ պատկերացում»,- ասաց նա: