Մտահոգություններ են եղել, բայց արդեն հունիս-հուլիս ամիսներին երկնիշ տնտեսական աճ ենք արձանագրել. վարչապետ

Հունիսին ունեցել ենք 9.6 տոկոս տնտեսական ցուցանիշ, և ես հույս էի հայտնել, որ հաջորդ ամիսներին այս ցուցանիշը կավելանա, և արձանագրեցինք, որ հուլիսին ունեցել ենք 11.1 տոկոս տնտեսական ցուցանիշ, ինչը բացառիկ ցուցանիշ է: Այս մասին ֆեյսբուքյան ուղիղ եթերի ժամանակ հայտարարել է ՀՀ վարչապետ Նիկոլ Փաշինյանը:

Նա հիշեցրել է, որ օգոստոսի 17-ի հանրահավաքի ժամանակ չներկայացրած տնտեսական ցուցանիշները կներկայացնի: Փաշինյանը նկատել է, որ հիմնականում հեղափոխությունից հետո տնտեսական խնդիրներ են լինում, և, ըստ նրա, մայիսին որոշակի անհանգստություն կար այս առումով: «Սակայն, արդեն հունիս-հուլիս ամիսներին մենք երկնիշին մոտ տնտեսական աճ ունեցանք, գնալով տեմպը մեծանում է»,- ասել է նա: Վարչապետը նշել է, որ տնտեսության զարգացման մի քանի մոդել կա, որոնց մեջ մտնում է այն, որ կառավարությունը ստեղծում է պայմաններ, իսկ մոդելը թողնում է շուկային:

Ըստ Նիկոլ Փաշինյանի՝ իրենց համար որպես լոկոմոտիվ է բարձր տեխնոլոգիական արտադրությունը, որը վերաբերում է, ինչպես ընդունված է ասել, կոշտ արտադրանքին: Նրա խոսքով՝ այս պահին արդեն նախանշաններ ու ներդրումային հետաքրքրություններ կան այս ոլորտի հետ կապված: «Ինչպես նաև այսօր որոշակի ներդրումային հետաքրքրություն կա՝ արևային էլեկտրակայանների համար պանելների արտադրությունը սկսելու: Սա այն ոլորտն է, որն իսկապես կարող են համարել հեռանկարային, քանի որ արևային էլ.էներգիան նոր է զարգանում, առաջիկայում այն լինելու է ամենահզոր ճյուղերից մեկը: Տեղյակ եմ, որ կան ներդրումներ որոշակի տեխնոլոգիական ապրանքներ արտադրելու մասով, օրինակ՝ հեռուստացույցներ և կենցաղային տեխնիկային թողարկում: Հույս ունենք, որ այդ գործարարերը կհաջողեն, իսկ կառավարությունը նրանց կաջակցի»,-նշել է նա:

Վերջինս նշել է, որ իհարկե, պետք է աջակցել ներքին արտադրողին, արտահանողին: Նա նաև նկատել է, որ հանրահավաքի ժամանակ իր կրած պիջակի մասին ասել են, թե դա արտասահմանյան բրենդ է, սակայն տեղական արտադրության է եղել:

Անդրադառնալով կրթությանը՝ վարչապետն ասել է, որ այսօր բուհերն ունեն ուսանողի և դիմորդի խնդիր: «Ունենք իրավիճակ, երբ բոլոր դիմորդները ընդունվում են բուհեր, բացառությունը միայն Երևանի բժշկական համալսարանն է»,-ասել է նա՝ մանրամասնելով, որ դեռևս խորհրդային տարիներից բժշկական ինստիտոըտ ներգրավել է արտերկրյա ուսանողների, և դա մինչև այսօր այդպես է, և այսօր համալսարանը հենց այդ պատճառով չունի դիմորդի, ուսանողի խնդիր, ունի ավելի լավ ռազմավարական ու ֆինանսական վիճակ:

«Մեր բուհական համակարգը պետք է վերակառուցվի այս տրամաբանության մեջ: Մեր բուհերը պետք է կարողանան արտասահմանից ուսանողներ բերել: Միշտ էլ կա հնարավորություն ունենալ գին-որակ այնպիսի հարաբերակցություն, որ նոր ուսանողներ բերի»:

Ըստ վարչապետի՝ պետք է նաև այնպես անել, որ գիտությունը գործնական քայլեր անի տնտեսության հետ կապված:

Նիկոլ Փաշինյանը շեշտել է՝ ՀՀ պետք է լինի բարձր տեխնոլոգիական երկիր, ավելին՝ նա կարևորել է, որ տեխնոլոգիական արտադրանքի արդյունաբերութունը, որը լավ պայմաններ կստեղծի ռազարդյունաբերության զարգացման համար:

Վարչապետը կից ներկայացրել է այս ցանկը.