Դիլիջանում կգործի ԱՊՀ երիտասարդ առաջնորդների միջազգային դպրոցը

Դիլիջանում հոկտեմբերի 29-ից նոյեմբերի 3-ը կգործի ԱՊՀ երիտասարդ առաջնորդների միջազգային դպրոցը: Այսօր դպրոցի բացմանը դպրոցի տնօրեն Գոհար Ղումաշյանը  նշեց, որ Երիտասարդ առաջնորդների միջազգային դպրոցին մասնակցելու է ավելի քան 70 մասնակից ԱՊՀ երկրներից:

«Դպրոցը կլինի այն ավանդական հարթակը, որտեղ տարին մեկ, նույնիսկ մի քանի անգամ կարող եք հավաքվել և քննարկել ձեռք բերված լիդերության հատկանիշները, և որը կնպաստի երիտասարդ լիդերների միջազգային համագործակցությանը»,- ասաց նա:

Նա ներկայացրեց ՌԴ երիտասարդության հարցերով դաշնային ծառայության ղեկավարի ողջույնի խոսքը: Գոհար Ղումաշյանն ասաց, որ դեռ օգոստոսի մեկից մասնակցության հայտեր են ստացել և արդյունքում հայտերի թիվը հինգ հարյուրից ավելի է կազմել, որոնցից 70 մասնակից է ընտրվել;  

«Մասնակիցները կներկայացնեն իրենց ծրագրերը, բոլորի հետ աշխատելու են, որպեսզի այդ ծրագրերն է՛լ ավելի կատարելագործեն: Վերջին օրը կընտրենք լավագույն ծրագիրը, որը կստանա դրամական պարգևատրում հովանավորների կողմից՝ հազար դոլարի չափով»,-ասաց նա և նշեց, որ ծրագրերը կներկայացվեն ներդրողներին, և նրանք կընտրեն այն ծրագիրը, որը կֆինանսավորեն մինչև վերջ:

ՀՀ-ում ՌԴ դեսպանատան խորհրդական դեսպանորդ Ալեքսեյ Սինեգուբովը շնորհավորեց երիտասարդներին մասնակցության համար և ընթերցեց ՌԴ արտաքին գործերի նախարար Սերգեյ Լավրովի ողջույնի խոսքը:

ՀՀ-ում Բելառուսի արտակարգ և լիազոր դեսպան Իգոր Նազարուկը ողջունեց երիտասարդներին և նշեց, որ նախանձում է նրանց, քանի որ բոլորը ցանկանում են լինել երիտասարդ, ունենալ մեծ հնարավորություններ, հեռանկարներ:

«Դուք իսկապես լիդեր եք, մնում է այն, ինչ ծրագրել եք, իրականացնեք, իսկ դպրոցը նրա համար է, որ սովորեցնի, թե դա ինչպես անել մեծ արդյունավետությամբ»,- ասաց նա:

Անդրադառնալով Մինսկի խմբի աշխատանքներին, որը զբաղվում է նաև Արցախյան հակամարտությամբ, դեսպանն ասաց. «Ես համոզված եմ, որ հենց երիտասարդությունը կլինի այն առաջնահերթ օղակը, որ ակտիվ առաջ կտանի մարդասիրության և հասարակության պոզիտիվ զարգացման միտքը»,- ասաց նա:

Մասնակիցներին ողջունեց նաև դպրոցի ծրագրային մենեջեր, Սիլիկոնյան հովտի լիդերության մասնագետ Ռուզաննա Ատասունցը:

Մասնակիցները նշեցին, որ իրենց առաջ խնդիր էր դրված՝ գտնելու երկրում սոցիալական, քաղաքական հիմնահարցեր և դրանք ներկայացնելու: Մասնակիցների ընտրած թեմաներն էին մարդկային իրավունքները, գենդերային խնդիրները, բարեգործությունը և այլ խնդիրներ:

Նշենք, որ ԱՊՀ երիտասարդ առաջնորդների միջազգային դպրոցի կազմակերպիչներն են «Հայ-ռուսական Երիտասարդական Միասնություն» հասարակական կազմակերպությունը, ՖԳԲՈՒ «Երիտասարդական ռեսուրսային կենտրոն»-ը և ՌԴ երիտասարդության հարցերով դաշնային ծառայությունը` ՀՀ-ում ՌԴ դեսպանատան և Երևանում Գիտության և մշակույթի ռուսական կենտրոնի աջակցությամբ:

Սեմինարները վարելու են ԱՊՀ երկրներից հրավիրված արհեստավարժ մասնագետները, կայացած ու հաջողակ ընկերությունների հիմնադիրները, հայտնի գործարարները:

ԱՊՀ երիտասարդ առաջնորդների միջազգային դպրոցի հիմնական բանախոսներն են Հայ-Ռուսական համալսարանի ռեկտոր, ՀՀ նախկին վարչապետ Արմեն Դարբինյանը, UWC Դիլիջան միջազգային  դպրոցի տնօրեն Գաբրիել Էռնեստո Աբադ Ֆեռնանդեսը, Վիվասել-ՄՏՍ ընկերության տնօրեն Ռալֆ Յիրիկյանը, FAST  հիմնադրամի տնօրեն Արմեն Օրուջյանը, ArmTab ընկերության հիմնադիր տնօրեն Վահան Շաքարյանը, Կովկաս ինստիտուտի տնօրեն Ալեքսանդր Իսկանդարյանը, «Փյունիկ ՖԱ» սեփականատեր, գործարար Արթուր Սողոմոնյանը:

Դպրոցի գործընկերն են Հայ-ռուսական համալսարանը, Ալեքսանդր Գորչակովի անվան հանրային դիվանագիտության աջակցության հիմնադրամը, ՀԷՑ-ը, «Ալեքս Տեքստիլ» ընկերությունը, «Գուրմե Դուրմե» ընկերությունը, «Ռենեսանս» թեյատունը: