«Հասարակությունը գերառողջ քայլ է կատարել». հարկ կլինի մի տասը տարի էլ սպասել. «Փաստ»

«Փաստ» օրաթերթը գրում է.

Հոգեբան Սամվել Խուդոյանի կարծիքով, արտահերթ խորհրդարանական ընտրությունների ժամանակ արձանագրված ցուցանիշները խոսում են այն մասին, որ ժողովրդի վստահությունը Նիկոլ Փաշինյանի թիմի նկատմամբ չի մարել: Բացի այդ, նման բարձր տոկոսները խոսում են նաև այն մասին, որ ժողովուրդը բավականին վախեցած է հին ուժերի վերադարձից, այդ պատճառով էլ ընտրությունների արդյունքների միջև տարբերությունը բավականին մեծ է:

««Իմ քայլը» դաշինքին 70 տոկոս ձայն տալու փաստը խոսում է նաև նախորդ իշխանությունների նկատմամբ այն խորը ատելության մասին, որը կա ժողովրդի մոտ: Ինչ վերաբերում է ՀՅԴ–ին, ապա իրենց նույն պատճառով չընտրեցին: Նոր կուսակցություններին տրված քիչ ձայներն էլ խոսում են այն մասին, որ ժողովուրդը նրանց կա՛մ դեռ չի ճանաչում, կա՛մ չի վստահում: ԲՀԿ–ի հավաքած ձայները խոսում են այն մասին, որ կուսակցությունը Ծառուկյանի շնորհիվ իր կայուն տեղն ունի քաղաքական դաշտում: Բացի այդ, ԲՀԿ–ի շարքերում կան դեմքեր, որոնց ժողովուրդը հարգում է: Այս ընտրությունների ժամանակ պարզ դարձավ նաև, որ ԲՀԿ–ն կարողանում է պահել թիմը»,– ասաց Ս. Խուդոյանը:

Խոսելով «Լուսավոր Հայաստան» կուսակցության մասին՝ հոգեբանը նշեց, որ նրանց հաջողվել է շահել ժողովրդի վստահությունը: Ինչ վերաբերում է ձևավորվելիք խորհրդարանի բացասական կողմին, Ս. Խուդոյանի կարծիքով վատն այն է, որ ըստ էության ընդդիմություն չի լինելու:

«Ընդդիմության բացակայությունը կարող է հանգեցնել նրան, որ աստիճանաբար մեծամտության զգացում առաջանա, ինչը կհանգենցի «մեր դեմ խաղ չկա» կործանարար ավանդույթի ձևավորմանը: Մարդը նման դեպքերում շատ արագ սկսում է հավատալ, որ ինքը ամենալավն է, որ ամեն ինչ ճիշտ է և դրանից հետո էլ սկսում է սխալներ թույլ տալ: Հիմա, երբ խորհրդարանում այդ քննադատողը չկա, Աստված մի արասցե, որ նման զարգացումներ լինեն»,– ասաց Ս. Խուդոյանը:

«Սասնա ծռերին» ժողովուրդը բավարար ձայն չտվեց, քանի որ իրենց որպես ծայրահեղականների են վերաբերվում: Էյֆորիկ ֆոն լինել–չլինելու մասին էլ Ս. Խուդոյանն ասաց, որ ոչ մի էյֆորիա էլ չկա, պարզապես ժողովուրդը ոգևորված է:

«Դրա պատճառն այն է, որ ժողովուրդը զգում է, որ հաղթել է: Դրանից էլ ոգևորվել է:Իրականում ժողովուրդը երազում էր, որ նախորդ իշխանությունները կործանվեն, վերանան և, վերջապես, պատժվեն: Հիմա տեսնելով, որ իր երազանքն իրականացել է, տրամադրությունը բարձրացել է: Բայց ժողովուրդը նաև սպասում է արդարության վերականգնմանը, և ամենակարևորն այն է, որ հավատում է, որ դա անպայման կլինի»,– ասաց Ս. Խուդոյանը:

Հոգեբանի կարծիքով, ընտրությունների արդյունքները ցույց են տալիս նաև, որ իրականում ՀՀԿ–ի ընդդիմադիրների թիվը միայն «Իմ քայլը» դաշինքին տրված ձայները չեն: Նույնիսկ նոր ձևավորված կուսակցություններին տրված ձայները կրկին խոսում են այն մասին, որ մարդիկ ՀՀԿ–ին դեմ են եղել:

«Այս ամենը խոսում է այն մասին, որ մարդիկ հոգնել էին կոռումպացված համակարգից: Սթափ մարդն ինչպե՞ս կարող է կոռումպացված համակարգի աջակիցը լինել, կամ ուրախանալ, որ երկրում ծայրահեղ աղքատություն է տիրում: Մարդիկ տեսնում էին, չէ՞, որ պաշտոնի նշանակվելուց հետո սկսում են հարստանալ: Եվ ինչպե՞ս կարող են նման համակարգի պայմաններում մարդիկ դրական վերաբերմունք ունենալ նախորդ իշխանությունների հանդեպ: Այսինքն, հասարակությունը, 70 տոկոս տալով Փաշինյանի կողմից ղեկավարվող դաշինքին, գերառողջ քայլ է կատարել և այլ կերպ չէր էլ կարող լինել: Նման ցուցանիշներ արձանագրվեցին նաև այն պարզ պատճառով, որ այս ընտրությունների ժամանակ ընդդիմություն չկար: ՀՀԿ–ի ցանկացած խոսք իր դեմ էր ուղղվում, որովհետև ինֆորմացիայի աղբյուրը վարկաբեկված էր: Ի դեպ, հեղափոխություններից հետո ժողովրդի սիրելի ուժը միշտ էլ նման կատեգորիկ թվեր է հավաքում, բայց հետագա ընտրությունների ժամանակ այդ թիվը մոտենում է իրական պատկերին»,– ասաց Ս. Խուդոյանը:

Հոգեբանի կարծիքով, խորհրդարանական ընտրությունների շնորհիվ օրինականացվեց նաև իշխանափոխությունը, սակայն դա ամենևին էլ չի նշանակում, որ պայքարն ավարտվել է: Հիմա մարդիկ կփորձեն գնահատել, թե մեծամասնությունը կկարողանա՞ խելքով կառավարել, թե՞ իր դուխով կարող է աջ ու ձախ սխալներ թույլ տալ: Այսինքն, այս փուլում հասարակությունը սպասումներով է ապրելու: 

«Հիմա իսկական, խելքով, քրտնաջան, դիվանագիտորեն, առանց սխալներ թույլ տալու աշխատելու և իմաստուն կառավարման ժամանակն է: Եվ իսկական հաղթանակը դա է, ոչ թե ընտրությունների ժամանակ ստացած քվեների քանակը: Ստացված քվեն ընդամենը միջոց է: Փաշինյանի թիմը հաղթահարել է, իսկ հիմա արդեն ժողովուրդը պետք է ականատես լինի Հայաստանը տնտեսապես ծաղկեցնելուն և հզորացնելուն: Իմ կանխատեսումներով այդ սպասումները կտևեն տասը տարի: Այդ ընթացքում մեր երկիրը կհասնի զարգացման եվրոպական չափանիշների: Եվ տա Աստված, որ ավելի շուտ կարողանանք դրան հասնել, բայց, ամենայն հավանականությամբ, հինգ տարի հետո մենք կունենանք ձայների 50/50 արդյունք, իսկ դրանից հետո կձևավորվի նորմալ պառլամենտական համակարգ: Այդ ժամանակ մենք կունենանք առողջ ընդդիմություն և առողջ իշխանություն, և այդ դեպքում կկարողանանք վերջնականապես ոտքի կանգնել և ունենալ հզոր ու զարգացած երկիր»,– ասաց Ս. Խուդոյանը: