Մարդիկ, ովքեր ասում էին, որ մենք ունենք զրո ձայն, այսօր համոզվեցին. Էդուարդ Շարմազանով

Սա ոչ թե պարտություն է, այլ հաջողություն ու հաղթանակ։ Այս մասին այսօր՝ դեկտեմբերի 10–ին, ֆեյսբուքյան ուղիղ եթերում ասել է ՀՀԿ փոխնախագահ Էդուարդ Շարմազանովը։

Նրա խոսքով՝ իրենք ապացուցեցին, որ Հայաստանում կա 60 հազար մտահոգ քաղաքացի, ովքեր պատրաստ են պայքարել, որ Հայաստանում այլևս չլինի թշնամանք և ատելություն։

«Մարդիկ, ովքեր ասում էին, որ մենք ունենք զրո ձայն, այսօր համոզվեցին»,– ասել է Շարմազանովը։

Շարմազանովի խոսքով՝ այսօրվանից ՀՀԿ–ն սկսումէ պայքարի նոր, երկարատև փուլ։

«Այդ 60 հազար ձայները մեզ թևեր են տալիս պայքարի նոր փուլ սկսել՝ հանուն այն Հայաստանի, որտեղ պետության ղեկավարն իր քաղաքացիներին չի բաժանում լավերի ու վատերի»,– ասել է նա՝ համախմբման կոչ անելով։

Շարմազանովը դեկտեմբերի 9–ին կայացած ընտրություններն անվանել է Հայաստանի անկախ պետականության պատմության մեջ  ամենախայտառակը։

«Ոչ միայն նրա համար, որ արտահերթ էին, այլ որովհետև պետության ղեկավարը, իշխանությունն ամեն ինչ արեց՝ հասարակության մի հատվածին սև անվանելու, ասֆալտին փռելու, անվանարկելու, ատելության ու թշնամանքի մթնոլորտ քարոզելու և վախի մթնոլորտ տարածելու համար։ Բայց նույնիսկ այս պայմաններում,  Հայաստանում գտնվեցին շուրջ 60 հազար մտահոգ, արժանապատիվ, ազգային ու քրիստոնեական արժեքներով ապրող քաղաքացիներ, որոնք չընկրկեցին վախի մթնոլորտի առջև՝ ձայն տալով ՀՀԿ–ին»,– ասել է նա։

Դեկտեմբերի 9–ը Շարմազանովն անվանել է ՀՀԿ–ի և իր համակիրների վերածննդի օր. «Որովհետև դուք ոչ ասեցիք ատելությանը, բաժանարար գծերին»։

Ընդգծելով, որ ՀՀԿ–ն իրավունք չունի հիասթափեցնել իր 60 հազար համախոհներին՝ Շարմազանովն ասել է, որ շարունակելու են պայքարը որպես արտախորհրդարանական ընդդիմություն։