Շիրակի մարզի Անի համայնքի բնակիչները պահանջում են համայնքի ղեկավար Արտակ Գևորգյանի հրաժարականը

 

Շիրակի մարզի Անի համայնքի բնակիչները պահանջում են համայնքի  hանրապետական ղեկավար Արտակ Գևորգյանի հրաժարականը:

Այս մասին Tert.am-ի հետ զրույցում ասաց ցուցարարներից Դավիթ Մելիքյանը:

Նա պատմեց, որ համայնքում բողոքի ցույցերը սկսել են նախորդ ամսվա 22-ից, իսկ հիմա շարունակվում են նստացույցի տեսքով:

«22 –ին դուրս եկանք փողոց, բողոքը շուտվանից կար, և քաղաքում շարունակական ցույցեր էին տեղի ունենում,  գյուղերից էլ մարդիկ միանում էին: Ամսի 24-ին համայնքի ղեկավարը, օգտագործելով իր վարչական բոլոր լծակները՝ դպրոցների տնօրեններ, մանկապարտեզների տնօրեններ, ուսուցիչներ, վարչական պատասխանատուներ, հակընդդեմ ցույց կազմակերպեց. մոտ 40-50 հոգով հավաքվել էին:

Ցույցեր, ավտոերթեր ենք անում, հանրային աջակցություն ունենք: Պարզ օրինակ ասեմ՝ 3 օր է՝ ինչ նստացույց ենք սկսել, 2 հոգով էինք, իսկ հիմա արդեն 7 վրան կա:

Շատերն են միանում մեզ, այդ թվում նաև գյուղերից»,-  ասաց նա:

Դավիթ Մելիքյանը վստահեցրեց, որ Անի համայնքը բազմաթիվ խնդիրներ ունի, որոնք նոր չեն առաջացել, և նկատեց, որ համայնքի ղեկավար Արտակ Գևորգյանն արդեն ղեկավարում է 14 տարի, բայց խնդիրներից որևէ մեկը, ըստ նրա, լուծված չէ: Ցուցարարը նաև շեշտեց, որ համայնքի ղեկավարը խոշորացման գործընթացից հետո որևէ ուշադրություն չի դարձրել համայնքի կազմի մեջ մտած մյուս գյուղերի խնդիրներին:

«Քաղաքի համար որևէ բան չի արվել, երեխաների ու երիտասարդության համար որևէ բան չկա, քաղաքում աղբը մայթերն ու փողոցներին է, ձմռանն ընդհանրապես մայթերը չեն մաքրվում, մշակույթն ընդհանրապես բացակայում է այս քաղաքում, երաժշտական դպրոցը նույնպես մահացած վիճակում է, քաղաքի լույսերը 2-3 ժամ են վառում: Մի խոսքով՝ քաղաքն ամբողջությամբ անտարբերության է մատնված: Խոշորացված համայնք է դարձել, սակայն ղեկավարը մյուս համայնքների համար էլ որևէ բան չի արել, նոր 2 օր է՝ ինչ սկսել է այցելել գյուղեր, դա էլ մեր ցույցերի ֆոնին, բայց սրանից առաջ ոչ մի գյուղում ոչ մի բան չի արել»,- ընդգծեց Մելիքյանը:

Վերջինիս խոսքով՝ Անի համայնքի ղեկավար Արտակ Գևորգյանը չի մոտեցել իրենց, չի փորձել նաև հասկանալ, թե ինչն է ցուցարարների բողոքի հիմքում: Միևնույն ժամանակ նա նշեց, որ մինչ նստացույց անելը Գևորգյանի հետ հանդիպման փորձ եղել է, ցանկությունը եղել է հենց Գևորգյանի կողմից, սակայն այդպես էլ համայնքի ղեկավարը հանդիպումը չի կազմակերպել:

«Մենք ասել էինք, որ մեր խնդիրը միայն քաղաքի զարգացումն է, սակայն այդ մարդն այդպես էլ ոչինչ չարեց: Նա չի փորձել երիտասարդության հետ ինչ-որ բան քննարկել, այլ ժողովրդին սառը ջրով է սպառնում և այլ սպառնալիքներ հնչեցնում: Հետո մենք որոշում ենք, որ իր հետ ընդհանրապես քննարկելու որևէ բան չկա և բողոքի տարբեր ակցիաներ կազմակերպելու մեթոդն ընտրեցինք: Արդեն 3-րդ օրն է, ինչ նստացույց ենք անում հրապարակում, բայց ոչ մի անգամ չի եկել՝ տեսնի, թե ինչ է, թեպետ մի քանի անգամ այստեղով անցել է, բայց  չի փորձել նույնիսկ հասկանալ, թե որն է մեր պահանջը»,- շարունակեց ցուցարարը:

Ըստ Մելիքյանի՝ իրենք բողոքի ակցիաները չեն դադարեցնելու, պայքարելու են մինչև վերջ: Նա վստահեցրեց՝ իրենք համայնքապետի նոր թեկնածու դեռևս չունեն, սակայն արժանավորները շատ են:

«Փաստաթղթավորված չունենք, որ ինքը կոնկրետ թալանել է. եթե չեմ սխալվում՝ տարածքային կառավարման աուդիտն ընթացքի մեջ է: Ինչպես գիտենք, նախկին իշխանության ժամանակ մի շարք պաշտոնյաներ թալանել էին, բայց չէին  կարողանում ապացուցել, այդպես էլ հիմա է: Արտակ Գևորգյանը շատ բաներ ունի, սակայն դրանք իր անունով չեն: 14 տարի է՝ նա ղեկավարում է համայնքը, սակայն քաղաքի վիճակը վիճակ չէ, խնդիրներն էլ բավականին շատ են: Մեր շարժման մեջ  կան գրագետ մարդիկ, խելացի  ու համայնքի հոգսերով ապրող մարդիկ, որոնք հանգիստ կարող են  ղեկավար լինել»,- նշեց Դավիթ Մելիքյանը:

Ինչ վերաբերում է գործողությունների հետագա պլանին, նա հայտարարեց, թե շատ խելացի ու գրագետ ծրագիր ունեն,  որը դեռևս չեն բացահայտում:

Տեղեկացանք, որ խնդրին չի արձագանքել նաև Շիրակի մարզպետ Կարեն Սարուխանյանը: