Նիկոլ Փաշինյանն էլ իր մտքի մեջ ինձ հետ համաձայն կլինի, որ խորհրդարանում բացարձակ մեծամասնությունը ճահիճ կստեղծի․ Լևոն Շիրինյան

Արտահերթ խորհրդարանական ընտրություններին ընտրացուցակում 6-րդ համարը ներկայացնող «Քրիստոնեա-ժողովրդական վերածնունդ» կուսակցության պատգամավորության 1-ին համարում առաջադրված Լևոն Շիրինյանը Tert.am-ի հետ զրույցում ներկայացրել է, թե ինչպես են պատրաստվում մասնակցել քարոզարշավին, ինչ է առաջարկում ընտրողներին, որտեղ են իրենց պատկերացնում խորհրդարանում:

-Պարո՛ն Շիրինյան, մի քանի օր է մնացել, որ խորհրդարանական ընտրությունների քարոզարշավի պաշտոնական մեկնարկը տրվի: Ձեր ուժը ի՞նչ տրամադրվածություն ունի ընտրապայքարի նկատմամբ:

- Մենք գիտության մարդիկ ենք, մշակութաբանության և այլ ոլորտների մասնագետներ և ցանկացանք մտնել ընտրապայքարի մեջ, քանի որ նպատակ ունենք քաղաքականացնել և գաղափարայնացնել ընտրարշավը: Ցանկանում ենք այս ճահճից դուրս գալ, դրան հաղորդել իդեալիզմ: 

Մենք դրա համար էլ երբեմն օգտագործում ենք աստվածաշնչյան Հայաստան, արարչագործություն արտահայտությունները, որ մարդիկ մի քիչ վեհություն զգան: Հեղափոխությունն ինքը ապացուցեց, որ դրանք դինամիկ, արագ զարգացող մի բան են ժողովրդի համար, որովհետև գնում է դարերի խորքը: Մենք լիբերալ ուժ ենք, իհարկե, բայց մեր ազատականությունը չափավոր է: Գրեթե բոլոր ոլորտների համար ունենք մշակումներ, առաջարկներ՝ պետականության մոդելից մինչև տնտեսության վերակառուցում:

Ես համոզված եմ, որ պետությունը կարող է զարգանալ սեփական հումքի, արժեհամակարգի վրա: Ընտրարշավը մենք տանելու ենք այդ կոնցեպտների հիման վրա:

-Ցանկանում եք, որ ընտրապայքարում գաղափարները մրցակցեն: Ձեր կարծիքով՝ մնացած ուժերը և՞ս գաղափարական պայքարի կողմնակից են:

- Դուք պատրատվո՞ւմ եք ամբողջ քարոզարշավին ակտիվ լինել: Ունե՞ք բավարար ռեսուրսներ քարոզարշավն անցկացնելու համար:

-Ունենք ռեսուրսների ոչ բավարար վիճակ․․․ Հասկանալի է, որ չունենք, բայց դա կփոխարինենք ժողովրդի տարբեր սեգմենտներում եղած մեր նկատմամբ համակրանքով: Օրինակ՝ ես դիմել եմ տաքսու վարորդներին, ովքեր շարունակ «Լրատվական ռադիոյի» հաղորդաշարի իմ ունկնդիրներն են, իմ ուսանողներին, կոլեգաներին, որոնք կրթության, գիտության, բիզնեսի ոլորտի մարդիկ են: Եթե նրանց բոլորին համատեղենք, կարծում եմ, լավ արդյունք կունենանք: 

Օրինակ՝ առավոտյան տաքսու վարորդներն ինձ ասացին, որ եթե պլակատները տարածելու խնդիր ունենք, կարող ենք տալ իրենց, կտարածեն: Մարդիկ սովորաբար երակով էլ, սրտով էլ զգում են անկեղծությունը: Կօգտագործենք բոլոր հնարավոր միջոցները:

Մենք մի խնդիր էլ ունենք այս ընտրարշավները էժանացնելու, գրեթե զրոյացնելու: Պարզ է, թե ինչու է միշտ այդպես եղել, որովհետև պարզ է, որ փողի հաղթանակը բերում է օլիգարխիայի հաղթանակի: Այո, էժան պետք է լինի քարոզարշավը, և ժողովուրդն էլ պետք է տեսնի, ով շատ փող ծախսի, նրա դեմ քվեարկի: Բորսա չէ, ընտրություն է:

-Պարո՛ն Շիրինյան, այս ընտրություններում ընդդիմության հետ կապված կան վերապահումներ․շատերը որպես այդպիսին չեն ընկալվում: Դուք Ձեզ ընդդիմություն համարու՞մ եք, ինչի՞ն եք ընդդիմանալու:

-Այս ընտրություններին ընդդիմություն չի լինելու: Ամեն ընտրություն ունի առանձնահատկություն: Այս անգամ էլ ընդդիմություն չի լինելու: Վստահ եմ, որ «Հանրապետականն» էլ չի անցնելու: Նա է իրեն ընդդիմություն համարում: Ես հարց եմ տալիս նրանց՝ ինչի՞ն են նրանք ընդդիմություն․ ճահիճի վերածած պետականության վերականգնումի՞ն են նրանք ընդդիմանում: Այն ռեակցիոն ընդդիմություն է: 

Մենք, օրինակ, մեզ հայտարարել ենք, և դա այդպես է՝ այլընտրանք ենք, ընդդիմություն՝ ոչ: Մենք հեղափոխության ակտիվ մասնակիցներ ենք եղել, ու՞մ ենք ընդդիմություն: Հակառակը, մենք փորձում ենք ռեալիզացնել հեղափոխության այն իդեալները, որոնց մշակման մեջ նաև մենք դեր ունենք: 

Ինձ թվում է, որ Ազգային ժողովում մենք ոչ թե դիմության կամ ընդդիմության խնդիր ունենք, այլ այլընտրանքային մոտեցումների, ծրագրերի կենսական քննարկումների: Քննարկումները կլինեն այն համակարգը, որը կլինի զարգացման ճանապարհը: Եթե Դուք այլընտրանք եք, չի նշանակելու, որ ասելու եք այն, ինչ ուրիշն է ասելու: Դուք կարող եք քննադատել, կարող եք կողմ լինել: 

-Իսկ Ձեզ մրցակից ու՞մ եք համարում:

-Ես այդ հարցին կարող եմ պատասխանել ընտրարշավի 4-5 օրերին: Առայժմ նկատում եմ, որ կառույցները հետախուզական մարտի մեջ են: Ես այսօրվանից սկսել եմ կոնցեպցիաների շարադրանքը․ ով մեզ հետ մրցակցի, ես էլ նրա հետ կմրցակցեմ:

Իմ խնդիրը քաղաքական ուժերի դեմ աշխատելը չէ, այլ ժողովրդի հետ աշխատելն է: Մեզ հետ ով կմրցակցի, իրենց խնդիրն է: Մենք լիբերալ  ենք, չափավոր ազատականության կողմնակիցն ենք: Մեր տեսակետը ազգային պահպանողականությունն է, և դա էլ հետևողականորեն կներկայացնենք մեր ժողովրդին, ընտրողին:

-Ո՞ր հարցերում են Ձեր տեսակետները կտրականապես տարբերվում  մնացած ուժերի տեսակետներից:

-Մեր պատկերացումները պառլամենտարության վերաբերյալ տարբերվում են մյուսների տեսակետներից: Մենք պետք է հասկանանք, որ նախագահական համակարգը չկա և եթե չկա, ապա պառլամենտը պետք է լինի բալանսավորված, հավասարակշռված: Մահացու խնդիր է խորհրդարանում բացարձակ մեծամասնությունը: Դա անթույլատրելի է: Եթե այդպես լինի, ապա իշխող ուժը «Հանրապետականի» պես կսկսի դակել օրենքները: Երկրորդ խնդիրը կա․ որպեսզի վերափոխումներ լինեն, վարչապետը պետք է ունենա մեծամասնություն: Մեծամասնություն՝ այո, բայց բացարձակ մեծամասնություն՝ ո՛չ: Որպեսզի վարչապետը կարողանա կառավարել երկիրը, նա պետք է քննարկումներ, բախումներ ունենա այլ ուժերի հետ, և դա կառաջացնի այն խորհրդարանը, որը մեզ պետք է:

Կարծում եմ՝ Նիկոլ Փաշինյանն էլ իր մտքի մեջ ինձ հետ համաձայն կլինի, որ խորհրդարանում բացարձակ մեծամասնությունը ճահիճ կստեղծի: 

-Որքանո՞վ եք հավանական համարում խորհրդարան Ձեր անցնելը:

-Ռեալ է այն: Չեմ ասում, որ շատ մեծ թիվ կունենանք, բայց նույնիսկ 5 տոկոսի շեմը հաղթահարելու դեպքում մենք կունենանք արդյունք, որտեղ կոնցեպցիաներ կշարադրենք: Այդ դեպքում քանակի հարցը դուրս է գալիս: Այդ դեպքում կունենանք ահռելի ազդեցություն, կապ չունի, թե քանի հոգի կլինենք, նույնիսկ ամբիոնից մի սկզբունքային ելույթը կպարտավորեցնի տեղաշարժվել: Ես հույս ունեմ, որ շատ արագ մենք կմեծանանք, որովհետև մենք հայ ժողովրդի կենսական շահերն արտացոլող հոսանք ենք:

-Հիմա քննադատվում է, որ իշխանությունը, դեռ քարոզարշավը չմեկնարկած,  կիրառում է վարչական ռեսուրսներ, Նիկոլ Փաշինյանը, որպես վարչապետ, մարզերում քարոզարշավ է իրականացնում: Դուք նման խնդիրներ տեսնու՞մ եք:

- Տեսնում ենք, նկատում ենք, բայց իմ գործընկերները, ովքեր կան նման գործընթացներում, ինձ ասում են, որ հրահանգ կա բոլոր կառույցներին, որ չներառվեն ընտրական գործընթացներում: Ռեսուրսը պաշտոնատար անձանց քարոզարշավին ներկա լինելն է: Բայց գործող օրենքը թույլ է տալիս դա․ նախարարը կարող է ասել, որ ելույթ է ունենում, բայց դա վարչական ռեսուրսի կիրառում չէ: Այսինքն՝ օրենքի խախտում չենք կարող արձանագրել, բայց բարոյական մասով ամեն ինչ պարզ է: Եթե առաջարկվող օրենքը լիներ, ապա կունենային բնականոն զարգացման հնարավորություն: Եթե եղած վիճակը սա է, մենք էլ պարտավոր ենք ավելի լավ անցկացնել ընտրարշավը:

-Ձեզ համար ո՞րը կարող է համարվել լավագույն քարոզարշավը:

-Երբ  քաղաքական ուժերն իրենց արժեհամակարգով, իրենք տեսական մշակումներով, առաջարկություններով հանդես կգան: Մենք գիտենք, որ երկիրը խորը քաղաքական ճգնաժամ է ապրում: Հեղափոխության դետալները պետք է ռեալիզացվեն, որ արդյունք ունենանք: Մենք դա չենք տեսնում այսօր: Պետական վարչամեքենան պետք է նորոգվի և այլն, և այլն: Այս պայքարում ես ակնկալում եմ մրցույթ, մրցույթ տեսակետների, թե որն է ելքը: