Փաշինյանը պետք է գիտակցի, որ ՀՅԴ-ն թշնամի չէ, Հրանտ Մարգարյանի հետ բանավեճը պետք է շարունակվի առողջ հիմքի վրա․ ՀՅԴ բյուրոյի անդամ

«Դաշնակցությունը» մեծ կուսակցություն է. չկա Սփյուռքի և Հայաստանի «Դաշնակցություն». Tert.am-ի հետ զրույցում անդրադառնալով Նիկոլ Փաշինյանի հայտարարություններին՝ քարոզարշավին մասնակցող ՀՅԴ-ին և մասնավորապես պատգամավորության թեկնածու Հրանտ Մարգարյանին ուղղված քննադատությանը՝ այսպես արձագանքեց ՀՅԴ բյուրոյի անդամ (Ֆրանսիա) և Ֆրանսիայի հայկական ընկերությունները համակարգող խորհրդի նախագահ Մուրադ Փափազյանը:

««Դաշնակցությունը» միշտ պաշտպանել և շարունակում է պաշտպանել արժեքները, որոնք միացնում են հայ ազգը: Համահայկական ընտանիք լինելով՝ «Դաշնակցությունը» հետապնդում է և՛ Սփյուռքի պայքարները, և՛ Հայաստանի մարտահրավերները: Եվ, վերջապես, գիտենք, որ բոլոր հարցերը կապված են միմյանց․ Հայ Դատի հետապնդման պայքարը, ցեղասպանության ճանաչումն ու և հայ ժողովրդի իրավունքները, Արցախյան հիմնահարցի լուծումը՝ ի նպաստ հայկական կողմի, Ջավախքի հայության իրավունքները, Սփյուռքի գոյատևումը՝ իբրև արտաքին ուժ Հայաստանի կողքին, Հայաստանի զարգացումը և սոցիալական անարդարության հարցերի լուծում, երկրում հավասարության հաստատման հարցերի լուծումը, աղքատության դեմ աշխատանքը կապված են միմյանց հետ»,- նշեց նա՝ հավելելով, որ թող բոլորը ուրախանան, որ այսօր աշխարհի բոլոր վայրերում «Դաշնակցությունը» կա:

Ըստ Մուրադ Փափազյանի՝ ՀՅԴ-ն միշտ եղել է անկախ Հայաստանի «անպաշտոն» և լրացուցիչ դիվանագիտական ուժը: «Նիկոլ Փաշինյանը պետք է գիտակցի, որ «Դաշնակցությունը» թշնամի չէ: Ընդհակառակը, այդ ուժն է, որ եթե գոյություն չունենար, կարիք պիտի լիներ այն ստեղծելու»,- ասաց նա:

Քարոզարշավի մասին խոսելիս էլ Ֆրանսիայի հայկական ընկերությունները համակարգող խորհրդի նախագահն էլ նշեց, որ ընտրապայքարը ժողովրդավարության հաստատման շատ կարևոր միջոց պետք է լինի, նաև առողջ և կառուցողական քաղաքական վեճերի ժամանակն է. «Նիկոլ Փաշինյանի և Հրանտ Մարգարյանի միջև բանավեճը պետք է շարունակվի առողջ հիմքի վրա: Այն հանրային դեբատը, որ Հրանտ Մարգարյանն առաջարկեց Նիկոլ Փաշինյանին, պետք է անպայման տեղի ունենա: Այն ցույց կտա մեր հասունությունը: Ժողովրդի առջև ամենաբարձր մակարդակով կարելի է ներկայացնել զանազան տեսակետներ»,- ասաց նա:

Հիշեցնենք, որ ՀՀ վարչապետի պաշտոնակատար Նիկոլ Փաշինյանն արձագանքել էր ՀՅԴ բյուրոյի ներկայացուցիչ Հրանտ Մարգարյանի հայտարարությանը: «Հարգելի՛ Հրանտ Մարգարյան, Դուք սխալվում եք: Ասում եմ լրջորեն և պաշտոնապես»,- ֆեյսբուքյան իր էջում գրել է Նիկոլ Փաշինյանը:

Վանաձորի հրապարակում ընտրողների հետ հանդիպման ժամանակ էլ ՀՀ վարչապետի պաշտոնակատարը նշել էր, որ ամոթալի հայտարարություններ են հնչում:

«ՀՅԴ բյուրոյի ներկայացուցիչ Հրանտ Մարգարյանը հարցազրույց է տալիս ու ասում, որ մայիսից այս կողմ Հայաստանին զենք չի մատակարարվել: Քիչ է մնում՝ ասեն՝ տղե՛րք, մայիսից այս կողմ Հայաստանին զենք չի մատակարարվել, հարձակվեք, իսկական ժամանակն է, դուք՝ այդ կողմից, մենք՝ այս կողմից: Նախ, ես ուզում եմ հիասթափեցնել ՀՅԴ բյուրոյի ներկայացուցչին, Հայաստանին զենքի մատակարարումն ընթանում է բնականոն, պլանավորված ձևով:

Բայց նաև ուզում եմ ասել. եթե խոսում ենք, եկեք խոսենք, թե ինչ է տեղի ունեցել մայիսից առաջ բանակին զենքի ու սպառազինությունների մատակարարման հետ: Ուզում եմ հավաստիացնել, որ ՀՀ Զինված ուժերը և հայ ժողովուրդը ի հեճուկս ՀՅԴ-ի ներկայացուցչի ու ՀՀԿ-ի պատրաստ են կանգնել մինչև վերջ հայրենիքը պաշտպանելու գործում»,- հայտարարել էր Փաշինյանը:

Հրանտ Մարգարյանն էլ ասել էր, որ չի ցանկանում արձագանքել՝ չցանկանալով իջնել այդ մակարդակի և տոնով բանավեճի: «Խոսակցության պատրաստ եմ, բայց խոսակցության տոնայնությունը, ձևը, ոճն այն մակարդակի է, որ ես չեմ կարող պատասխանել։ Դա, կարծում եմ, ամոթ է և մեր մակարդակի համար չէ։ Մենք չպետք է ընտրապայքարի մակարդակն այդքան իջեցնենք, և մի քանի քվեի համար չարժե այդքան իջնել»,- ասել էր Հրանտ Մարգարյանը։