Ինչ ակնկալիքներ ունեն արտախորհրդարանական ուժերը և արդյոք կհասցնեն պատրաստվել դեկտեմբերին կայանալիք արտահերթ ընտրություններին

Tert.am-ը արտախորհրդարանական ուժերից` «Հայ ազգային կոնգրես», «Ժառանգություն» «ժողովրդավարական հայրենիք», «Հայաստանի Դեմոկրատական կուսակցություն» կուսակցություններից հետաքրքրվել է, թե արդյոք կհասցնեն պատրաստվել արտահերթ խորհրդարանական ընտրություններին, եթե դրանք անցկացվեն դեկտեմբերին և ինչ ակնկալիքներ ունեն:

ՀԱԿ կուսակցության քարտուղար, ԱԺ նախկին պատգամավոր Արամ Մանուկյանը  նշեց, որ հասցնելը այստեղ կարևոր չէ, կարևորը ճգնաժամը լուծելն է: «Քաղաքական ճգնաժամը հանգուցալուծել է պետք, դա վտանգում է Հայաստանի կանխատեսելիությունը և անվտանգությանը, դա է խնդիրը, ով ինչպես կուզի՝ թող հասցնի»,-ասաց նա:

Արամ Մանուկյանն ասաց, որ իրենք կմասնակցեն ընտրություններին: Ինչ վերաբերում է խորհրդարան անցնելու ակնկալիքին, նա ասաց, որ գնահատական տալը դեռ շատ շուտ է: «Չարժե զբաղվել դրանով»,-ասաց նա:

«Ժառանգություն» կուսակցության վարչության նախագահ Արմեն Մարտիրոսյանը նշեց, որ յուրաքանչյուր կուսակցություն պետք է պատրաստ լինի ցանկացած ընտրությունների առավելևս, որ արտահերթ ընտրությունների մասին հայտարարվել է վաղուց` որպես քաղաքական օրակարգ և տեղին չէ, եթե որևէ մեկը արդարանա պատրաստ չլինելու հետ կապված:

Նա նշեց, որ խորհրդարան այս ժամանակահատվածը պետք է օգտագործեր Ընտրական օրենսգիրք ընդունելու համար։ Նա նաև և հույս հայտնեց, որ մինչ դեկտեմբեր դա կանեն: Արմեն Մարտիրոսյանը նշեց, որ Ընտրական օրենսգրքի հետ կապված բոլոր հարցերը քննարկվել են և դրական համարեց անցողիկ շեմի նվազեցումը, քանի որ որքան հասարակության տարբեր շերտեր ներակայացված լինեն խորհրդարանում, այնքան լավ։ 

Արմեն Մարտիրոսյանն ասաց, որ իրենք նպատակահարմար էին համարում որ հեղափոխությունից անմիջապես հետո ամռանը լիներ արտահերթ ընտրություններ, սակայն կողմ են նաև, որ լինի դեկտեմբերին: «Որքան շուտ լինի, որքան շուտ քաղաքական պրոցեսները հստակեցվեն, այնքան լավ»,-ասաց նա:

Դիտարկմանը, թե հաշվի առնելով Երևանի ավագանու ընտրություններին ձեր ստացած քվեները, ակնկալո՞ւմ եք, որ կհայտնվեք  խորհրդարանում, Արմեն Մարտիրոսյանը նախ նկատեց, որ դա հանրաքվե էր այն հարցի շուրջ, թե քաղաքացիները ցանկանում են արտահերթ խորհրդարանական ընտրություններ, թե ոչ: 

«Ես այնուամենայնիվ հույս ունեմ, որ արտահերթ ընտրությունների ժամանակ քաղաքացիներն այլ կերպ կբաշխեն իրենց ձայնը, սառնասիրտ քվեարկություն կանեն, բայց քաղաքական իրավիճակի պարզ գնահատումը բերում է համոզման, որ Նիկոլ Փաշինյանի առավելություն ակնհայտ է».,-ասաց նա:

«Ժողովրդավարական հայրենիք» կուսակցության նախագահ Պետրոս Մակեյանը գտնում է, որ յուրաքանչյուր քաղաքական ուժի հնարավորությունների և մասնակցության հարցը չպետք է քննարկվի, այլ հակահեղափոխության, ռևանշիստների վերջնական կապիտուլյացիայի հարցը, ինչը հնարավոր է միայն արտահերթ ընտրություններով, հակառակ դեպքում իրենք ամեն ինչ անելու են, որպեսզի վերցնեն իշխանությունը:

Պետրոս Մակեյանը մտահոգություն հայտնեց, որ եթե Փաշինյանը հրաժարական տա, ապա հակահեղափոխականները Ռոբերտ Քոչարյանի կամ որևէ այլ թեկնածուին վարչապետ կընտրեն: 

Նա նշեց, որ Երևանի ավագանու ընտրություններին հեղափոխական էյֆորիայի ականատես եղանք: «Նոր իշխանությունները չկարողացան, թե չցանկացան, չեմ կարող ասել, քաղաքական դաշտի վերականգնման գործընթացներն իրականացնել, սակայն այս խառնաշփոթի մեջ այս հարցը կարծես երկրորդ պլան է մղվել»,-ասաց նա:

Ըստ Պետրոս Մակեյանի` Նիկոլ Փաշինյանի գլխավորած ուժը 80 տոկոսից ավելի չի ստանա արտահերթ ընտրություններում: Անդրադառնալով  Սահմանադրությամբ նախատեսված խորհրդարանում 30 տոկոս ընդդիմություն լինելու պահանջին, նա ասաց.«Եթե հեղափոխությանը աջակից ուժերը դաս քաղեն և համախմբվեն մեկ թիմով հանդես գան, ես կարծում եմ, որ դա կլինի երկրորդ ուժը և այդ դեպքում մեկ երրորդի գերակշիռ մասը զբաղեցնելու է հեղափոխությանը աջակից ուժերը: Դրա այլընտրանքը նշանակում է փոշիացնել քվեները, ինչը տեղի ունեցավ Երևանի ավագանու ընտրություններին»։

Պետրոս Մակեյանը նաև ասաց հարցեր կան, որոնց շուրջ համաձայն չեն Նիկոլ Փաշինյանի հետ, բայց չեն բարձրաձայնում, քանի որ դրանից կօգտվեն հակահեղափոխական ուժերը: 

Ըստ նրա՝ միայնակ ընտրություններին մասնակցելով դժվար կլինի հաղթահարել նվազագույն շեմը, քանի որ ռեսուրսի խնդիր կա և իրենց կուսակցությունը միշտ երեք նախագահների թիրախում է եղել:

Հայաստանի Դեմոկրատական կուսակցության. նախագահ Արամ Սարգսյանը նշեց, որ արդեն սկսել են պատրաստվել ընտրություններին: «Չնայած գտնում ենք, որ դեկտեմբերը շատ շուտ է արտահերթ ընտրություններ անցկացնելու համար և ոչ թե ինչ-որ քաղաքական նկրտումներից ելնելով, այլ ռեալ իրավիճակից: Այսպես ափալ-թափալ կստացվի, որը չի արտահայտի իրական վիճակը»,- ասաց նա և նշեց, որ եթե պարտադրված լինի արտահերթ ընտրությունները դեկտեմբերին, ապա կմասնակցեն: 

«Մենք հիմա փորձում ենք ձևավորել ավելի լայն դաշինք գաղափարական հենքի վրա, սկսվել են բանակցությունները»,-ասաց նա և նշեց, որ սոցիալ-դեմոկրատական, սոցիալական արդարության սկզբունքի առաջնային համարող ուժերի հետ են իրականացվում այդ բանակցությունները:

Նա բացառեց համագործակցությունը ծայրահեղակաների և այսօրվա վիճակի համար պատասխանատուների հետ, խոսքը երեք նախագահների օրոք կառավարող ուժերի մասին է:

Անդրադառնալով Ընտրական օրենսգրքի ընդունմանը, նա նշեց, որ կան վիճահարույց հարցեր, որ իրենց երկու առաջարկություններ չեն ընդունվել, որոնցից մեկը ընտրագրավի վերացումն է։ Երկրորդը վերաբերում էր բոնուսային 30 տոկոսի փոփոխությանը: Արամ Սարգսյանը ամեն դեպքում դրական և կարևոր համարեց ռեյտինգային  ցուցակների վերացումը: