Շուտով մյուս ապահովագրական ընկերությունների մասին էլ կիմանանք

ՀՀ ՊԵԿ քննչական վարչության պետ Էդվարդ Հովհաննիսյանը մեզ հետ զրույցում անդրադառնալով «Նաիրի Ինշուրանս» ապահովագրական ընկերությունում հայտնաբերված խախտումների պատճառով քրեական գործ հարուցելու մանրամասներին, նշեց, որ գործը հարուցվել է ՀՀ Քրեական օրենսգրքի 205 հոդվածի 2–րդ մասի հատկանիշներով, այն է՝ առանձնապես խոշոր չափերի հարկեր վճարելուց խուսափելը: Ինչ վերաբերում է ՊԵԿ–ի կողմից իրականացվող հսկողական աշխատանքներին, ապա դա առնչվում է բոլոր ապահովագրական ընկերություններին, իսկ ստուգումները կրում են համակարգային բնույթ և այս կամ այն ընկերությունը թիրախավորվել չի կարող:

«Նախաքննության շահերից ելնելով՝ ես հիմա անուններ չեմ հնչեցնի, սակայն վստահեցնում եմ, որ «Նաիրի Ինշուրանս» ապահովագրական ընկերության քննվող քրեական գործը և սկսված գործընթացն ամենևին էլ թիրախավորված չէ և քաղաքական ենթատեքստ չունի: Ինչ վերաբերում է գործին, ապա ընկերության գործունեության մասին հարկային մարմիններ ներկայացված 2016, 2017 թվականների շահութահարկի հաշվարկներում ներառվել են ընկերության կողմից ծախսային բազայում արտացոլված տվյալներ, որոնք փաստացի ընկերության կողմից չեն իրականացվել»,– ասաց Է. Հովհաննիսյանը:

Խոսքը ապահովագրական գործակալների կողմից ԱՊՊԱ պայմանագրեր կնքելու և գործընթացը կազմակերպելու դիմաց վճարվող միջնորդավճարների մասին է, որի դիմաց, սակայն, գործակալները որևէ գործառույթ չեն իրականացրել: Այսինքն, ընկերությունը միջնորդների անունով դուրս գրված գումարները պակասեցրել է համախառն ընդհանուր եկամուտից, որի պատճառով հարկվող շահույթի չափը ձևավորելիս այն ազդել է հարկման ենթակա գումարի վրա: Արդյունքում ավելի քիչ շահութահարկ է վճարվել, որի պատճառով շուրջ 200 մլն դրամի չափով վնաս է պատճառվել պետությանը:

«Պատճառված վնասների չափի մասին հստակ տեղեկությունները կլինեն հետագա գործողությունների ընթացքում: Ստուգողական գործողությունների արդյունքում ամբողջովին պարզ կդառնա, թե իրականում որքան գումար է այն կազմում»,– ասաց Է. Հովհաննիսյանը:

Նշենք նաև, որ օրենքով նախատեսված է խրախուսիչ նորմ՝ ՀՀ Քրեական օրենսգրքի 189 հոդվածի 5–րդ կետի համաձայն հանցանք կատարած անձն ազատվում է քրեական պատասխանատվությունից, եթե վերականգնում է պետությանը պատճառած վնասը, ինչպես նաև տույժերն ու տուգանքները: Եթե ընկերության կողմից ընդունվի մեղադրանքը և վերականգնվի պատճառված վնասը, ապա քրեական գործի հետագա ընթացքը կդադարեցվի և գործը կկարճվի, նշեց ՀՀ ՊԵԿ քննչական վարչության պետը:

Խոսելով «Նաիրի Ինշուրանս» ԱՍՊԸ –ի տարածած հայտարարության մասին, թե ՊԵԿ նման վարքագիծը բացառապես միտված է արատավորելու գործարար բարի համբավն ու հեղինակությունը, և որ ՊԵԿ աշխատակիցներն այս ընթացքում որևէ անգամ չեն այցելել «Նաիրի Ինշուրանս» ստուգումներ իրականացնելու նպատակով և իրենց համար անհասկանալի է, թե ինչ չարաշահումների և նախնական հաշվարկների մասին է խոսք գնում, Է. Հովհաննիսյանն ասաց, որ իր ղեկավարած վարչությունը նախաքննական մարմին է և ամենևին էլ չի ենթադրվում, որ քննչական գործողություններ իրականացնելուց առաջ պետք է իրենց աշխատակիցներն ընկերություն այցելեն:

«ՊԵԿ մի ստորաբաժանում ասոցացվել է այլ ստորաբաժանման աշխատակիցների՝ հարկային տեսչական, օպերատիվ հետախուզական մարմինների գործառույթների հետ և արդյունքում եզրակացության են հանգել, որ եթե չեն այցելել, ապա գործընթաց չի կարող իրականացվել: Հարկ եմ համարում նշել, որ «Նաիրի Ինշուրանս» ապահովագրական ընկերության ղեկավարները սույն քրեական գործով տվել են բացատրություններ, հարցաքննվել են, մասնակցել են այլ դատավարական գործողությունների: Այսինքն, ՊԵԿ քննչական վարչության աշխատակիցների չայցելելու փաստը դեռևս չի նշանակում, որ քրեական գործ չի հարուցվել և նման հարցերը չեն քննվում»,– ասաց Է. Հովհաննիսյանը:

Նշենք նաև, որ ընկերությունում ավելի վաղ իրականացվել է համալիր հարկային ստուգում, որի ընթացքում տեսչության աշխատակիցների կողմից հայտնաբերվել են ենթադրյալ հանցագործության հատկանիշներ, կատարվել է լրացուցիչ հարկային պարտավորությունների նախնական հաշվարկ, որից հետո է հաղորդում ներկայացվել վարչությանը: Այսինքն, առանց տեսչական մարմնի կողմից ստուգում իրականացնելու հնարավոր չէր լինի հաղորդում ներկայացնել ՀՀ ՊԵԿ քննչական վարչություն:

Է. Հովհաննիսյանը, խոսելով ընկերության բարի համբավն արատավորելու մասին, նշեց, որ ո՛չ նման նպատակ է եղել, ո՛չ էլ անմեղության կանխավարկածը խախտելու խնդիր կա: «Գումարային արտահայտությամբ «Նաիրի Ինշուրանս» ընկերության պարտավորությունն այս պահի դրությամբ ավելի մեծ է: Բացի այդ, ժամանակագրական առումով տեսչական մարմնի ստուգողական գործողություններն այս ընկերությունում ավելի վաղ են սկսվել: Բայց ժամանակի տարբերությունն ամենևին էլ չի նշանակում, որ այս կամ այն ընկերությունը թիրախավորված է կամ այդտեղ քաղաքական ենթատեքստ կա: Շուտով այլ ընկերությունների վերաբերյալ նույնպես կբարձրաձայնվի, և հասարակությունը կտեղեկանա նաև մյուս ապահովագրական ընկերություններում տեղի ունեցած չարաշահումների և խախտումների մասին, և այս առումով էլ ամեն ինչ իր տեղը կընկնի»,– ասաց Է. Հովհաննիսյանը:

ԱՐՄԻՆԵ ԳՐԻԳՈՐՅԱՆ