Հայաստանում ներքին ու արտաքին քաղաքականության մեջ այսօր չկա զարգացման ծրագրային հայեցակարգ․ Արմեն Բադալյան

Հայաստանում ինչպես ներքին քաղաքականության, այնպես էլ արտաքին քաղաքականության մեջ այսօր չկա զարգացման ծրագրային հայեցակարգ, թե, ի վերջո, Հայաստանն ինչ է ուզում։ Tert.am-ի հետ զրույցում նման տեսակետ հայտնեց քաղաքական և ընտրական տեխնոլոգիաների փորձագետ Արմեն Բադալյանն՝ անդրադառնալով ՀՀ ներկայիս արտաքին քաղաքականությանը։ Նա նկատեց, որ ՀՀ վարչապետ Նիկոլ Փաշինյանն այս ընթացքում արդեն իսկ մի քանի անգամ հայտարարել է, որ շարունակելու է նախկին իշխանությունների կողմից վարած արտաքին քաղաքականությունը, այսինքն՝ ԵՏՄ, ՀԱՊԿ անդամ մնալու է, սակայն հասկանալի չէ, թե ՀՀ-ն ինչ է ցանկանում ԵՄ-ից ու ԱՄՆ-ից։

«Ինչպես հասկացանք, ԱՄՆ-ի հետ կապված հիմնական ձգտումն այն է, որ Ն. Փաշինյանը ՄԱԿ-ի գագաթնաժողովին հանդիպի ԱՄՆ նախագահ Դոնալդ Թրամփին, բայց սա կարող է PR նպատակ լինել, ոչ հայեցակարգ։ Միաժամանակ, չկա հայեցակարգ Հայաստան-Իրան, Հայաստան-Չինաստան հարաբերություներում, ՀՀ-ԱՊՀ երկրների հարաբերություններում և այլն, որևէ հայեցակարգային ծրագիր չկա, ընդամենն օրվա հարց է լուծվում»,- ասաց նա։

Բադալյանի համար անհասկանալի է այն, թե ինչու է վարչապետ Փաշինյանը շարունակում նախկին իշխանությունների կողմից վարած արտաքին քաղաքական գիծը, եթե ժամանակի հետ մի շարք արտաքին մարտահրավերներ փոխվել են։ Նրա խոսքով՝ նախկին իշխանությունների օրոք սկզբնական շրջանում ՌԴ-ԱՄՆ, Թուրքիա-ԱՄՆ, Թուրքիա-Չինաստան հակասությունները գոյություն չունեին, ինչը նշանակում է, որ չես կարող խախտված գործոնների դեպքում նույն դիրքը պահել, քանի որ դա բերելու է անհասկացողության, ինչը վնաս է ՀՀ-ի համար։

Հարցին՝ հնարավոր է, որ պարզապես 3 ամիսը բավարար չէր այդքան ուղղություններով հայեցակարգ մշակելու համար, թե դուք հայեցակարգի նախապատրաստում էլ չեք  տեսնում, Արմեն Բադալյանը պատասխանեց․ «Հասկանալի է, որ հայեցակարգը 1 օրում կամ ամսում չի լինում, բայց հայեցակարգի աղերսներն արդեն պետք է լինեն, որովհետև, երբ թիմը գալիս է իշխանության, առնվազն ինչ-որ ուղղությունների վրա պետք է աշխատի, որպեսզի ուղենիշները երևան։ Իհարկե, փաստաթղթերը երկար են, սակայն պիտի նշանները երևային, բայց սրա վերաբերյալ որևէ բան չի կատարվում, վարչապետը պարզապես տեղի- անտեղի, որտեղ պատահի միշտ նույն նախադասությունն է կրկնում, որ ՀՀ-ն չի փոխում իր արտաքին քաղաքականությունը։ Անգամ Անգելա Մերկելի հետ հանդիպման ժամանակ նույն նախադասությունը կրկնեց, սա արդեն անլրջացնում է ՀՀ ղեկավարությանը»։

Ըստ Բադալյանի՝ արտաքին քաղաքականության ուղենիշների հետ կապված քննարկում եղել է զուտ հասարակական սեկտորի մակարդակով, իսկ կառավարության կողմից այս հարցին բացարձակ ուշադրություն չի դարձվում։

«Միայն ասում են՝ ով ուզում է, գա, մենք բոլորի հետ լավ ենք, թող գա, այստեղ փող դնի, բայց նման կերպ չի լինում։ Կարևոր է, որ քեզ հասկանան, իսկ քեզ հասկանալու համար գոնե ինչ-որ ծրագրեր պետք է թղթի վրա լինեն, ոչ թե բառերին հետևեն, այդ էլ այն դեպքում, երբ այսօր կարող ես մի բան ասել, իսկ մյուս օրն՝ այլ։ Արտաքին քաղաքականության մեջ նման բան չի լինում»,- ընդգծեց փորձագետը։

Ինչ վերաբերում է Արցախի հիմնախնդրին, Արմեն Բադալյանը շեշտեց, թե հայեցակարգի մեջ թիվ 1 խնդիրը պետք է լինի հենց Արցախի հարցը, քանի որ այսօր փոփոխություններ են եղել Ռուսաստան, Թուրքիա պետությունների քաղաքականությունների մեջ, իսկ Թուրքիան Ադրբեջանի դաշնակից պետությունն է, որը շահագրգիռ է, որ այս խնդիրը լուծվի հօգուտ Ադրբեջանի։

«Ինչ վերաբերերում է վարչապետին, հիշենք, որ նա ԼՂՀ հարցով մի քանի իրար հակասող հայտարարություններ արեց։ Նա մեկ ասաց, որ չի պատրաստվում բանակցել ԼՂՀ հարցի շուրջ, և դա պետք է անի ԼՂՀ-ն։ Հետո ասաց, որ կբանակցի Ադրբեջանի հետ՝ զուտ ՀՀ-ի հարցերի հետ կապված, հետո ինքը հայտնեց, որ կբանակցի, եթե նախկին պայմանավորվածությունները՝ Վիեննայի ու Սանկտ Պետերբուրգի, կատարվեն, սակայն հետո ասաց, որ չի խուսափում Ադրբեջանի նախագահի հետ հանդիպել։ Սկզբում այլ տեսակետ էր, բայց հետո, կարծես, վերադարձավ նախկին իշխանությունների գծին, իսկ 2-3 նախագահները բանակցում էին նաև Արցախի անունից։ Հիմա վերականգնվում է, բայց դե յուրե ասում են, թե  չի վերականգնվում»,- եզրափակեց Արմեն Բադալյանը։