Սեպտեմբերին եղանակը բավական տաք է լինելու, մոտավորապես օգոստոսի նման. Գ. Սուրենյան

Սեպտեմբերին սպասվում է բավական տաք եղանակ, մոտավորապես կլինի այնպես, ինչպես օգոստոսին էր. այսօր հրավիրված ասուլիսին տեղեկացրեց ՀՀ ԱԻՆ հիդրոմետ ծառայության օդերևութաբանության կենտրոնի պետ Գագիկ Սուրենյանը:

«Օդի միջին ամսական  ջերմաստիճանը կլիմայական նորմայից բարձր կլինի մոտ 2 աստիճանով, տեղումները կլինեն նորմայի սահմաններում»,- ասաց նա և նշեց, որ այսինքն՝ տեղումները սեպտեմբերին շատ քիչ են լինելու:

Սուրենյանն առանձնացրեց մարզերում սպասվող եղանակային պայմանները: «Արարատի, Արմավիրի, Արագածոտնի, Վայոց ձորի և Կոտայքի մարզերի նախալեռնային գոտիներում ցերեկային ջերմաստիճանը հիմնականում ամսվա ընթացքում տատանվելու է +33 – +35–ի սահմաններում»,- ասաց նա և նշեց, որ ամսվա երրորդ տասնօրյակում կիջնի մինչև +10,12 աստիճան:

Շիրակի, Գեղարքունիքի, Արագածոտնի,Կոտայքի, Վայոց ձորի լեռնային բնակավայրերում ցերեկային ժամերին հիմնականում օդի ջերմաստիճանը տատանվելու է +27-ից +30–ի սահմաններում, գիշերային ժամերին ամսվա վերջում չի բացառվում՝ իջնի +2, +5 աստիճան:

Լոռու մարզում ցերեկային ջերմաստիճանը հիմնականում կտատանվի +28-ից +31-ի  սահմաններում, իսկ  գիշերվա ամենացածր ջերմաստիճանը, որը սպասվում է ամսվա վերջին տասնօրյակում, կլինի +2,+6 աստիճան:

Տավուշում ցերեկային ջերմաստիճանը կրկին բավական բարձր է, ցածրադիր գոտիներում  ցերեկը սպասվում է +30, +35 աստիճան տաքություն:

Սյունիքի մարզում ցերեկային ջերմաստիճանը կտատանվի +34-ից +35 աստիճանի հատվածում: 

Երևանում, ըստ Սուրենյանի, հիմնականում ամսվա ընթացքում օդի ջերմաստիճանը կտատանվի +34-ից +35 աստիճանի սահմաններում, իսկ գիշերային  ջերմաստիճանը ամենացածրը +10-ից +12 աստիճան կլինի:

Գագիկ Սուրենյանը նշեց, որ ամբողջ աշնան համար կանխատեսումներ չեն կարող անել. դեռևս  միայն կարող են ասել, որ հոկտեմբերին տեղումների քանակը նորմայից բարձր է լինելու։