«Շատ առաջարկներ եմ մերժել». Արփի Գաբրիելյանը` I like it–ը վարելու և բարդության մասին

ЛАЙФ 31 Март, 2019 21:51

Տևական ժամանակ էկրաններից որպես դերասանուհի ներկայացող Արփի Գաբրիելյանը շուտով կրկին հեռուստադիտողներին կներկայանա որպես հաղորդավարուհի։ Նա վարելու է «Արմենիա TV»–ի I like it նախագիծը, որտեղ հաղորդավարական զույգ է կազմել պատանի դերասան Ստեփան Հովհաննիսյանի հետ։

Tert.am Life–ի հետ զրույցում Արփին ասաց, որ նախագծում կներկայանա նաև էքսպերիմենտներով, թեև ինքը փորձարկումների մեծ սիրահար չէ։ Հաղորդավարուհու հագուստի ոճով զբաղվելու է Արայիկ Գաբաջյանը։

««Ֆուլ հաուսում» հանդես եմ գալիս առօրյա ոճով, այստեղ կլինեմ ավելի համերգային տեսքով, շքեղ երեկոյան հագուստներով։ Ես էքսպերիմենտներ չեմ սիրում, բայց նախագծում ինձ կտեսնեն նաև էքսպերիմենտներով»,– ասաց նա։

Արփիի խոսքով` այս ընթացքում ունեցել է որպես հաղորդավարուհի ներկայանալու առաջարկներ, սակայն մերժել է։ Այս անգամ ստացավ այնպիսի առաջարկ, որին սպասում էր։

«Ինձ համար կարևոր էր ընտրել այն հաղորդումը, որտեղ ասելիք ունեմ։ Երբեք ինչ–որ բան չեմ անում ուղղակի անելու համար, հատկապես, որ հեռուստատեսությամբ երևալու խնդիր չունեմ։ 5 տարի է` անընդհատ եթերում եմ։ Ինձ համար կտրուկ էր մոտեցումը, որ պետք է մասնակցեմ այնպիսի նախագծի, որտեղ ասելիք կունենամ։ I like it–ն ինձ շատ հետաքրքիր է, քանի որ մասնակիցները 8-13 տարեկան պատանիներ են, իսկ իմ թիրախային լսարանը ձևավորվել է պատանիների շնորհիվ։ Ես տեսակով շնորհակալ մարդ եմ և չեմ կարող անտեսել այն երեխաներին, որոնց շնորհիվ կայացել եմ։ Ինձ համար շատ կարևոր էր շփվել իրենց հետ որպես Արփի, որովհետև ներկայացումների ժամանակ շփումս հիմնականում որպես Լիկա է»,– ասաց նա։

Արփին ոչ միայն դերասանուհի և հաղորդավարուհի է, այլև երգչուհի։ Մասնագիտական հմտությունները նրան ստիպում են, երբեմն, չհամաձայնել ժյուրիի հետ և շատ ափսոսել երեխայի համար, որը չի անցել հաջորդ փուլ։ Ասում է` առաջինն է դիմավորում հաջորդ փուլ չանցած երեխաներին։ Թեև երեխաների հետ հարցազրույցներն անում է Ստեփանը և իր ապրումները եթերում չեն երևում, վստահեցնում է` բարդ է երեխաներին տխուր տեսնելը։

«Ամենաբարդը չընտրված երեխաներին դիմավորելն է։ Ես նրանց դիմավորում եմ մինչև կհասնեն կարմիր սենյակ, որտեղ Ստեփանը հարցազրույց է անելու։ Իհարկե, ինքս ինձ նախապատրաստել եմ, բայց այդ պահին չես կարող չտրվել էմոցիաներին։ Ես երեխայի հետ ապրում եմ, հուզվում, որովհետև շատ լավ եմ հիշում ինձ այդ տարիքում, երբ ինքս էի մասնակցում մրցույթների։ Լինում են դեպքեր, երբ չեմ համաձայնում ժյուրիի անդամների հետ։ Օրինակ, երեկ մի քանի անգամ ուզում էի գնալ ու իրենց փոխարեն սեղմել կոճակը։ Եթե ես լինեի ժյուրիի անդամ, 80 տոկոսին կընտրեի։ Իսկապես, շատ լավ երեխաներ են հավաքված։ Ես, իհարկե, չեմ փորձի չարաշահել իմ տեղն ու դիրքը։ Այստեղ հաղորդավարուհի եմ, ժյուրիի աթոռին նստած են երաժիշտներ, բայց, երբեմն, անում եմ իմ մեկնաբանությունները ու հանդես եմ գալիս երեխաների կողմից»,– ասաց նա։