Թե ինչպես են մսխվել գումարներն օրենք խախտելով

Երևանի քաղաքապետ Հայկ Մարությանի մամուլի խոսնակ Հայկ Կարապետյանը Ֆեյսբուք սոցիալական ցանցի իր էջում հրապարակել է տեղեկություն և լուսանկարներ, որով պարզ է դառնում, որ, օրինակ՝ 2017 թվականին վճարված 287 միլիոն դրամի չափով պարգևավճարներին վերաբերող 12 կարգադրություն պարզապես չի հրապարակվել, կամ, այլ կերպ ասած, կեղծվել է:

«Ինչը «Երևան քաղաքում տեղական ինքնակառավարման մասին» օրենքի խախտում է: Ավելին, Yerevan.am պաշտոնական կայքում կեղծ տեղեկություններ են հրապարակվել․ պարգևատրումների մասին փաստացի գոյություն ունեցող կարգադրությունների հերթական համարների տակ կայքում հրապարակվել են այլ՝ բոլորովին ուրիշ բովանդակությամբ փաստաթղթեր (տես՝ լուսանկարներում)»,- գրել է Կարապետյանն իր գրառման մեջ:

Լուսանկարների թեթև ուսումնասիրությունից պարզ է դառնում, որ նույն ամիս-ամսաթվով ու նույն համարով երկու հրամանների բովանդակություններն իրար հետ որևէ կապ չունեն: Եվ եթե մեկով նախկին քաղաքապետի կարգադրությամբ, օրինակ, նոյեմբեր ամսին քաղաքապետարանի աշխատակիցները բարեխիղճ աշխատելու համար պարգևատրվել են, հետաքրքիր է, որ դրա չափի մասին որևէ տեղկություն չկա: Իսկ նույն ամսաթվով ու համարով մեկ այլ կարգադրություն, որը տրամաբանորեն պետք է որ նախորդի բովանդակության շարունակությունը լիներ, գնահատող հանձնաժողով ձևավորելու մասին է:

Նույն պատկերն է, նախորդ քաղաքապետի՝ 2017 թվականի հունիս, օգոստոս, հունվար ամիսներին ստորագրած կարգադրագրերի դեպքում: Եվ հետաքրքիր է, որ այն ժամանակ որևէ մեկի մտքով էլ չի անցել հարցնել, ստուգել, հետաքննել, թե երևանցիների հարկերից գոյացած բյուջեի փողերն ինչու են ամենամսյա կտրվածքով անհասցե վատնվում, կատարված ո՞ր փայլուն աշխատանքի համար:

Իսկ հիմա էլ Հռոմի պապից ավելի կաթոլիկ երևալու համար պարգևավճարների թեման շատերը ծամոն են սարքել ու գցել են ժողովրդի օրակարգ:

Այստեղ, իհարկե, իրենց մեղքի բաժինն ունեն նոր իշխանությունները, քանի որ բոլոր գերատեսչությունները չէ, որ հասարակության հետ թափանցիկ են աշխատում, ներկայացնում, թե նախկին իշխանավորներն ընդհանրապես ի՞նչ գործարքներ են կնքել, ինչե՞ր են արել, գործարքներից ինչքա՞նն է գրպանվել և այլն: Ի դեպ, Երևանի քաղաքապետարանի դեպքում քաղաքապետի խորհրդական Կամո Արեյանը, եթե ցանկանա, կարող է այսօրինակ հարցերի վրա բավականին լույս սփռել:

Եվ վերջապես ժամանակն է ժողովրդին բացատրելու, թե ինչպե՞ս է եղել, որ նախորդ իշխանությունների կողմից պետության ու ժողովրդի վզին 7 միլիարդ դոլարի պարտքի պարտավորություն է փաթաթվել, որի պատճառով դեռևս չծնված երեխաներն անգամ պետք է այդ պարտքերը վերադարձնեն: Բայց այդ մասին, չգիտես ինչու, որևէ մեկը աղմուկ աղաղակ չի բարձրացնում: Եվ եթե նախորդ իշխանությունները փողերը կերել են ու «փախել են հայ դե Փարիզ», ապա նոր իշխանությունները պարտավոր են ոլորտ առ ոլորտ գնահատական տալու իրենց նախորդների աշխատանքին:

Հակառակ դեպքում ամեն քայլափոխի կընկնեն նախորդների լարած ծուղակն ու երկրի առջև ծառացած հարցերը լուծելու փոխարեն, կսկսեն նախկինների սադդրանքներին պատասխանել: Ժամանակն է, որ նոր իշխանություններն իրերն իրենց անուններով կոչեն ու դրանք բացահայտելով զբաղվեն, ոչ թե նախկինների կերածը «մարսել տալով» կամ թաքցնելով: Այդ դեպքում մի կողմից արդարությունը կվերականգնվի, մյուս կողմից մարդկանց իրազեկվածության աստիճանը կբարձրանա: Իսկ դրանից հետո թող քարն առաջինը նետեն նրանք, ովքեր համարում են, որ իրենք մեղավոր չեն:

 

 

 

Արմինե Գրիգորյան