Մենք պետք է խորհրդարանում փորձենք դառնալ 2-րդ բևեռը. Գարեգին Չուգասզյան

Tert.am-ի հետ  հետ զրույցում «Սասնա ծռեր»  կուսակցության քարտուղարության անդամ Գարեգին Չուգասզյանն անդրադառնում է դեկտեմբերին ԱԺ արտահերթ ընտրություններում կուսակցության հավակնություններին, դաշինք կազմելու հնարավորություններին և այլ հարցերի:

-Պարո՛ն Չուգասզյան այսօր մամուլը գրել էր, որ  «Սասնա ծռեր» կուսակցության առաջին եռյակում լինելու է նաև  «Երկիր ծիրանի»  կուսակցության նախագահ Զարուհի Փոստանջյանը:

- Եթե չի լինում հղում, աղբյուր, ապա նման լուրերը չենք մեկնաբանում, այդպես ենք որոշել, որովհետև ամեն տեսակ լուր հիմա կարող է լինել: Տարբեր աբսուրդային բաներ ենք լսում:

-Վերջին շրջանում մոդայիկ են դարձել 4-րդ և 2-րդ ուժ արտահայտությունները: Կան ուժեր, որոնք հայտարարում են, որ իրենք են լինելու ՔՊ-ից հետո 2-րդ ուժը:

-Մենք պետք է խորհրդարանում փորձենք դառնալ 2-րդ բևեռը:

-Անհամաչափ, երևի թե:

-Բնականաբար, հեղափոխությունից հետո հասկանալի է, որ այն առաջնորդած քաղաքական ուժն ունի որոշակի առավելություն: Սա հասկանում ենք, գնահատում և գիտենք, որ ժողովուրդն էլ է այդպես մտածում: Եվ, բնականաբար, չենք հավակնում, այսպես ասած, առաջինը լինելուն այս ընտրություններում:

-Ձեր ցուցակի վրա աշխատո՞ւմ եք, մե՞ծ ցուցակ է:

-Այո, աշխատում ենք:

-Դաշինք հնարավո՞ր է:

-Հնարավոր է, առայժմ որևէ տարբերակ չենք մերժել:

-Ովքե՞ր են ընդգրկված, ի՞նչ սկզբունքներով է կազմվում այն. արվեստագետներ, ազատամարտիկներ:

-Առայժմ շուտ է խոսել: Մեր ներսում կան քննարկումներ՝ որոշակի սկզբունքներով, դրա մասին ևս առայժմ չենք արտահայտվում: Իհարկե,  կլինեն, բայց անուններ չեմ տալու:

-Իսկ, օրինակ, հարցումներ կա՞ն, քանի որ «Սասնա ծռերը» մի փոքր յուրահատուկ կուսակցություն է, ովքե՞ր, ի՞նչ շրջաններ են ձեր տեսակետները կիսում:

-Մեր համակիրները բնակչության բոլոր խավերում կան: Հասարակության տարբեր ներկայացուցիչներ միշտ էլ ընդգրկված են եղել թե՛ «Սասնա ծռերում», թե ՛ «Հիմնադիր խորհրդարանում»:

- Եթե նոր Ընտրական օրեսնգիրքը չանցնի, կմասնակցե՞ք ընտրություններին: Նաև՝ կա՞ մտավախություն:

-Հասկանալի է, թե այդ ընտրակարգն ինչի համար է ստեղծվել, մենք շատ լավ գիտակցում ենք, որ թե՛ Սահմանադրությամբ, թե՛ Ընտրական օրենսգրքով ամեն ինչ նախատեսված էր օլիգարխական համակարգն աշխատեցնելու համար, և այդ հին Ընտրական օրենսգիրքը  «կարված է» օլիգարխիայի համար: Ինչ վերաբերում է հինը մնալուն, հինը մնա՝ կմասնակցենք հնով: Բոլոր դեպքերում մասնակցում ենք:

-Համաներման հետ կապված. «Սասնա Ծռեր» կուսակցության անդամ, փաստաբան Արայիկ Պապիկյանը նշեց, որ «Սասնա Ծռերին» վերաբերող այն դրույթը, որ եթե պատանդառուն կամ տուժողն առարկեն ՊՊԾ գունդը գրաված անձանց նկատմամբ համաներում հայտարարելուն, ապա համաներման կիրառումը կարող է տարընթերցման տեղիք տալ: Ես կարծում եմ՝ և´ իրավական, և´ քերականական առումով այն խմբագրման կարիք ունի և  կարող է առաջանալ ՍԴ դիմելու անհրաժեշտություն:

-Համաներման տեքստի վերաբերյալ լուրջ  առարկություններ ունենք և Արայիկ Պապիկյանի մանսագիտական կարծիքն  ամբողջությամբ արտահայտում է մեր կարծիքը: