Կա քաղաքական ճգնաժամ, և այն Սահմանադրությամբ հարթելու միակ տարբերակը խորհրդարանական ընտրություններն են. Արամ Սարգսյան

Կառավարության կազմից դուրս գալ, չգալու խնդիրը մեր քննարկելու հարցը չէ. Tert.am-ի հետ զրույցում ասաց «Ելք» խմբակցության պատգամավոր Արամ Սարգսյանը՝ պնդելով, թե ինքը չի ասել, որ եթե այս լարվածությունը խորանա, կհրաժարվեն կառավարությանը մաս կազմելուց: 

«Առաջին հերթին ես ասել եմ, որ հիմա եթե Արտակ Զեյնալյանը  դուրս է գալիս կառավարությունից, ասում են՝ «այ տեսեք այս նեղ պահին վարչապետին գցեցին», դուրս  չի գալիս կառավարությունից՝ ասում են «այ քննադատելը քննադատում են, բայց պաշտոնը կպած պահում են»,-ասաց նա:

Հարցին, թե ինքը լարվածության թուլացում նկատե՞լ է՝ հաշվի առնելով Մալաթիա Սեբաստիայում քարոզարշավին վարչապետ Նիկոլ Փաշինյանի հայտարարությունը, որ նման լարվածության պատճառն այն է, որ բոլոր քաղաքական ուժերը անկեղծորեն են պայքարում իրենց քվեի համար, Արամ Սարգսյանը հրաժարվեց պատասխանել:

Իսկ թե, այդուհանդերձ, նա իշխանության կողմից տեսնո՞ւմ է լարվածություն առաջացրած տոնայնության ցածրացում, Արամ Սարգսյանը նշեց, որ իր կարծիքով Նիկոլ Փաշինյանի հայտարությունները շարունակում են շատ կոշտ մնալ:

«Մրցակից թիմի տեսակետները չեմ մեկնաբանում, ես ասում եմ տեսակետ, թե ինչպես եմ տեսնում ԱԺ-ն ցրելու և նոր խորհրդարանական ընտրություներ հաստատելու հնարավորությունը, ինչպես եմ տեսնում այս ընտրությունները արդար, թափանցիկ, օրենքի տառին համապատասխան անցկացնելը,  ես գովաբանում եմ մեր թեկնածուին, ոչ ավելին: Ես տեխնոլոգիաներ չեմ կիրառում հասարակության վրա և ես այս ընտրությունները չեմ կապում ո՛չ արտահերթ  ընտրությունների, ո՛չ խորհրդարանական ընտրության, ոչ էլ սև ուժերին պատժելու խնդրով»,-ասաց նա:

Հարցին, թե ինքը խորհրդարանը ցրելու անհրաժեշտություն տեսնո՞ւմ է, Արամ Սարգսյանը պատասխանեց՝ միանշանակ տեսնում է: «Անկասկած, ես առաջինն եմ եղել, որ ասել եմ՝ հնարավորինս շուտ: Հեղափոխությունից հետո «Ելք» դաշինքի նիստում եմ ասել, որ ճիշտը հիմա է: Այսօր տեսնում եմ, որ կա քաղաքական ճգնաժամ և այդ ճգնաժամը Սահմանադրությամբ հարթելու միակ տարբերակը խորհրդարանական ընտրություններն են, այլ կերպ այդ ճգնաժամը հաղթելու տարբերակները ես համարում եմ վտանգավոր երկրի համար»,-ասաց նա:

Այն դիտարկմանը, որ ինչպես նշվել է քաղաքական մի քանի ուժերի կողմից, գուցե գա ժամանակ, երբ ՔՊ-ն իր գործընկերների կարիքը զգա կոալիցիա կազմելու համար, և չստանա այդ հնարավորությունը, Արամ Սարգսյանը ասաց. «Գուցեները քաղաքականության մեջ շատ են, և ես պայծառատես չեմ, չեմ կարող այդ հարցին պատասխանել: Տա Աստված, որ ամեն ինչ լավ լինի, նորմալ, որ ՀՀ-ն շարժվի գործող օրենքներով ու Սահմանադրությամբ, մեր երկրում խաղաղություն լինի և խնդիրներ չառաջանան քաղաքական  դաշտի վերադասավորումների ժամանակ: Մնացած  պարագաներում, ժամանակը կգա, կերևա: Ես չեմ կարող այսօր վերլուծություն անել, թե որ դեպքում ինչ կարող է լինել: Իհարկե, կան  քաղաքական ուժեր, որոնց հետ որևէ դեպքում ես կոալիցիա չեմ կազմի, կան քաղաքական ուժեր, որոնք կախված  քաղաքական իրավիճակից, կարող են նաև կոալիցիա կազմել: Այդ ամեն ինչը պետք է բխի երկրի շահից, ստեղծված իրավիճակը հարթելուց, մեր ժողովրդի բարեկեցությունն ապահովելուց»,-ասաց նա: