Դատական հայց` ընդդեմ ՀՀ ոստիկանության, բարձրաստիճան ոստիկանների և պատգամավորի

Երևանի Արաբկիր-Քանաքեռ-Զեյթուն վարչական շրջանների ընդհանուր իրավասության դատարանում մեկնարկել է Ռուսաստանի քաղաքացի Ելենա Օվսյանիկովայի հայցի հիման վրա պատվի, արժանապատվության գործով դատավարությունն ընդդեմ Հայաստանի ոստիկանության պետ Վլադիմիր Գասպարյանի խորհրդական Նարեկ Մալյանի, փոխոստիկանապետ Հունան Պողոսյանի, ՀՀ ոստիկանության և ԱԺ պատգամավոր Էդմոն Մարուքյանի:

Հիշեցնենք, որ ազգությամբ հայ ամուսնու եւ մանկահասակ երեխայի հետ այժմ Երևանում բնակվող ՌԴ քաղաքացի Ելենա Օվսյանիկովան, մասնակցելով Բաղրամյան պողոտայում տեղի ունեցած ElectricYerevan ցույցերին, դրանց ընթացքում փորձել է կոչ անել ոստիկաններին զերծ մնալ համաքաղաքացիների նկատմամբ բռնություն կիրառելուց: Ավելի ուշ ոստիկանապետի խորհրդականը Facebook-ում գրառում էր արել՝ Ելենային ներկայացնելով որպես «միջազգային մասշտաբի սադրիչ» ուկրաինուհի, որը, իբր, երեկոյան անսթափ վիճակում անցել է Բաղրամյանը պատնեշած ոստիկանների շարքերով եւ հերթով նրանց սեռական հարաբերություններ առաջարկել:

Իր հերթին, ոստիկանապետի տեղակալ Հունան Պողոսյանը պահանջել էր, որ Օվսյանիկովան հեռանա տարածքից, որովհետև «իր ոստիկանները սեռապես անբավարարված են եւ գրգռվում են նրա ներկայությունից»:

Ելենային տարածքից հեռանալու պահանջ էր ներկայացրել նաեւ «կենդանի պատի» ակտիվ անդամ, պատգամավոր Էդմոն Մարուքյանը: «Հունան Պողոսյանը, թեև Facebook-ում Նարեկ Մալյանի պես այդքան ակտիվ չի եղել, բայց հարցազրույց է տվել, մեր վստահորդին անվանել է «սադրիչ» և մեղադրել է ոստիկաններին հավաքի ընթացքում սեքս առաջարկելու մեջ: Սա ակնհայտ զրպարտություն է, որի միջոցով նաև վիրավորել է մեր վստահորդին: Ակնհայտ է, որ ոստիկանության պաշտոնյաները, ի պաշտոնե հանդես գալով, մեղադրել են Ելենա Օվսյանիկովային նշված արարքի մեջ, հետևաբար, ոստիկանությունը ևս պատշաճ պատասխանող է:

Իսկ էդմոն Մարուքյանը մեր վստահորդին անվանել է «պրովակատոր», նրան մեղադրել է պրովոկացիա իրականացնելու մեջ, ավելին, նաև մեղադրել է ոչ սթափ վիճակում գտնվելու մեջ և ասել է, որ այդ ամենը կատարվելու պայմաններում նրանից սուր ալկոհոլի հոտ է փչել»,- դատարան դիմելու հիմքերն են ներկայացնում Ելենա Օվսյանիկովայի շահերը պաշտպանող փաստաբաններ Լուսինե Հակոբյանն ու Տիգրան Եգորյանը՝ հավելելով, որ այս կապակցությամբ պահանջում են պատասխանողներից 2-ական միլիոն ՀՀ դրամ՝ որպես ոչ նյութական վնասի փոխհատուցում և հրապարակային ներողություն: «Առավելագույնն ենք պահանջել, որովհետև իրականացվել է համակարգված գրոհ Ելենա Օվսյանիկովայի նկատմամբ, դա կատարվել է պետական, վարչական ռեսուրսի գործադրմամբ: Սա այն նվազագույնն է, որ պետք է հատուցվի մեր վստահորդին»,-պարզաբանում է փաստաբան Տիգրան Եգորյանը:

«Ակնհայտորեն, այդ բոլոր գործող անձինք համագործակցելով փորձել են տպավորություն ստեղծել, որ Հայաստանում արտաքին սադրիչների օգնությամբ մայդան է տեղի ունենում ըստ էության, և Ելենա Օվսյանիկովան իր սլավոնական արտաքինով շատ հարմար առիթ է այդ սցենարը իրագործելու համար:

Եվ բոլորովին պատահական չէ, որ թեև ազգությամբ նա ռուս է, բայց ամբողջ ընթացքում ներկայացվում է որպես ուկրաինացի, որպեսզի աղերս ստեղծվի նույն անձանց կողմից, տպավորություն, որ, ինչպես և Ուկրաինայում, Հայաստանում էլ արտաքին ուժերի ազդեցությամբ տեղի է ունենում մայդան»,-պաշտոնատար անձանց գործողությունների քաղաքական շարժառիթներն է նշում փաստաբան Լուսինե Հակոբյանը:

Ելենա Օվսյանիկովայի շահերի պաշտպանությունն ստանձնած փաստաբանները դեռ հույս ունեն, որ դատական իշխանությունը կարող է կաշկանդված չլինել պետական պաշտոնյաների և պատգամավորի վերաբերյալ կայացնելիք դատական ակտով:

«Մենք հույսեր ենք կապում, որ հնարավոր կլինի այս գործով ունենալ գործադիր իշխանությունից անկախ դատական իշխանություն, և որ այդ դատական իշխանությունը ներկայացնող նախագահող դատավորը կունենա այնքան անկախություն և խիզախություն՝ կայացնելու դատական ակտ՝ բավարարելով Ելենա Օվսյանիկովայի հայցը և ապահովելով նրա՝ Սահմանդրությամբ հռչակված իրավունքները: Իսկ եթե գործադիր իշխանությունը կամ դատական իշխանությունը որոշեն, որ պետք է ամեն գնով այս հայցը տապալվի Հայաստանում և պետք է պաշտպանեն ոստիկանությանն ու ոստիկանական մեթոդները՝ այլ մարդկանց իրավունքներն ու ժողովրդավարական արժեքները ոտնահարելով, մենք կդիմենք Եվրոպական դատարան, և, կարծում եմ, ուղղակի ևս մեկ խայտառակ գործ կլսվի Հայաստանի Հանրապետության դեմ և կբավարավի»,-ասում է Տիգրան Եգորյանը:

Մինչ այդ, պետական համակարգն իր գործն է անում. նախ՝ նախորդ նշանակված նիստի օրը դատարանի նստավայրն անսպասելի փոխվեց. Արաբկիրում կայանալիք նիստը Կենտրոնի դատարանում անցկացվեց, և դատավարության բոլոր մասնակիցները, բացի ոստիկանությունից, միայն վերջին պահին տեղեկացան այդ որոշման մասին: Հայցվոր կողմի համար էլ էր անհասկանալի՝ ինչու են ոստիկանության ներկայացուցիչները ծանուցված այդ փոփոխության մասին, իրենք՝ ոչ: Բացի այդ, նիստից բացակայող փոխոստիկանապետ Հունան Պողոսյանի վերաբերյալ հայտարարվեց, թե նա պատշաճ ծանուցված չէ այն դեպքում, երբ միևնույն նիստի համար ոստիկանապետը լիազորագրեր էր տվել ոստիկանության երկու ծառայողների՝ նշված օրը ներկայանալու դատարան:

Վերջիններս էլ չէին կարողանում պատասխանել՝ ծանուցվա՞ծ է փոխոստիկանապետը նիստի մասին, թե ՞ոչ: Ոստիկանապետի խորհրդական Նարեկ Մալյանն էլ բացակայում էր՝ չնայած պատշաճ ծանուցված լինելուն: Ըստ էության, սակայն, հայցվոր կողմի համար էական չէ՝ պաշտոնատար անձինք կներկայանա՞ն դատարան իրենց գործողությունների հետևանքով իրենց պատասխանատվության հրավիրող քաղաքացու հայցով, թե՞ ոչ: Դա պատասխանող կողմի որոշելիքն է, ինչի վերաբերյալ հետևություններ պետք է անի հանրությունը: Էական է միայն, որ պաշտոնյաները պատշաճ ծանուցված համարվեն, որպեսզի նիստն սկսվի և շարունակվի:

Ադրինե Թորոսյան