Կգումարվի Ազգային-եկեղեցական ժողով՝ «Հայոց Եկեղեցին 21-րդ դարում. ներկան եւ ապագան» խորագրով

ОБЩЕСТВО 2 Ноябрь, 2018 17:23

Հոկտեմբերի 30-ից նոյեմբերի 2-ը Մայր Աթոռ Սուրբ Էջմիածնում, նախագահութեամբ Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի, տեղի ունեցան Գերագոյն հոգեւոր խորհրդի ընդլայնուած կազմով հերթական ժողովի նիստերը:

Ինչպես հայտնում են Մայր աթոռի մամուլի ծառայությունից, ամենայն Հայոց Կաթողիկոսի ողջոյնի եւ օրհնութեան խօսքից յետոյ որպէս ատենապետեր ժողովը վարելու հրաւիրուեցին ԱՄՆ Հայոց Արեւմտեան թեմի առաջնորդ Գերաշնորհ Տ. Հովնան արքեպիսկոպոս Տէրտէրեանը եւ Արեւմտեան Եւրոպայում Հայրապետական պատուիրակ եւ Վատիկանում Հայ Եկեղեցու ներկայացուցիչ Գերաշնորհ Տ. Խաժակ արքեպիսկոպոս Պարսամեանը:

Մինչ օրակարգում ընդգրկուած հարցերի քննութիւնը խորհուրդը հաստատեց նախորդ` 2018 թ. մայիսի 29-ից յունիսի 1-ը գումարուած ԳՀԽ ժողովի արձանագրութիւնը:

Ժողովի առաջին օրը Գերագոյն հոգեւոր խորհուրդը քննարկեց առաջիկայում Ազգային-եկեղեցական ժողով գումարելու հարցը, համաձայն Գերագոյն հոգեւոր խորհրդի նախորդ ժողովների քննարկումների արդիւնքում կայացուած որոշումների: Այս կապակցութեամբ զեկոյց ներկայացրեց Մայր Աթոռի դիւանապետ Գերաշնորհ Տէր Արշակ եպիսկոպոս Խաչատրեանը:

Քննարկումների արդյունքում որոշուեց առաջիկայ տարի գումարել Ազգային-եկեղեցական ժողով «Հայոց Եկեղեցին 21-րդ դարում. ներկայ եւ ապագայ» խորագրով: Քննութեան առնուեցին ժողովի օրակարգում ընդգրկուելիք հարցերը:

Ժողովի երկրորդ նիստին Եկեղեցի-պետութիւն յարաբերութիւնների մասին զեկոյց ներկայացրեց Մայր Աթոռի Վարչայ-տնտեսական բաժնի տնօրէն Գերաշնորհ Տէր Մուշեղ եպիսկոպոս Բաբայեանը: Ընդգծուեց անհրաժեշտութիւնը Եկեղեցի-պետութիւն յարաբերութիւններն ընդլայնելու կրթական, մշակութային, սոցիալական, առողջապահական եւ տնտեսական ոլորտներում` յուսալի երաշխիքներ ապահովելով մեր ազգային-հոգեւոր անվտանգութեան եւ հայ ինքնութեան պահպանութեան համար:

ԳՀԽ անդամները գոհունակութեամբ ընդունեցին զեկոյցը` թելադրելով Մայր Աթոռի պատկան կառոյցներին շարունակել զօրացնել գործակցութիւնը պետութեան հետ` ի խնդիր հայրենիքի պայծառութեան եւ մեր ժողովրդի շէն ու բարօր կեանքի:

Կոմիտաս վարդապետի եւ Յովհաննէս Թումանեանի ծննդեան 150-ամեակի յոբելեանների առնչութեամբ զեկոյցով հանդէս եկաւ Մայր Աթոռի Թանգարանների տնօրէն Արժանապատիւ Տէր Ասողիկ քահանայ Կարապետեանը` տեղեկացնելով, որ յոբելեանների կազմակերպման համար ստեղծուել են պետական յանձնաժողովներ Մայր Աթոռի ներկայացուցչի մասնակցութեամբ: Լսելով ներկայացուած զեկոյցը` Գերագոյն հոգեւոր խորհուրդը կարեւոր նկատեց, որ յիշեալ յոբելեանները պատշաճօրէն նշուեն նաեւ Մայր Աթոռում եւ Հայ Եկեղեցու աշխարհասփիւռ թեմերում:

Ժողովի երրորդ օրը Հայոց Եկեղեցու գործառնութիւնների բարելաւման ծրագրի ընթացքի վերաբերեալ զեկոյց ներկայացրեց «Դաւիդեան» հիմնադրամի նախագահ եւ բարեգործ Ասոյ Դաւիդեանը։ Վերջինս լուսաբանութիւններ տուեց ԳՀԽ անդամներին դեռեւս 2016 թուականին սկզբնաւորուած ծրագրի իրականացման հերթական փուլի առնչութեամբ:

Ընդունելով զեկոյցը` ժողովականներն իրենց գնահատանքը յայտնեցին տիար Ասոյ Դաւիդեանին Եկեղեցուն մատուցուող օգտաշատ ծառայութեան եւ կարեւոր յանձնառութեան համար։

ԳՀԽ անդամները քննութեան առան Եւրոպայում եկեղեցական կառոյցների վերակազմակերպման հարցը: Խնդրի մասին տեղեկութիւններ փոխանցեց Մայր Աթոռի դիւանապետ Գերաշնորհ Տէր Արշակ եպիսկոպոս Խաչատրեանը` ներկայացնելով Եւրոպայի երկրների հայկական համայնքների համայնապատկերը` հայկական բնակչութեան վիճակագրութեամբ եւ եկեղեցական-վարչական կառուցուածքում դրանց կարգավիճակով:

Գերագոյն հոգեւոր խորհուրդը ողջունեց Եւրոպայում եկեղեցական կեանքի վերակազմակերպման նախաձեռնութիւնը` ի խնդիր Եւրոպայում ինչպէս աւանդական համայնքների, այնպէս եւ նորակազմ համայնքների հոգեւոր-եկեղեցական կեանքի պայծառութեան:

Ժողովն աւարտուեց Ամենայն Հայոց Կաթողիկոսի օրհնութեան խօսքով: Նորին Սրբութիւնը մասնաւոր իր գնահատանքը յայտնեց ԳՀԽ անդամներին եւ նիստերին մասնակից հրաւիրեալ եկեղեցականներին` կարեւորելով քառօրեայ քննարկումների արդիւնքում առնուած որոշումները, որոնք պիտի ծառայեն Մայր Աթոռի հոգեւոր առաքելութեան առաւել արդիւնաւէտ իրագործմանը:

Ժողովը փակուեց հայրապետական «Պահպանիչ» աղօթքով: