«Բախվում են նախորդների լուրջ դիմադրությանը». «Փաստ»

«Փաստ» օրաթերթը գրում է.

Հայաստանյան քաղաքական դաշտում տեսնում ենք ուժերի վերադասավորություն, նոր ուժերի և կուսակցությունների ստեղծում, նախորդների «վերակենդանացման» փորձեր: Միջազգային և անվտանգության հարցերի հայկական ինստիտուտի (ՄԱՀՀԻ) ասոցացված փորձագետ, քաղաքագետ Ռուբեն Մեհրաբյանը «Փաստ» օրաթերթի հետ զրույցում իրավիճակն այսպես է նկարագրում.

«Հայաստանի քաղաքական դաշտում տեղի են ունենում դինամիկ փոփոխություններ, որի ընթացքում մենք կտեսնենք որոշ քաղաքական ուժերի մայրամուտը: Բացի այդ` որոշ քաղաքական ուժեր կստեղծվեն, իսկ թե ինչ կհաջողի նրանց, ժամանակը ցույց կտա: Ինչ վերաբերում է Ռոբերտ Քոչարյանի` քաղաքականություն վերադառնալու հայտարարությանը, ապա կասեմ հետևյալը. Ռոբերտ Քոչարյանը Հայաստանում թիվ մեկ «սփոյլեր»–ն է: Նա այլ դեր ստանձնելու հնարավորություն չունի: Ռոբերտ Քոչարյանը քաղաքական ապագա չունի և չի կարող ունենալ: Նա ժամանակավրեպ է: Նա խնդիրներ ունի Քրեական օրենսգրքի ամենալուրջ և ծանր հոդվածների հետ և Ռ. Քոչարյանն այդ խնդիրները քաղաքականացնելու անհաջող փորձ է անում»:

Ինչ վերաբերում է կառավարության գործունեությանը, քաղաքագետն ընդգծեց, որ թեև հիմնավոր եզրակացություններ անելու համար պաշտոնավարման 100 օրն այդքան էլ մեծ ժամանակահատված չէ, բայց որոշակի հարցեր կարելի է առանձնացնել:

«100 օրվա ընթացքում հաջողվեց խուսափել հեղափոխությունից հետո հնարավոր այն բացասական երևույթներից, ինչպիսին, օրինակ, պետական համակարգի ենթահամակարգերի փլուզումն է: Սա շատ կարևոր է: Ավելին` մենք տեսանք, որ բանկային համակարգը և, մասնավորապես, հայկական դրամը կայուն մնաց, ինչպես նաև թոշակների և նպաստների հետ կապված խնդիրներ չեղան: Մենք տեսանք, որ բանակը շարունակեց կատարել իր գործառույթները: Տեսանք, որ երկրում հանցավորության էական աճ տեղի չունեցավ, որովհետև սովորաբար հեղափոխությունը միշտ ուղեկցվում է անարխիայով: Իսկ 100 օրվա պաշտոնավարման արարողությունը ոչ այնքան հաշվետվություն էր, որքան ուղղակի քաղաքական ակցիա, որը ցույց տվեց, որ Նիկոլ Փաշինյանն ու իր կառավարությունն ունեն աննախադեպ լեգիտիմություն: Մյուս կողմից, սակայն, պետք է նկատենք, որ, այնուամենայնիվ, բոլոր հիմնական ուղղություններում, որոնցով կառավարությունը քայլեր է անում, բախվում են նախորդների լուրջ դիմադրությանը: Համենայն դեպս` այդ մասին է վկայում այն կոշտ հռետորաբանությունը, որով հանդես եկավ Ն. Փաշինյանը: Այդ մասին են վկայում նաև հանրահավաքից հետո նախորդների կողմից ոչ պակաս կոշտ հռետորաբանությամբ կատարված անդրադարձերը: Արգելակման որոշակի փորձեր կան, բայց չեմ կարծում, որ այդ փորձերը հաջողության որևէ շանս կունենան»,–ասաց քաղաքագետը:

Ռուբեն Մեհրաբյանի խոսքով` նախորդները համաձայն չեն հեշտ հանձնվել:

«Համաձայն չեն, ինչ է թե նրանց համոզիչ փաստարկներ չեն բերվել, որ պարզապես այլ տարբերակ չունեն: Բայց, կարծում եմ, շուտով այդ փաստարկները նրանց տեղ կհասցվի, որովհետև մենք նաև ականատեսն ենք այն բանի, որ ներկայիս ստատուս քվոյի պայմաններում որոշակի փակուղային վիճակ կա. դրա համար էլ առաջարկվում են որոշակի ոչ ստանդարտ մոտեցումներ, ինչպիսին է անցումային արդարադատությունը, Սահմանադրությունը փոփոխելու առաջարկը, որովհետև պարզ է` ինտրիգային այս մթնոլորտում չի կարելի ՀՀԿ–ի հետ որոշակի պայմանավորվածությունների գնալ` չունենալով երաշխիքներ: Եվ այդ երաշխիքը կարող է միայն փոփոխված Սահմանադրությունը լինել` այն մասով, որը կնախատեսի Ազգային ժողովի ինքնալուծարումը»,–նշեց նա: 

Քաղաքագետը որոշ չափով կիսում է այն կարծիքները, որ հակադիր կողմերի` ներկայիս իշխանության և ընդդիմության «փոխհրաձգությունը» կարող է երկրորդական պլան մղել այն կարևոր ուղղությունները, որոնց հիմքում երկրի զարգացումն է:

«Եթե գործընթացներն ինքնահոսի թողնվեն, այդպես էլ կլինի: Բայց վստահ եմ, որ կառավարությունը չի թողնի և չի կարող թողնել ինքնահոսի: Հետևապես` առջևում բավականին կարևոր զարգացումներ են սպասվում, որոնք որոշակիություն կմտցնեն ընդհանուր իրավիճակի մեջ: Մասնավորապես` կնախապատրաստվեն քայլեր, որոնք կարագացնեն արտահերթ խորհրդարանական ըտրությունները, որովհետև ներկայիս կառավարության համար պառլամենտական մեծամասնություն չունենալը նույնպես խնդիր է»,–եզրափակեց քաղաքագետը: