Ֆիննախում կրճատվել է 92 աշխատող, ենթադրվում է՝ կրճատումներ կլինեն մյուս գերատեսչություններում ևս. կա հնարավորություն ավելի քիչ հաստիքներով ավելի լավ արդյունք ստանալ. Ա. Ջանջուղազյան

ПОЛИТИКА 24 Октябрь, 2018 20:22

Տեսա, որ կա հնարավորություն նույն արդյունքը կամ ավելի լավ արդյունք ստանալ ավելի քիչ հաստիքներով: Այս մասին Tert.am-ի հետ զրույցում ասաց ֆինանսների նախարարի պաշտոնակատար Ատոմ Ջանջուղազյանը՝ անդրադառնալով գերատեսչությունում կրճատումների մասին մամուլի հրապարակմանը:

«Մեր կարծիքով` ղեկավար կազմի թիվը մի քիչ չափազանցված է պետական մարմիններում: Մեզ մոտ, օրինակ, 4-ից 1-ը ղեկավար է կամ այսպես ասած ղեկավարին սպասարկող անձնակազմ: Դա ամենավատը չէ, որովհետև որոշ տեղերում կա նաև 2-ից 1-ը, ցավոք սրտի: Եթե 10-ից 1-ը ղեկավար լինի, դա ավելի տրամաբանական կլինի»,- նշեց ֆինանսների նախարարի պաշտոնակատարը:

Ըստ մամուլում հրապարակված տեղեկության` ֆինանսների նախարարությունում լուրջ կադրային կրճատումներ են եղել, մասնավորապես՝ մոտ 150 պայմանագրային աշխատող է կրճատվել:

Ատոմ Ջանջուղազյանի խոսքով՝ ոչ թե 150, այլ 92 աշխատողների մասին է խոսքը, որոնցից 58-ն է եղել պայմանագրային:

«Այն ժամանակ, երբ պայմանագրային աշխատողներն առաջացել են, Ձեզ մոտ այդ հարցը չի առաջացել՝ ինչու են պայմանագրային աշխատողներ առաջացել: Երբ որ մենք գալիս ենք Ազգային ժողով և ասում ենք, որ մեր հաստիքացուցակը բաղկացած է այսքան մարդուց, բայց փաստացի ոչ թե աշխատում են այդքան, այլ այդքան գումարած նաև պայմանագրային աշխատողներ»,- ընդգծեց նա:

Ֆինանսների նախարարի պաշտոնակատարի խոսքով՝ նախարարությունում կառուցվածքի փոփոխությունը, հաստիքների նվազեցումը բացասական որևէ ազդեցություն չի ունեցել:

«Ո՞րն է նախընտրելի ճանապարհը, որ մենք, որպես սոցիալական խնդիր, ինչ-որ մի տեղ պահենք հաստիքներ, որոնք որևէ ազդեցություն վերջնական արդյունքի վրա չունեն, թե ճիշտ հակառակը՝ գնանք այն ճանապարհով, որ առավելագույնս արդյունավետ, կոմպակտ հաստիքների թվաքանակով ապահովենք այն վերջնաարդյունքը, որն ակնկալում ենք»,- ասաց Ա. Ջանջուղազյանը:

Ընդ որում՝ խնդիրը չի վերաբերում միայն ֆինանսների նախարարությանը: Ատոմ Ջանջուղազյանի նշեց, որ ի պաշտոնե նախարարությունը ստիպված է եղել նույն խնդիրները տեսնել և բացահայտել նաև մյուս գերատեսչություններում:

«Ենթադրվում է, որ իրենց մոտ էլ կլինեն այդպիսի փոփոխություններ: Մենք մշտապես բողոքում ենք նրանից, որ պետական համակարգում աշխատավարձերը ցածր են, իսկ ցածր են նաև այն պատճառով, որ բաշխման համակարգն անարդյունավետ էր: Այս կրճատումներն, իհարկե, կազդեն աշխատողների աշխատավարձերի բարձրացման վրա: Միայն իմ ասած ղեկավար կազմի կրճատման արդյունքում նույն բյուջեի սահմաններում մոտ 20-22 տոկոսի լրացուցիչ վճարելու հնարավորություն ենք տեսնում»,- նշեց նախարարի պաշտոնակատարը: