«Երբ կարգին երկիր կունենանք, այդ ժամանակ կարելի է «կես բերան» ասել, որ հեղափոխությունն ավարտվել է». «Փաստ»

«Փաստ» օրաթերթը գրում է.

ԱԺ արտահերթ խորհրդարանական ընտրություններից հետո ՀՀ վաստակավոր նկարիչ Հաղթանակ Շահումյանը հույսերի իրականացման սպասումով է լցվել: 

«Նախորդ խորհրդարանն այդքան էլ վստահելի չէր, կային հակասություններ, և ժողովուրդը չէր ընկալում այդ ԱԺ–ի ներկայությունը: Հիմա ամբողջացավ: Կարծում եմ՝ ամեն ինչ ժողովրդի սրտով եղավ: Բայց ժողովրդի ոգևորությունը պետք է շարունակություն ունենա, չպետք է կոտրվի»,–«Փաստի» հետ զրույցում ասաց նկարիչը՝ ընդգծելով, որ փոփոխություններն իմաստավորված են հենց ժողովրդի ոգևորության հանգամանքով: Այդուհանդերձ՝ համաձայն չէ, որ այսպիսով կարելի է արձանագրել հեղափոխության ավարտը:

«Շատ երկրներում միշտ էլ եղել են հեղափոխություններ, բայց հետո չեն կարողացել պահպանել դրա շարունակականությունը, այսինքն՝ իմաստը խեղվել է և այլն: Մեզ մոտ հեղափոխությունը դեռ չի ավարտվել: Երբ կարգին երկիր կունենանք, այդ ժամանակ կարելի է «կես բերան» ասել, որ հեղափոխությունն ավարտվել է: Դեռևս երկիրը կայացած չէ, տնտեսությունը ցավալի վիճակում է, կան այլ բազմաթիվ խնդիրներ, որոնք մեծ բեռ են այս ուժերի համար: Եվ Աստված չանի, որ ժողովուրդը հուսախաբ լինի: Եթե դեռևս վարչապետի պաշտոնակատար Նիկոլ Փաշինյանի հայտարարությունների գոնե 50 տոկոսը իրականություն դառնա, մեծ առաջխաղացում կլինի, իսկ ժողովուրդն էլ վստահ կլինի, որ երկիր է կառուցվում»,–շեշտեց նա: Հաղթանակ Շահումյանն ընդգծեց՝ կան մարդիկ, որոնք ուզում են՝ խոստացված բարեփոխումները միանգամից նկատելի լինեն. «Բայց կարծում եմ, որ դա այդքան արագ չի կարող լինել, որովհետև կան շատ խնդիրներ: Բացի այդ, նաև երիտասարդ ուժեր են եկել, որոնք գուցեև շատ պատրաստված են, կարող ուժեր են, բայց շատ ասպարեզներում փորձ չունեն: Այդքան հեշտ չէ հաղթահարել այն ամենն, ինչը կուտակվել է մեր երկրում: Բոլորը պետք է իրենց գործով մասնակից դառնան երկրի կառուցմանը: Մեր ժողովուրդը ստեղծող է, ծաղկեցրել է շատ երկրներ ու պետություններ: Ցավոք, այդ ներուժը չենք կարողանում մեզ համար օգտագործել: Իսկ առաջին խնդիրն արտագաղթն է՝ արտագաղթի «դեմն» առնելը: Ցանկալի է, որ Հայաստանից վերջին 20–30 տարում հեռացածներն էլ վերանայեն իրենց պահվածքը: Շատերը սպասում են, որ Հայաստանը դառնա դրախտավայր, կառուցվի և նոր վերադառնան, բայց այդպես չի կարող լինել: Իրենք ևս պետք է մասնակից դառնան երկրի կառուցմանը: Եթե անգամ դրսում են աշխատում, իրենց կողմից անպայման մեկ ծառ պետք է տնկեն: Երկրի մասին բաժակաճառերով սիրուն խոսելը մի բան է, իսկ երկրի կառուցմանը մասնակից դառնալը, պարտավորություն զգալը՝ մեկ այլ բան: Շատ ցանկալի կլինի, որ մենք դա գիտակցենք, և յուրաքանչյուրը փորձի իր աջակցությունը ցուցաբերել: Միայն մեկ Նիկոլ Փաշինյանով կամ թեկուզև 100 հոգով երկիր չի կառուցվի»:

Հաղթանակ Շահումյանը երկիր կառուցելու ճանապարհի իր ուղեցույցն ունի:

«Ովքեր ստանձնում են երկրի ղեկը, իրականում նաև մեծ պատասխանատվություն են ստանում: Բայց նախկինում տեսել ենք, թե մարդիկ ինչպես են մոտեցել այդ պատասխանատվությանը: Մենք դժգոհ ենք եղել այն իրականությունից, որտեղ արհամարհել են վստահությունն ու պատասխանատվությունը: Մենք վերջապես պետք է խելքի գանք: Ինչպես մեր ժողովուրդը, ես էլ եմ հույսեր փայփայում: Կարծում եմ՝ լավ պայմաններ են ստեղծվել, որ մեր երկրի ողջ ժողովրդի ներուժն օգտագործվի, և ականատես չլինենք մի փակ տարածքում գործող մի քանի հոգու միջավայրի: Բոլոր ասպարեզներում ժողովուրդը պետք է ակտիվ մասնակցություն ունենա, իսկ դրա համար պետք է հնարավորություն ստանա: Պետք է տեսնի իր աշխատանքի արդյունքը: Մենք հիմա շատ բացթողումներ ունենք, և ծանր վիճակից վերականգնվելն այդքան հեշտ չէ»,–ընդգծեց մեր զրուցակիցը՝ շեշտելով, որ թեպետ վերականգնվելու համար ժամանակ է պահանջվում, բայց գոնե պետք է օրենքներ և որոշակի այլ վերանայումներ լինեն, որ մարդիկ աշխատելու և ստեղծելու հնարավորություն ունենան:

«Եթե իշխանության եկած անհատները, առավել ևս առաջին դեմքերն իրենց մաքուր պահեն և նվիրված աշխատեն երկրի համար, դա բոլորի համար ուղեցույց կլինի: Մարդիկ, որոնք բոլորի աչքի առաջ են, երկրի ղեկն են ստանձնում, օրինակ պիտի լինեն. իրենց պահվածքից կախված է նաև ամբողջ հասարակության պահվածքը: Իրենց հավատարմությունն ու ազնիվ աշխատանքը խթան կդառնան նաև մյուս օղակների համար: Դա մենք տեսել ենք, Հայաստանում այդպիսի ժամանակներ եղել են, երբ առանձին անհատների, ղեկավարների պահվածքը մեծ ազդեցություն է ունեցել նաև երկրի զարգացման գործում: Առաջին դեմքերի պահվածքից շատ բան է կախված, իսկ ժողովուրդն ամեն ինչ լավ տեսնում է և հասկանում»,–եզրափակեց նկարիչը: