«Այդ ինչպե՞ս եղավ, որ մեզանով զբաղվում էր ԱԱԾ–ն, իսկ չինացիներով ոչ ոք չի զբաղվել»

«Նաիրիտ» գործարանի շուրջ առկա իրավիճակի և մի շարք հարցերի շուրջ զրուցել ենք գործարանի նախկին տնօրեն Կարեն Իսրայել յանի հետ, որը նախ թվարկեց այն իրողությունները, որոնք որոշակի առաջընթաց է համարում:

«Ամիսներ առաջ տնտեսական զարգացման և ներդրումների նախարարության հետ փոխըմբռնման հուշագիր ստորագրվեց: Դրանից հետո ներդրողները գործարանում փորձագիտական աշխատանքներ իրականացնելու իրավունք ստացան, որը հնարավորություն կտար պարզել գործարանի այսօրվա իրավիճակը, հասկանալ՝ հնարավո՞ր է արդյոք գործարանը վերաթողարկել: Ներդրողների, ինչպես նաև նախկին աշխատակիցների ներգրավմամբ ձևավորված փորձագիտական խումբը գործարանում աուդիտորական աշխատանքներ սկսեց: Խումբը շուրջ երկու ամիս է աշխատել գործարանում և եզրակացության եկել, որ գործարանը հնարավոր է վերաթողարկել: Եզրակացությունից հետո ներդրողները հանդիպում են ունեցել փոխվարչապետ Տիգրան Ավինյանի գրասենյակի ղեկավար Վարագ Սիսեռյանի հետ, ներկայացրել իրենց դիրքորոշումն ու պայմանները»,– ասաց Կ. Իսրայել յանը՝ նշելով, որ թեև ԱԺ արտահերթ ընտրություններից հետո բանակցությունները սառեցին, բայց մոտ մեկ շաբաթ առաջ ներդրողների ներկայացուցիչների, մասնագետների ու տնտեսական զարգացման և ներդրումների նախարար Տիգրան Խաչատրյանի մասնակցությամբ հանդիպում է եղել:

«Խաչատրյանը հայտնեց իր դիրքորոշումը, ըստ որի՝ բավականին պրոֆեսիոնալ պատասխաններ է ստացել ներդրողներից: Հետո հայտնեց, որ լրացուցիչ փաստաթղթեր պետք է տրամադրել իրենց, որոնցով կհիմնավորվեն ներդրողների մտադրությունները»,–ասաց նախկին տնօրենը՝ ընդգծելով, որ արդեն տեղեկացրել են ներդրողներին լրացուցիչ փաստաթղթեր ուղարկելու մասին: 

Նա հայտնեց, որ ներդրողներն արդեն այսօր պետք է ուղարկեն փաստաթղթերը. «Հույս ունենք, որ մինչև շաբաթ կստանանք նախարարի դիրքորոշումը: Ներդրողը՝ «Եվրոպա–Ասիա բիզնես ֆինանսական կենտրոն» հոլդինգի ներդրումային խումբը, իմ ունեցած տեղեկություններով, իր շուրջ է համախմբել 5–6 խոշոր եվրոպական ընկերություններ, կա նաև իրանական ընկերություն: Բոլոր ընկերությունները ֆինանսապես կայուն են: Դա թույլ է տալիս, որ կառավարությունը վստահ լինի՝ ընկերությունները կարող են գործարանում ներդրումներ կատարել և այն վերաթողարկել: Արագացված ընթացակարգերով գործարանը պետք  է հանձնվի ներդրողներին: Կառավարությունը հետագա աշխատանքները պետք է վերցնի իր հսկողության տակ: Բացի այդ, կառավարությունը պետք է հստակ իմանա, որ ներդրողներն իրենց պարտականությունները կատարում են, որից հետո էլ սնանկության գործը կկասեցվի»:

Կարեն Իսրայել յանից հետաքրքրվեցինք նաև օրեր առաջ իրենց կողմից բարձրաձայնված ահազանգի ու դրան հաջորդած հաղորդագրության մասին, որը տարածել էր փոխվարչապետ Տիգրան Ավինյանի գրասենյակի ղեկավար Վարագ Սիսեռյանը: «Նաիրիտի» համակարգող խումբն ահազանգել էր, որ շուրջ 10 օր է՝ գործարանում են գտնվում չինացիներ, որոնք հետաքրքրված են բութադիենային տեխնոլոգիայի ձեռքբերմամբ: Ըստ Վ. Սիսեռյանի տարածած հաղորդագրության, միջադեպի հետ կապված տեղեկատվությունը հանձնվելու է պատկան մարմիններին:

Այս առումով Կարեն Իսրայել յանը նշեց. «Այն մարդիկ, որոնք իրենց իրավասություններից դուրս նման խախտումներ են կատարել, պետք է պատժվեն: Մենք անընդհատ բարձրաձայնել ենք այն մասին, որ «Նաիրիտի» գույքն օտարվում է շուկայականից բավականին ցածր գներով: Եթե սնանկության կառավարիչը և մյուսներն իմանան, որ ամեն ինչ վերահսկվում է, և իրենք չեն կարող գույքը շուկայականից ցածր գներով վաճառել, այդ ժամանակ հարցը կկարգավորվի, իսկ չինացիներն էլ ինչ–որ մարդկանց որոշմամբ չեն կարող գործարան մտնել: Գիտե՞ք, հարցն այստեղ հիմնականում որն է. երբ կառավարության հետ հուշագիրն արդեն կար և մենք ցանկանում էին գործարանում աուդիտ անել, այդ ժամանակ սնանկության կառավարիչը մեզանից պահանջեց բոլոր այն աշխատակիցների անվանացանկը, որոնք ներգրավված են խմբում: Պահանջեց, որ ներկայացնի ազգային անվտանգության ծառայություն, որից հետո միայն կթույլատրվեր նրանց մուտքը գործարանի տարածք: Իսկ հիմա, ըստ Վ. Սիսեռյանի հաղորդագրության, սնանկության կառավարիչն ինքնագլուխ քայլեր է կատարել: Այդ ինչպե՞ս եղավ, որ կառավարության հետ հուշագրի համաձայն մենք պետք է աուդիտ անեինք, և ստացվում է՝ մեզանով զբաղվում էր ազգային անվտանգության ծառայությունը, իսկ չինացիներով, որոնք մտել են գործարան, ոչ ոք չի զբաղվել: Ո՞րն է մոտեցումը: Չէ՞ որ յուրաքանչյուր մարմին ինքը պետք է հայտնաբերի նման դեպքերը, և ոչ թե մենք դրա մասին տեղեկացնենք կառավարությանը»:

Կարեն Իսրայել յանը հայտնեց, որ հիմա իրենք ևս չեն կարողանում գործարանի տարածք մուտք գործել:

«Փորձագիտական խումբը մուտք ու ելք ուներ, բայց այս հայտնաբերումից ու լուրերից հետո մեզ արդեն չեն թողնում մեր աշխատասենյակներ մտնել: Այսինքն՝ ստացվում է, որ կառավարության հետ աշխատող աշխատանքային խմբի մուտքն արգելել են գործարանի տարածք: Իսկ քանի որ մենք արդեն այնտեղ չենք լինում, չենք կարող տեղյակ լինել՝ արդյո՞ք կողմնակի անձինք մուտք ու ելք են անում գործարանի տարածք»,– ասաց նա:

Մեր զրուցակիցը շեշտեց, որ այս իրավիճակը նորմալ չի համարում, ու հավելեց, որ այդ մասին հայտնել են նաև կառավարությանը: 

 

ԱՆՆԱ ԲԱԴԱԼՅԱՆ