Եղեգնաձորցի երիտասարդները «Գոյամարտ» ծրագրով բացահայտում են հայոց պատմության հերոսական էջերը

Վայոց ձորի Եղեգնաձոր քաղաքի հինգ ուսումնական հաստատությունների 18 երիտասարդներ նոյեմբերի 14-ին այցելել են «Եռաբլուր» զինվորական և Պռոշյանի զոհված ազատամարտիկների պանթեոն: Ինչպես  տեղեկացրին Հայաստանի երիտասարդական հիմնադրամի հասարակայնության հետ կապերի ծառայությունից, «Արգիսդի» հայրենասիրական հասարակական կազմակերպության «Գոյամարտ» ծրագրի շրջանակներում երիտասարդները Եռաբլուրում նախ ծանոթացել են ԱՍԱԼԱՅԻ հուշակոթողին, հարգանքի տուրք մատուցելԱնհայտ զինվորի հուշարձին, հերոսների շիրիմներին: Երիտասարդների այցը զուգակցվել է տեղեկատվական զրույցներով ու բանախոսություններով. նրանք գիտելիքներ են ստացել 20-րդ դարասկզբի ինքնապաշտպանական հերոսամարտերի, հայդուկների, արցախյան գոյամարտի, ազատամարտիկների կյանքի ու սխրանքների մասին, նրանց ներկայացվել են գոյապայքարի դժվարին դրվագները, հերոսների կյանքն ու սխրանքները, հայոց նորագույն պատմ ության կարևորագույն էջերը:

ՀՀ Նախագահի աշխատակազմի կողմից ՀԿ-ներին տրամադրվող դրամաշնորհի և Հայաստանի երիտասարդական հիմնադրամի հայտարարած մրցույթի շրջանակներում կյանքի կոչված ծրագիրն իրականացվել է Արտաբույնք, Ագարակաձոր,  Վերնաշեն, Գլաձոր, Արփի, Արենի, Շատին, Հորս,  Ելփին, Ռինդ, Չիվա, Աղավնաձոր, Թառաթումբ, Աղնջաձոր գյուղերում: Կազմակերպվել են հարենասիրական ֆիլմերի դիտումներ, թարմացվել դպրոցներում փակցված ցուցատախտակների ինֆորմացիան: Ցուցադրվել են նաև «Խոնարհ հերոսներ» ֆիլմաշարից ֆիլմեր:

«Արգիսդի» հայրենասիրական հասարակական կազմակերպության նախագահ Միհրան Գալստյանը նշել է, որ ծրագրի նպատակն է հայրենասիրական ֆիլմերի,  ազատամարտիկների հետ հանդիպումների  իրականացմամբ հնարավորություն տալ երեխաներին նոր լույսի տակ տեսնելու անձի և ՀՀ  ապագա քաղաքացու համար կարևորագույն արժեքները՝ հայրենիք, հայրենասիրություն, արցախյան ազատամարտի հերոսներ, հայկական բանակ, հայ զինվոր:

«Իսկապես կարելի է հույս դնել այս սերնդի վրա: Նրանց մեջ կա հայրենասիրություն, ուղղակի կայծ ու ոգևորություն է պետք, որ արթնացնի այն: Երիտասարդների լրացրած գնահատման թերթիկներից պարզ է դառնում, որ  նրանք հետաքրքրված են նման նյութերով ու շատ են ուզում, որ ծրագիրը շարունակական լինի: Ի վերջո հայրենիքը սիրելու համար նախ պետք է այն ճանաչել, իսկ ճանաչողության պակաս երեխաների մոտ զգացվում էր»,-նշել է նա:

Միհրան Գալստյանը փաստել է, որ բոլոր դպրոցներում ռազմագիտության սենյակներ, անկյուններ թեև կան, բայց հաճախ այդ սենյակներն ու պաստառները երեխաների համար դառնում են սովորական: Ուստի պիտի նրանց հետ աշխատանք տարվի, որպեսզի աշակերտների ուշադրությունը գրավեն այդ նյութերը, տարատեսակ խրախուսումների միջոցով երիտասարդերի հետաքրքրությունը ուղղեն դեպի հերոսամարտերը հայդուկները, արցախյան գոյամարտը ազատամարտիկների կյանքն ու սխրանքները: