Ավելի մատչելի գին, քիչ թռիչքաժամ, գումարած՝ որակ. ինչպե՞ս «ARON»–ը ՀՀ բերեց նոր ավիափոխադրողի

Օրերս հայտարարվեց ռումինական ազգային փոխադրողի՝ «TAROM» ավիաընկերության՝ հայկական շուկա մուտք գործելու մասին: 2019 թվականի ապրիլի 3–ից կմեկնարկեն Բուխարեստ–Երևան–Բուխարեստ ուղղությամբ չվերթները: Բացի այդ, Հայաստանից ուղևորվող քաղաքացիները հնարավորություն կունենան Բուխարեստով մեկնել եվրոպական 16 երկիր: Ռումինական ազգյին փոխադրողի մուտքը հայկական շուկա «ARON» թրավելի և ռումինական ավիաընկերության համատեղ բանակցությունների արդյունքն է: Նախաձեռնությունը եղել է հայկական կողմից:

«Փաստը» Հայաստանում «TAROM» ռումինական ավիաընկերության գլխավոր ներկայացուցիչ Արարատ Մուրադյանից հետաքրքրվեց նախաձեռնության նախապատմության մասին: Ա. Մուրադյանը նախ ընդգծեց՝ նախաձեռնությունն իրենն է:

«Այս շուկայում ես աշխատում եմ 1993 թվականից, եղել եմ ռուսական տասը ավիաընկերությունների գլխավոր ներկայացուցիչը Հայաստանում: Մեր՝ «ARON» ընկերությունը 19 ուղղություններով չվերթներ է գործարկել տարբեր ավիաընկերությունների հետ»,– ասաց նա՝ ընդգծելով, որ այդ ուղղությունների շարքում են նաև ՌԴ Կալինինգրադ, Կազան, Անապա, Ուլ յանովսկ քաղաքները: 

«Բավականին մեծ փորձ ունենք, և այս անգամ որոշեցինք բացել եվրոպական ուղղություն: Առաջարկներն արել եմ ես՝ մոտավորապես մեկուկես–երկու տարի առաջ: Մի քանի անգամ հանդիպումներ ենք ունեցել, քննարկել, իրենք ևս հյուր են եկել: Եվ արդյունքում հասանք այսօրվա արդյունքին»,– ասաց Ա. Մուրադյանը:

Դեպի Ռումինիա ուղղությունը գործարկելու համար «ARON» ընկերությունը շահել է Ռումինիայի կառավարության, մասնավորապես տրանսպորտի նախարարության կողմից հայտարարված մրցույթը: Արդյունքում «ARON»–ը դարձել է ռումինական ազգային ավիափոխադրողի վաճառքի գլխավոր գործակալը Հայաստանում:

Արարատ Մուրադյանը նշեց, որ շեշտը դրվել է հատկապես տարանցիկ չվերթների վրա: Բարսելոնա, Մադրիդ, Հռոմ, Փարիզ, Մյունխեն, Վիեննա, Բրյուսել, Ամստերդամ, Պրահա, Աթենք, Ֆրանկֆուրտ, Լոնդոն, Քիշնև, Ստոկհոլմ, Բուդապեշտ, Բելգրադ: Ռումինական ազգային փոխադրողի և հայկական ընկերության համագործակցության շնորհիվ այս երկրներ հասնելու համար մեր հայրենակիցները մի շարք առավելություններ կունենան: 

«Մենք առաջարկում ենք ավելի էժան գին, ինչպես նաև ավելի քիչ թռիչքաժամ և որակով սպասարկում»,– ասաց Ա. Մուրադյանը: 

«ARON» ՍՊԸ տնօրեն Օնիկ Մուրադյանն էլ մեզ հետ զրույցում ընդգծեց՝ սա մեծ, բարդ ծրագիր էր:

«Մեր առաջարկն ընդունեցին, այնուհետև սկսեցին շուկան ուսումնասիրել: Հետագայում հայտարարեցին տենդեր՝ հայկական գործող ընկերությունների միջև: Տենդերին մասնակցած 3–4 կազմակերպություններից հաղթող ճանաչվեց մեր ընկերությունը: Ապա մեզ հետ սկսեցին մշակել պայմանները: Դրանից հետո իրենք կրկին ուսումնասիրեցին մեր գործունեությունը, հետո կնքվեց պայմանագիր: Հետագայում մեզ հրավիրել են իրենց մոտ, և բոլոր մանրամասները քննարկելուց հետո վերջնականապես որոշեցինք, որ ապրիլի 3–ից կմեկնարկի Բուխարեստ–Երևան–Բուխարեստ չվերթը»,–ասաց «ARON»–ի տնօրենն՝ ընդգծելով, որ թեև դեռևս թռիչքները շաբաթական երկու անգամ կլինեն, բայց հետագայում մտադիր են ավելացնել հաճախականությունը:

Նա շեշտեց, որ թռիչքների մեկնարկը որոշել են տալ ամառային սեզոնին, որի սկիզբը համարվում է ապրիլ ամիսը:

Օնիկ Մուրադյանի խոսքով, ի տարբերություն Մոսկվայով և Ուկրաինայով իրականացվող տարանցիկ չվերթների, Ռումինիայի պարագայում աշխարհագրական դիրքն այլ է:

«Հենց այնպես չէ, որ մենք Ռումինիան ենք ընտրել: Համեմատած բոլոր տրանզիտների հետ՝ թռիչքային ժամը շատ կարճ է լինում: Իսկ եթե թռիչքային ժամը կարճ է, համապատասխանաբար գինը ևս նվազում է»,– բացատրեց Օ. Մուրադյանը՝ ներկայացնելով Ռումինիայի աշխարհագրական դիրքի առավելությունները:

Օնիկ Մուրադյանը նոր ուղղությունը կարևորեց նաև զբոսաշրջության տեսանկյունից:

«Ընդհանրապես հայերն աշխարհի գրեթե բոլոր հետաքրքիր վայրերի նկատմամբ մեծ հետաքրքրություն ունեն և այցելում են: Ռումինիան ևս շատ հետաքրքիր տուրիզմ ունի»,–ասաց նա՝ ընդգծելով, որ նաև որպես զբոսաշրջությամբ զբաղվող ընկերություն, իրենց գործընկերների հետ համատեղ հաջորդ քայլը պետք է ներառի նաև զբոսաշրջությունը:

«Ռումինիայում կա սպորտային շատ հետաքրքիր տուրիզմ: Օրինակը լեռնադահուկային սպորտն է: Կա նաև ամառային հետաքրքիր տուրիզմ, ծով, տեսարժան վայրեր, հանգստյան տարբեր բազաներ: Մենք պետք է ուղղակի ժամանակ տրամադրենք, և բոլոր հետաքրքիր առաջարկները ներկայացնենք մեր ժողովրդին: Գիտեք, հաճախորդներ կան, որոնք գալիս ու ասում են՝ նորություն ենք ուզում: Սա նորություն կլինի մարդկանց համար»,–եզրափակեց նա:

Արարատ Մուրադյանն էլ շեշտեց, որ Ռումինիայում արդեն բավականին մեծ հետաքրքրություն կա Հայաստանի նկատմամբ, Հայաստանում էլ հետաքրքրություն կա Ռումինիայի հանդեպ: 

 

ԱՆՆԱ ԲԱԴԱԼՅԱՆ