Ամերիկացիների անհավանական գնումները պատմության ընթացքում

Մենք գիտենք, որ...

 

ԱՄՆ–ի համար ամենահաջողված հողային գործարքը եղել է Ալ յասկայի գնումը Ռուսական կայսրությունից:

Իրականում այնքան էլ այդպես չէ: Բացի Ալ յասկայից, ԱՄՆ–ը նաև այլ տարածքներ է գնել:

1866 թվականին Սանկտ Պետերբուրգում Ալեքսանդր 2–րդի մասնակցությամբ կայացած խորհրդակցությունում որոշվում  է Ալ յասկան՝ իր շրջակա կղզիներով, վաճառել: Ֆինանսների նախարարի առաջարկով որոշվում է, որ գինը պետք է լինի ոսկով 5 միլիոնից ավելի: Պայմանագիրը կնքվում է 1867 թվականին Վաշինգտոնում: Ըստ պայմանագրի, 1 միլիոն 519 հազար քառակուսի կիլոմետր տարածքը վաճառվում է 7,2 միլիոն ոսկի դոլարով, այսինքն՝ 1 քառակուսի կիլոմետրը 4,74 դոլարով: Հետաքրքիրն այն է, որ ԱՄՆ–ի Սենատը այս պայմանագրին դեմ էր արտահայտվում՝ համարելով, որ այն ձեռնտու չէ երկրին: Սակայն քննարկումների արդյունքում, այնուամենայնիվ, պայմանագիրը վավերացվեց:

Մինչև Ալ յասկայի վաճառքի պայմանագիրը 1803 թվականին ԱՄՆ–ը ավելի հաջող հողային պայմանագիր է կնքել Ֆրանսիայի հետ՝ գնելով ֆրանսիական Լուիզիանան:

Ըստ Լուիզիանայի գնման պայմանագրի, Ֆրանսիային պատկանող տարածքները՝ մոտավորապես 2 միլիոն 100 հազար քառակուսի կիլոմետր, վաճառվում է ԱՄՆ–ին 15 միլիոն դոլարով (կամ 80 միլիոն ֆրանկով): ԱՄՆ–ի համար այս գործարքի վերջնական արժեքը՝ հաշվի առնելով նաև վերցված վարկի տոկոսները, կազմում է 23 միլիոն 213 հազար 568 դոլար, կամ մեկ քառակուսի կիլոմետրի դիմաց` 7 դոլար: Սա, իհարկե, ավելի թանկ է, քան Ալ յասկայի դեպքում, բայց պետք է հաշվի առնել, որ Լուիզիանան ունի բավականին լավ բնակլիմայական պայմաններ գյուղատնտեսության համար:

Տարածքի գնման ևս մեկ հաջողված պայմանագիր ԱՄՆ–ը կնքել է Իսպանիայի հետ 1819 թվականին: Այս գործարքը կոչվում է Ադամս–Օնիսի պայմանագիր: Այդ ժամանակ Իսպանիայի վիճակը վատ էր, գաղութներում ապստամբություններ էին, և չցանկանալով ներդրումներ կատարել Ֆլորիդայում՝ Իսպանիան որոշեց այն հանձնել ԱՄՆ–ին, որը վաղուց էր ցանկանում ունենալ այդ հողերը: Ըստ պայմանագրի, իսպանական Ֆլորիդան՝ 170 հազար 304 կիլոմետր քառակուսի տարածքով, վաճառվում էր ԱՄՆ–ին առանց գումարի: Փոխարենը ԱՄՆ–ը պարտավորվում էր վճարել ամերիկյան քաղաքացիների կողմից Իսպանիային ներկայացված բոլոր դրամական հայցերի գումարները: Ընդհանուր առմամբ կար 1859 հայց՝ 5 միլիոն 454 հազար 545 դոլար գումարով: Պայմանագիրը ուժի մեջ է մտնում 2 տարի անց՝ 1821 թվականին: Եթե հաշվենք ըստ վճարված գումարի ձեռք բերված հողի քանակը, իհարկե, սա բավականին գերազանցում է Ալյասկան և Լուիզիանան գնելու գնին, բայց չպետք է մոռանանք Ֆլորիդայի դիրքը և կարևորությունը: Ֆլորիդայի ձեռքբերումը հնարավորություն տվեց ԱՄՆ–ին իր տարածքը հետագայում՝ արդեն այլ մեթոդներով, առավել ընդարձակել:

Ստացվում է, որ այն իմաստուն միտքը, որ ինչ չի կարելի գնել փողով, կարելի է գնել ավելի մեծ փողով, այնքան էլ ճիշտ չէ: Կարևորը ճիշտ վայրում ճիշտ ժամանակում գտնվելն է, իսկ փող կարելի է նաև վարկով վերցնել: ԱՄՆ–ին իր ամբողջ պատմության ընթացքում օգնել է Ֆորտունան՝ հաջողության այդ կամակոր աստվածուհին, որը, հավանաբար, վիկինգների հետ տեղափոխվել է Ամերիկա և մոռացել, որ այստեղ հայ ազգ կա: Երևի նրան այնտեղ լավ են կերակրում:

Նյութը հրապարակման պատրաստեց Past.am-ը