Հայհոյանքը քրեականացնելն իրավունքի տեսանկյունից նշանակում է՝ մեկ քայլ հետ, իսկ իրականում սա «ջուր ծեծոցի» է. Երվանդ Վարոսյան

 

Փաստաբանների պալատը ՀՀ քրեական օրենսգիրքը լրացնելու նախագիծ է մշակել, որը վերաբերում է հայհոյանքը քրեականացնելուն:

«Հայհոյանքը խոսքի, պատկերի, ձայնի, նշանի կամ այլ եղանակով հանրորեն հայտնի անպարկեշտ բառերի և հասկացությունների հրապարակային արտահայտումն է համացանցում կամ զանգվածային լրատվության միջոցներով՝ ուրիշի պատիվն ու արժանապատվությունն արատավորելու նպատակով. պատժվում է տուգանքով՝ նվազագույն աշխատավարձի հարյուրապատիկից երկուհարյուրապատիկի չափով կամ կալանքով՝ մինչև մեկ ամիս ժամկետով»,- սահմանվում է առաջարկվող նախագծում:

Փաստաբան Երվանդ Վարոսյանը Tert.am-ի հետ զրույցում առաջարկվող նախագծի վերաբերյալ ասաց, որ նման նախագիծ ներկայացնելու անհրաժեշտություն չկար, իսկ այն ընդունելը կնշանակի մեկ քայլ հետ կատարել իրավունքի տեսանկյունից:

«Եթե լուրջ մոտենանք առաջարկվող նախագծին, ապա որևէ անհրաժեշտություն չկա  ՀՀ-ում իրավունքի տեսակետից մեկ քայլ հետ կատարել: Ցանկացած քրեականացում նշանակում է մեկ քայլ հետ գնալ»,- ասաց Վարոսյանը:

Հարցին, թե որտեղից կարող է ծագել դրա անհրաժեշտությունը՝ հաշվի առնելով, որ վիրավորանքի մասին օրենք կա, որն ապաքրեականացվել է, Երվանդ Վարոսյանն ասաց, որ վիրավորանքի և զրպարտության հարցը լուծված է ՀՀ օրենքով, և հայհոյանքը քրեականացնելու անհրաժեշտությունը չկա։

Նրա խոսքով՝ ցանկացած անձ, ով վիրավորվել է հատկապես հրապարակային  արված  որևէ արտահայտությունից, կարող է քաղաքացիական հայց ներկայացնել և պատասխանատվության կանչել այն անձին, ով իրեն վիրավորել է:

«Դա զուտ իրավական կողմն է, իսկ իմ կարծիքով՝ իրականում այլ բան է կատարվում:   

Ես կարծում եմ, որ գործ ունենք «ջուր ծեծոցիի» հետ, դա ժամանակ սպանելու միջոց է և շատերին , այդ թվում նաև մեզ զբաղեցնելու միջոց է, որպեսզի բան ունենանք անելու:

Սահմանվում է, որ հայհոյանքը հանրության համար հայտնի արտահայտություններն են: Փորձ է արվել բացատրել, թե ինչ է հայհոյանքը:Դա ի՞նչ լղոզված սահմանում է, մեկն էլ այդ լղոզված արտահայտության տակ կարող է հասկանալ ...օրինակ պնդուկը, հանրության մի ստվար զանգվածի համար արդեն հայտնի է, թե ինչ է խորհրդանշում այն, բացի ընդեղենից, և ում է վերաբերում: Սա ձև չէ, սա օրենքի նախագիծ չէ, եթե ուզում եք արգելել ինչ-որ արտահայտություններ ու ժեստեր՝ պարտավոր եք բոլոր արտահայտություններն ու ժեստերը սահմանել օրենքում»,- ասաց Վարոսյանը:

Փաստաբանի խոսքով՝ այստեղ լրջություն չկա, իսկ քանի որ դա բխել է փաստաբանների պալատից, ապա նրա խոսքով՝ ՓՊ-ն սրանով փորձ է անում շեղել հանրությանը  և մասնավորապես՝ Արդարադատության նախարարությանը, այն լրջագույն խնդիրներից, որոնք առկա են Փաստաբանների պալատում.

«Պետական միջոցների ոչ նպատակային ծախսից են փորձում շեղել, պետության հաշվին  իրենց «պադավատ»  քշելուց, դրա համար ես ՓՊ-ից սպասում եմ է՛լ ավելի զավեշտալի ու ծիծաղելի նախագծեր: ՓՊ-ն դեռ մի կողմ, բա Արդարադատության նախարարը, բա սա օրենքի նախագի՞ծ  է, որը կարելի է լուրջ ընդունել ու դնել շրջանառության մեջ, ի՞նչ է, բան ու գործ չունե՞ն զբաղվելու, ոչինչ չկար անելու Արդարադատության նախարարությունում, այս օրենքի նախագի՞ծը պետք է դրվեր շրջանառության մեջ, դա էր հա՞ այն ծայրահեղ խնդիրը, որ կանգնած էր այդ նախարարության առաջ մինչև հեղափոխությունը, հիմա հեղափոխությունն եղավ, պարզվեց, որ այս օրենքի նախագիծը պետք է դրվեր շրջանառության մեջ, նախկիններն էլ չէին «ֆայմում»»:

Փաստաբանի խոսքով՝ ներկայացված նախագիծը զավեշտ է, և այն երկար կյանք ունենալ չի կարող: