Հայկական կողմը պետք է աշխատեր ՀՀ-ին աջակցող կոնգրեսականների և սենատորների հետ, սատարեր նրանց քարոզարշավում․ Սուրեն Սարգսյան

«Ես կարծում էի, որ թե՛ համայնքը, թե՛ պետությունը՝ թեկուզ հենց համայնքի միջոցով պետք է օժանդակեր թեկնածուներին տարբեր հնարավոր միջոցներով և մեթոդներով: Բայց ոչ հրապարակային ձևով աջակցության մասին ինչ-որ հայտարարություն եղավ, ոչ էլ, իմ իմանալով, ներքին խողովակներով է աջակցություն եղել: Իհարկե, հանդիպումներ կազմակերպել են օրինակ՝ Դենի Թարքանյանի  հետ: Դեսպանն է նրա հետ մշտապես կապի մեջ եղել, բայց չգիտեմ, թե արդյոք նրան ինչ-որ աջակցություն տրվել է»,- ասաց նա՝ մատնանշելով, որ պետք է նկատել, որ Դենի Թարքանյանին անվերապահ աջակցություն է հայտնել ԱՄՆ նախագահ Դոնալդ Թրամփը:

Հիշեցնենք, որ նոյեմբերի 6-ին Միացյալ Նահանգներում տեղի կունենան 100-տեղանոց Սենատի մեկ երրորդի և 435-տեղանոց Ներկայացուցիչների տան ամբողջ կազմի ընտրությունները: ԱՄՆ-ում դրանք անվանում են «միջանկյալ ընտրություններ», քանի որ քվեարկությունը համընկնում է չորս տարով ընտրվող նախագահների պաշտոնավարման երկրորդ տարվա ավարտին: Ընտրություններում պայքարում են Դեմոկրատական և Հանրապետական կուսակցությունները:

Սուրեն Սարգսյանի կարծիքով՝  հայ համայնքի՝ ամերիկյան ընտրություններում ակտիվություն չցուցաբերելու հարցը պայմանավորված է դրանց կարևորություն չտալով:

«Մենք պետք է Ադրբեջանից օրինակ վերցնենք: Հրապարակել ենք գրաֆիկ, որտեղ երևում է Ադրբեջանի ազդեցությունը Միացյալ Նահանգներում: Պետք է ասեմ, որ կան կոնգրեսականներ և սենատորներ, որոնք ակտիվորեն աշխատում են Ադրբեջանի հետ: Ադրբեջանցիներն օգտագործում են և՛ օրինական, և՛ ոչ օրինական ճանապարհները: Պետք է հայկական կողմն էլ աշխատեր Հայաստանին աջակցող կոնգրեսականների և սենատորների հետ, սատարեր նրանց քարոզարշավում»,- ասաց նա:

Սուրեն Սարգսյանի նկատառմամբ՝ Հայաստանն ակտիվություն չի դրսևորել Կոնգրեսի ընտրություններում՝ որոշակի ազդեցություն ունենալու համար, քանի որ ներքաղաքական հարցերով է զբաղված, ինքն էլ ընտրությունների է պատրաստվում: «Ֆիզիկապես ժամանակ չի մնում այդ հարցերով զբաղվելու: Հուսամ, որ առաջնահերթություններով է պայմանավորված»,- ասաց նա:

Դիտարկմանը, թե Կոնգրեսի հայկական հարցերով հանձնախմբից այս ընտրություններին մի շարք ակտիվ անդամներ չեն մասնակցություն ընտրություններին, դա ինչ ազդեցություն կունենա հայկական հարցերը ԱՄՆ-ում բարձրացնելու հնարավորության վրա, միջազգայնագետը պատասխանեց․ «Պատկերը շատ չի փոխվի: Հայամետ կոնգրեսականներից մի քանիսը կընտրվեն, և կձևավորվի հայկական հարցերով հանձնախումբը, որն ավանդաբար ձևավորվում է ԱՄՆ կոնգրեսում: Այստեղ վտանգներ չեմ տեսնում, ամբողջությամբ ռեսուրսը կորցրել ենք, և հայկական հարցերը չեն քննարկվի»:

Իսկ ընտրություններից հետո, ըստ Սուրեն Սարգսյանի, ճիշտ կլիներ, որ հայ համայնքը սատարեր և աշխատեր և՛ դեմոկրատների, և՛ հանրապետականների հետ: «Այստեղ փոփոխություններ անել պետք չէ, և պետք է ակտիվ աշխատել երկու քաղաքական ուժերի հետ էլ, որովհետև Միացյալ Նահանգների քաղաքական համակարգն այնպիսին է, որ նույնիսկ եթե իշխանություն չունես, այդուհանդերձ ընտրովի մարմինների միջոցով կարող ես ճնշում գործադրել գործադիր իշխանության վրա: Այդ ճանապարհով էլ պետք է առաջ շարժվենք»,- ասաց նա:

Նևադայի նահանգից առաջադրված հայազգի Դենի Թարքանյանի հաղթանակը ընտրություններին, միջազգայնագետի գնահատմամբ, կարող է դրական ազդեցություն ունենալ հայկական հարցերի բարձրացման վրա։

«Նա մի գործիչ է, որ սերտորեն կապված է իր պատմական հայրենիքի հետ: Նրա հայրը հայտնի սպորտային գործիչ և մարզիչ էր: Նրա կապը հայրենիքի հետ կլինի, երբ նա ընտրվի կոնգրեսականի պաշտոնում: Նա իհարկե, շատ օգտակար կլինի մեզ համար, որովհետև կունենա շատ լսելի և ուժեղ ձայն և կկարողանա ուղիղ կապ հաստատել գործող քաղաքական թիմի հետ, որովհետև դեռ երկու տարի նախագահը պաշտոնավարելու է Միացյալ Նահանգներում»,- ասաց նա:

Սուրեն Սարգսյանի նկատառմամբ՝ Կոնգրեսի ընտրությունների արդյունքում հայ-ամերիկյան հարաբերություններում հնարավոր զարգացումները կախված են լինելու հայկական կողմի հետագա աշխատանքից ԱՄՆ-ի օրենսդիր և գործադիր մարմինների հետ:

Նրա դիտարկմամբ, իհարկե, ավելի արդյունավետ կլիներ, եթե հաղթեին այն թեկնածուները, որոնց կաջակցեին հայերը, բայց հիմա էլ, ոչինչ կորած չէ, կարելի է աշխատել արդեն ընտրվածների հետ: «Որ կուսակցությունն էլ մեծամասնություն ունենա ընտրությունների արդյունքում, նրա հետ պետք է ակտիվ աշխատել: Պետք է սպասենք, ընդամենը երկու օրից հասկանալի կլինի, թե ինչ փոփոխություններ են լինելու: Կարծում եմ՝ Կոնգրեսում մեծամասնություն կվերցնեն դեմոկրատները, իսկ Սենատում՝ հանրապետականները»,- ասաց նա: