Ոչ մեկիդ մտքով չանցնի մեր կողմնակիցներին հրավիրել ոստիկանության բաժանմունքներ և ասել՝ մի՛ աշխատեք ՀՀԿ-ի օգտին. Էդուարդ Շարմազանով (տեսանյութ)

ՀՀ ԱԺ նախագահի տեղակալ, ՀՀԿ պատգամավորության թեկնածու Էդուարդ Շարմազանովն այսօր ֆեյսբուքյան ուղիղ եթերում ամփոփեց քարոզարշավի ութերորդ օրը:

«Այսօր ակնհայտ դարձավ մի պարզ բան՝ նեոբոլշևիկյան ռեժիմը՝ Փաշինյանի գլխավորությամբ, բացահայտ խուճապի մեջ է, որովհետև քարոզչություն անելու, իրենց ծրագրերը ներկայացնելու փոխարեն օր օրի ավելացնում են ատելության դոզան, իրականացնում են հակաքարոզչություն, սերմանում են թշնամանք և կիրառում են վարչական ռեսուրս»,-ասաց նա:

Նա հատկանշական համարեց, որ Արտաշատում Նիկոլ Փաշինյանը մեջբերել է Հռոմի սենատոր Կատոն Ավագին, որը Կարթագենի հետ պատերազմի ժամանակ իր յուրաքանչյուր ելույթ ավարտում էր խոսքով, որ Կարթագենը պետք է կործանվի:

«Փաշինյանը կամ նրան հուշողները մոռացել են, որ Կարթագենի կործանումից հետո Հռոմում հանրապետական կարգերը տապալվեցին, և Հռոմը վերածվեց միապետական, դիկտատուրական պետության, որտեղ ոչ թե իշխում էին ժողովրդավարական կարգերը, սենատն ու բազմակարծությունը, այլ իշխում էր միապետի կամքը: Իշխում էր ոչ թե ժողովրդավարությունը, այլ պղծության և համասեռամոլության քարոզը, ամենաթողությունը»,- ասաց նա:

Շարմազանովը նշեց, որ այսօր Փաշինյանը իր հետ քայլածներին կարգում է դեպուտատ և նախարար: «Հորդորս իրեն, որ շատ չուրախանա Կարթագենի կործանումով, որովհետև այսօր մարդկությունը Հանիբալին հիշում է որպես ճշմարիտ հերոս, իսկ Ներոնին՝ որպես ստահակ: Մի՛ ոգևորվեք, ժամանակը բոլորիս գնահատականը կտա»,- ասաց նա:

Էդուարդ Շարմազանովը նկատեց, որ այսօր հանրապետությունում՝ Լոռու մարզում, օդում կախված լուրեր կան, որ ով մի քիչ ակտիվ փորձում է աշխատել ՀՀԿ թեկնածուների օգտին, հրավիրվում են ոստիկանական բաժիններ:Բացատրական զրույցներ են անում՝ չարժե աշխատել ՀՀԿ-ի համար: Ձեր ի՞նչ գործն է, դուք ի՞նչ իրավունք ունեք Հայաստանի արժանապատիվ քաղաքացիներին ասել, թե՝ քանի ընտրությունը չի ավարտվել, գնացե՛ք, բա Փաշինյանը ներգաղթի կողմնակից էր: Պաշտոնապես հայտարարում եմ՝ մեկիդ մտքով չանցնի մեր կողմնակիցներին ահաբեկել կամ հրավիրել ոստիկանության բաժանմունքներ և ասել՝ մի՛ աշխատեք հանրապետականների օգտին»,- ասաց նա և իրենց կողմնակիցներին կոչ արեց ոչ մի բանից չվախենալ:

«Որևէ բանից չվախենաք՝ ոստիկանություն կլինի, ԱԱԾ կլինի, մարզպետ, փոխմարզպետ կլինի, Նիկոլ Փաշինյանի մտերիմ թե մերձավոր կլինի, դուք որևէ անօրինական բան չեք անում», -ասաց նա և կոչ արեց քվեարկել համար 1-ին` ՀՀԿ-ին, քանի որ միայն ՀՀԿ-ն է, որ կարող է դիկտատուրայի դեմն առնել: