«Նախորդների մոտեցումը շարունակվեց նաև թավշյա հեղափոխությունից հետո՝ նոր իշխանությունների կողմից»

Past.am

Պարզվում է` ՀՀ արդարադատության նախարարության կողմից ներկայացված հակակոռուպցիոն 4-րդ ռազմավարության նախագծի քննարկման համար դեկտեմբերի 19-ին կազմակերպված միջոցառման մասնակիցներին նախօրոք չի տրամադրվել առաջարկվող տարբերակը: Այդ է պատճառը, որ կազմակերպություններից շատերը հրաժարվել են մասնակցել միջոցառմանը: Քննարկումից ժամեր անց, սակայն, այն տեղադրվել է իրավական ակտերի նախագծերի հրապարակման միասնական կայքում, որի բովանդակության մոտ կեսը վերաբերում է հակակոռուպցիոն 3-րդ ռազմավարության դեռ չավարտված ծրագրերին տրված գնահատականներին:

«Լավ կլիներ, որ ծրագրերն ավարտվեին, նոր նման գնահատականներ հնչեցվեին: Ինչ վերաբերում է կազմակերպված քննարկմանը մասնակցելուն, ապա նախագծի տեքստը նախօրոք չէր տրամադրվել, և բովանդակությանը ծանոթ չէինք: Այդ պարագայում ինչ պետք է քննարկեինք, պարզ չէ: Եթե նախորդ ռազմավարության ծրագիրը մինչև պաշտոնական շրջանառության մեջ դնելն էր քննարկվել, ապա այս անգամ նման գործելաոճ չկար, ինչը, մեր կարծիքով, ճիշտ չէր: Այսինքն, ի սկզբանե սխալ մոտեցում ցուցաբերվեց, և եթե նախատեսվում էր դրա շուրջ լուրջ քննարկում կազմակերպել, ապա նախ պետք էր տեքստը կազմակերպություններին տրամադրել, ապա նոր քննարկում կազմակերպվեր, հաշվի առնվեին քննարկման մասնակիցների առաջարկները, և որոշ ժամանակ անց արդեն այն դրվեր պաշտոնական շրջանառության մեջ»,- Past.am-ի հետ զրույցում ասաց «Թրանսփարենսի ինթերնեյշնլ» հակակոռուպցիոն կենտրոնի ծրագրերի ղեկավար Վարուժան Հոկտանյանը:  

Մեկ զավեշտալի փաստի արձանագրում ևս: Եթե նախկին ռազմավարություններն ընդունվել են նախորդի ավարտից և դրա գնահատման արդյունքների ամփոփումից հետո, ապա այս անգամ հապճեպությունն այնքան մեծ է եղել, որ նույնիսկ չեն համբերել մինչև ընդունված ռազմավարությամբ նախատեսված բոլոր միջոցառումներն ավարտվեն, արդյունքներն ամփոփվեն և դրա հիման վրա արդեն հակակոռուպցիոն նոր ռազմավարությունը մշակեն:

«Դեկտեմբերի 31-ին է ավարտվել երրորդ ռազմավարության իրականացման ժամկետը: Ստացվում է, որ նախորդի արդյունքները դեռ չամփոփված՝ ծրագրի ավարտից 12 օր առաջ շրջանառության մեջ է դրվել հաջորդ նախագիծը: Բայց նախ պետք էր հասկանալ, թե նախորդ ռազմավարությունն ինչպես է իրականացվել, ինչ խնդիրներ են առաջացել , առավել ևս, որ ոլորտներին վերաբերող ռազմավարությունները բավականին ուշացումով էին ընդունվել»,- ասաց Վ. Հոկտանյանը:

Շտապողականությունը թույլ չի տվել նաև հաշվի առնել նոր ձևավորվելիք կառավարության ծրագրային ուղղություններն ու առաջնահերթությունները: Այսինքն, նոր ռազմավարությունը պետք է բխեր նաև նոր կառավարության ծրագրային դրույթներից: Իսկ հիմա ստացվում է հակառակը: Եվ եթե կառավարությունն իր ծրագրում ներառի կոռուպցիայի դեմ պայքարը, ապա պետք է ստիպված լինի կառավարության նոր ծրագիրը հարմարեցնել առաջարկվող ռազմավարությանը:

«Հակակոռուպցիոն քաղաքականությունը պետք է բխի կառավարության ընդհանուր գործողություններից, ռազմավարությունից, ոչ թե հակառակը: Եվ ճիշտ կլիներ, որ այս հարցում նման շտապողականություն չցուցաբերվեր: Ես հավաստիացնում եմ, որ եթե այն նախապես կազմակերպությունների կողմից լուրջ քննարկվեր, ապա նման բովանդակություն ունեցող փաստաթուղթ շրջանառության մեջ չէր դրվի: Իմ կարծիքով, այն պետք է արմատապես փոխել և բոլորովին նոր բովանդակություն ունեցող փաստաթուղթ դնել շրջանառության մեջ: Ես պնդում եմ, որ ճիշտ կլինի, որ այն շրջանառությունից հանվի և նման լուրջ փաստաթղթի հանդեպ այդպիսի շտապողականություն չցուցաբերվի: Ի դեպ, 4-րդ ռազմավարությունը մշակելու մասին որոշում կար դեռևս 2018-ի հունվարից և այն ժամանակ էլ մենք առաջարկեցինք 3-րդի ավարտից հետո նորը մշակել: Այն ժամանակ էլ անհասկանալի էր, թե ինչն էր նման շտապողականության պատճառը, բայց փաստորեն, նախորդների մոտեցումը շարունակվեց նաև թավշյա հեղափոխությունից հետո՝ նոր իշխանությունների կողմից: Իսկ թե ինչո՞ւ, դրա պատասխանը պետք է նոր իշխանությունները տան»,- ասաց Վ. Հոկտանյանը:

Արմինե Գրիգորյան