Պետք է պատասխան տան նաև այն մարդիկ, ովքեր խեղաթյուրում են իրականությունը». Վահե Էնֆիաջյան

Past.am

Քարոզարշավի մեկնարկին քաղաքական բոլոր ուժերը կողմ արտահայտվեցին ընտրարշավը քաղաքակիրթ քաղաքական մշակույթի շրջանակներում իրականացնելու նախապայմանին: ԲՀԿ-ն նույնպես դրական արտահայտվեց, սակայն քարոզարշավի ընթացքում պարզ դարձավ, որ ԲՀԿ-ի քաղաքապետի թեկնածու Նաիրա Զոհրաբյանը հայտնվել է սև PR-ի կիզակետում, քանի որ նրա վարկանիշն օր-օրի աճում էր:

Զոհրաբյանի վարկանիշին «հարվածելու» համար գործի դրվեցին բոլոր գործիքակազմերը՝ թե՛ սոցիալական ցանցերի որոշ օգտատերերի ամբարո գրառումների, թե՛ որոշ ֆեյք-կայքերի կողմից կին գործչի պատիվն ու արժանապատվությունը նսեմացնող կոլաժների շրջանառության տեսքով: Սև քարոզչության պիկին արդեն, երբ այլևս ուրիշ ոչ մի հնարք չէր մնացել, շրջանառության մեջ դրվեց երևանի ավագանու ընտրարշավի հետ որևէ աղերս չունեցող՝ մարտի 1-ին արտակարգ դրություն մտցնելու ԱԺ հայտարարությանը Նաիրա Զոհրաբյանի «կողմ» քվեարկելու հանգամանքը: Հավանաբար, հաշվարկվել էր, որ դրանով ևս մեկ անգամ կօգտագործեն հասարակության զգայությունը թեմայի վերաբերյալ և այդպես կփորձեն ևս մեկ հարված հասցնել ԲՀԿ թեկնածուի վարկանիշին:

ԱԺ «Ծառուկյան» դաշինքի քարտուղար Վահե Էնֆիաջյանն անդրադառնալով վերջին իրադարձությանը նշեց, որ ԲՀԿ-ն համաձայնելով քաղաքակիրթ մթնոլորտում իրականացնել քարոզարշավը չէր կարող կանխատեսել նման զարգացում:

«Մենք բազմիցս հայտարարել ենք, որ պետք է ներկայացնել միայն ծրագրային դրույթները, ինչը, գաղտնիք չէ, նոր մշակույթ է մեր կյանքում: Բայց, ցավոք, հատկապես նորելուկ քաղաքական գործիչների համար, կարծես թե անհասկանալի է այդ մոտեցումը: Ինչ վերաբերում է մարտի 1-ի դեպքերին, ապա կրկին անգամ հայտարարում եմ, որ բոլոր այն մարդիկ, ովքեր մասնակից են եղել այդ իրադարձություններին, անհամաչափ իրավական գործողություններ են իրականացրել, նրանք, ովքեր անհամաչափ հրամաններ են տվել, ովքեր դրդել են, ովքեր փորձել են առիթից օգտվել և ստեղծված իրավիճակն իրենց շահերին ծառայեցնել, պետք է պատասխան տան, իսկ մեղադրանքները պետք է ներկայացվեն միայն ամբողջությամբ և մանրակրկիտ ուսումնասիրություն իրականացնելուց հետո: Պետք է բոլորն օրենքի առջև պատասխան տան և այստեղ երկրորդ կարծիք լինել չի կարող, բայց պետք է նաև պատասխան տան այն մարդիկ, ովքեր խեղաթյուրում են իրականությունը և փորձում են Նաիրա Զոհրաբյանի բարի համբավն ու արժանապատվությունն արատավորել: Եվս մեկ անգամ եմ ասում, ոչ մեկին չի հաջողվի քաղաքապետի մեր թեկնածուին արատավել և ես դա երաշխավորում եմ»,- ասաց Վ. Էնֆիաջյանը:

Քաղաքական գործչի կարծիքով նման տեղեկությունները քարոզարշավի ընթացքում շրջանառության մեջ դնելը պայմանավորված է նրանով, որ քարոզարշավի ընթացքում օր-օրի աճեց առանց այդ էլ բարձր վարկանիշ ունեցող քաղաքկան գործիչ Զոհրաբյանի վարկանիշը, ինչը ոմանց համար խիստ մտահոգիչ դարձավ:

«Մենք ինքներս շրջելով Երանի վարչական շրջաններում դա տեսնում և արձանագրում ենք: Եվ հարց է առաջանում, թե ինչո՞ւ այդ մասին ամիսներ առաջ չէր խոսվում: Եթե այդ մասին որևէ ասելիք կար, ապա կարելի էր դրա մասին նախապես ասել: Ի վերջո, պետք է մեր երկրում համերաշխության, ներդաշնակության և բարի գործեր իրականացնելու մթնոլորտ ձևավորվի՞, թե՞ ոչ: Փոխադարձ վիրավորանքների ճանապարհը ոչ մի տեղ չի տանում: Մեր երկրում բազում խնդիրներ կան և մեր քաղաքական թիմը վճռական է տրամադրված այդ քաղաքական խնդիրները լուծելու առումով: Եվ դա է միակ նպատակը, որը մեզ ստիպեց մասնակցել Երևանի ավագանու արտահերթ ընտրություններին»,- ասաց Վ. Էնֆիաջյանը:

Հիշեցնենք, որ ԱԺ «Ելք» դաշինքի ղեկավար Լենա Նազարյանը հայտարարել էր, թե Զոհրաբյանը իբրև թե ԱԺ հայտարարությանը «կողմ» քվեարկելով համաձայնվել է, որ անհրաժեշտ և իրավաչափ է մարտի 1-ին արտակարգ դրություն հայտարարելու հրամանագիրը: Ինչին ի պատասխան Ն. Զոհրաբյանը պատասխանել էր.

«Մտածում էի՝ տեսնես կգտնվի՞ մի գրագետ իրավաբան, որ կասի՝ արտակարգ դրություն հայտնելու նախագիծ ԱԺ-ն չի քվեարկել եւ չէր կարող քվեարկել, որովհետև դա օրենքի նախագիծ չի եղել, դա եղել է նախագահ Ռոբերտ Քոչարյանի հրամանագիրը, որը չի դրվել քվեարկության և չէր կարող քվեարկվել։ Սխալ է արել Ռոբերտ Քոչարյանը, տարեք կախեք բոլոր նրանց, ովքեր սխալ հրամանագիր են բերել։ Ազգային ժողովը՝ ԲՀԿ-ն, ՀՅԴ-ն և այլ քաղաքական ուժեր չէին կարող կողմ քվեարկել մի հրամանագրի, որը նախագիծ չի եղել։ Հասկանում եմ, որ տգետ են, ամենավտանգավոր բանը մատնչող տգիտությունն է, ամենավտանգավորը կիսագրագետներն են, որ պատի տակ մի բան լսել են ու խառնում են ամեն ինչ»: