«Սուրբ Գրիգոր Լուսավորիչ» ԲԿ-ում պայթյունը՝ ոչ կոմպետենտ հսկողության արդյունք. մանրամասներ միջադեպից (տեսանյութ)

ՀՀ առողջապահության նախարարության ենթակայության «Սուրբ Գրիգոր Լուսավորիչ» բուժկենտրոնի թթվածնի արտադրության կայանում թթվածնի բալոնի պայթյունի հետևանքով այսօր կեսօրին մահացել է նույն արտադրամասի տեխնիկ-օպերատորը` 40-ամյա Վահրամ Գասպարյանը: Եվս մեկ աշխատակից թեթև վնասվածքներով անմիջապես տեղափոխվել է նույն բուժհաստատություն:

2012թ.-ից գործող թթվածնի կայանում երբևէ նման դեպք չի գրանցվել: Նախնական տվյալներով` կայանում պայթած թթվածնի բալոնը հիվանդանոցին չի պատկանել, և «Սուրբ Գրիգոր Լուսավորիչ» ԲԿ-ի տնօրենի ժամանակավոր պաշտոնակատար Արման Հովակիմյանի խոսքով՝ պայթյունի պատճառը եղել է թթվածնի բալոնի տեխնիկական բնութագրերին անհամապատասխանությունը:

«Այդ թթվածնի բալոնը չի պատկանել ԲԿ-ին: Այսինքն՝ մեր տեխնիկական զննումը չանցած բալոն է եղել: Փորձագետների աշխատանքից հետո կպարզվի՝ որտեղից է հայտնվել այդ բալոնը, ինչ ճանապարհներով:Վախճանվածն այսօրվա հերթապահ չի եղել, այսօրվա հերթապահը վիրավորված անձն է, որը տեղափոխվել է ԲԿ՝ առաջին օգնություն ցույց տալու նպատակով: Մահացածն այսօր շուրջօրյա հերթապահության չի եղել»,- հայտնեց նա:

Արման Հովակիմյանը նշեց, որ թթվածնի կայանն այս տարի հունիսին է անցել փորձաքննություն և դրական եզրակացություն է ստացել շահագործման համար, իսկ կայանի աշխատակիցներն ունեցել են տեխնիկական հավաստագրեր, որ կարող են աշխատել կայանում:

«Ինչ վերաբերում է թթվածնային կայանին, այո, ամեն մի քառակուսի մետրն և ամեն մի գործառույթ շատ կարևոր է տնօրենի համար, բայց նաև անհնար է, որ մեկ հոգին կառավարի և տիրապետի ողջ ինֆորմացիային և գործընթացներին: Ամեն մի գործառույթ, ամեն մի գործընթաց ունի իր համապատասխան ղեկավարը և պատասխանատուն»,- բացատրեց Արման Հովակիմյանը:

«Սուրբ Գրիգոր Լուսավորիչ» բժշկական կենտրոնի թթվածնի կայանի տնօրեն Հենրիխ Խաչատրյանը Tert.am-ին հայտնեց, որ, հավանաբար, լիցքավորման ժամանակ ճնշումների տարբերությունից է պայթյունը եղել:

«Բոլորովին արգելված է եղել թթվածնի բալոններ լիցքավորելը, սակայն այդ անձնավորությունն այնտեղի աշխատողն է եղել, կողպեքը, երևի, բաց է եղել, ինքը փոքր բալոն է բերել, միացրել, որ լիցքավորի, սակայն ճնշումների տարբերությունից պայթել է: Առանց մտածելու արել է, մյուսին էլ բանի տեղ չի դրել, ինքը իրանով լցրել է:

Չգիտեմ՝ ինչ պատճառով է բերել, մենք չենք տեսել, պայթյունից հետո ենք բոլորս իմացել. եթե տեսնեի, կթողնեի՞, իհարկե կարգելեի: Իմ կարծիքով՝ այդ բալոնը, որ ինքը բերել է, չի նայել, չի հասկացել՝ ցածր ճնշման բալոն է եղել, միացրել է թթվածնի սխեմային և ոչ էլ գիտակցել է, թե ինչ բալոն է»,- ասաց նա:

Բժիշկ-ուրոլոգ, առողջապահության կազմակերպիչ Գևորգ Գրիգորյանի խոսքով՝ սա առաջին հերթին անվտանգության կանոնների կոպիտ խախտման հետևանքով առաջացած միջադեպ է:

«Պատճառագիտական առումով սա ոչ կոմպետենտ հսկողության արդյունք է: Այսինքն՝ եթե մենք փորձում ենք հսկողությունը սահմանել ոչ թե ոլորտի այն հատվածների վրա, որտեղ իրականում դա պետք է, դա անվտանգությունն է, բուժօգնության որակն է, այլ փորձում ենք հսկողություն սահմանել բաժանմունքներում «գաղտնի գործակալներ» աշխատանքի ընդունելով, բժիշկների ֆինանսների մուտք ու ելքի հսկողության խորացումով, ապա մենք ունենում ենք նման հետևանքներ»,- նկատեց նա:

Առողջապահության կազմակերպչի կարծիքով՝ նոր իշխանությունների կառավարման ընթացքում առողջապահության ոլորտում շատ դեպքերում լինում են ոչ կոմպետենտ կադրեր, նշանակումներ և գործելակարգ:

«Սուրբ Գրիգոր Լուսավորիչ» ԲԿ-ի նախկին ղեկավարությունը, ներկա ղեկավարությունը, ինչպես նաև բոլոր հիվանդանոցների ղեկավարները չեն կարող սուրբ լինել: Սակայն ղեկավարը պետք է ունենա որոշակի հատկանիշներ, որոնք կարող են շատ դեպքերում բնակչության ինչ-ինչ շերտերի մոտ դժգոհություն առաջացնել, բայց մարդը կարողացել է ղեկավարել 1800 հոգանոց կոլեկտիվ և տարիներ շարունակ կարողացել է աշխատեցնել «Սուրբ Գրիգոր Լուսավորիչ» ԲԿ-ը՝ բավականին լավ ցուցանիշներով և բավականին դեպի աճ տանելով ամենը, մենք գիտենք, որ բազմաթիվ անգամ նոր սարքավորումներ է ձեռք բերել հիվանդանոցը, անվանի մասնագետներ են այնտեղ եկել և այլն»,- ընդգծեց Գևորգ Գրիգորյանը:

Նշենք, որ ՀՀ քննչական կոմիտեի Ավան և Նոր Նորք վարչական շրջանների քննչական բաժնում քննություն է տարվում՝ պարզելու «Սուրբ Գրիգոր Լուսավորիչ» ԲԿ-ում տեղի ունեցած պայթյունի դեպքի հանգամանքները: