Ջավախքում կբացվի «Թումո» ստեղծարար տեխնոլոգիաների կենտրոն

Ջավախքում ևս առաջիկայում կացվի «Թումո» ստեղծարար տեխնոլոգիաների կենտրոն: Ինչպես հաղորդում է «Արմենպրես»-ը` վկայակոչելով jnews.ge-ն, այս մասին հայտարարել է կենտրոնի գլխավոր տնօրեն Մարի Լու Փափազյանը «Ջավախքին աջակցություն» հիմնադրամի առաջին հաշվետու նիստի ժամաÕ �ակ:

Ջավախքի 12-18 տարեկան երեխաները ևս հնարավորություն կունենան ուսանել արտադպրոցական ուսումնական նոր միջավայրում և բացահայտել իրենց ստեխծարար ներուժը: «Թումո» կենտրոնի բացման համար ներկայում առաջնահերթ խնդիրը համապատասխան շենքի ընտրությունն է։ «Թումո» ստեղծարար տեխնոլոգիաների կենտրոնը լինելու է Ախալքալաքում:

«Կենտրոնի ստեղծման համար մեր նախատեսած երկու շենքերը փլատակ վիճակի մեջ են, և մեծ աշխատանք է պահանջվում դրանք բարեկարգելու համար։ Մոտավորապես երկու տարի անհրաժեշտ կլինի վերանորոգման, անհրաժեշտ ռեսուրսներով ապահովման համար»,- այս մասին հայտարարել է «Թումո» ստեղծարար տեխնոլոգիաների կենտրոնի գլխավոր տնօրեն Մարի Լու Փափազյանը «Ջավախքին աջակցություն» հիմնադրամի առաջին հաշվետու նիստի ժամանակ:

Նրա խոսքով` կստեղծվեն բոլոր հնարավոր պայմանները, որ կենտրոնը հասանելի լինի ոչ միայն Ախալքալաք քաղաքի, այլև շրջանի գյուղերի երեխաների համար։ Նրանց կապահովեն տրանսպորտային միջոցներով և այլ հարմարություններով։ Կենտրոնում կարող են ուսանել 12-18 տարեկան բոլոր ցանկացողները ՝ առանց բացառության:

«Մեր առաքելությունն է պատրաստել անհատներ, որոնք կլինեն մրցունակ, ինքնավստահ և օգնել նրանց բացահայտել իրենց ստեղծագործական ներուժը։ Առաջին երկու ամիսը կարելի է համարել ընդհանուր ունակությունների զարգացման շրջան, երբ նորեկը ծանոթանում է միջավայրին ու ուսուցման պայմաններին, ստանում ընդհանրական գիտելիքներ: Հետո, կողմնորոշվելով իր նախընտրությունների հարցում, ընտրում է կոնկրետ ուղղվածություն և խորացնում հմտություններն այդ բնագավառում»,- մանրամասնեց Մարի Լու Փափազյանը։

«Թումո» կենտրոնում ուսուցանում են գծագրություն, հաղորդակցության հմտություններ, նկարահանման աշխատանք, 3D մոդելավորում, ծրագրավորում, դիզայն։ Դասավանդում են տարբեր մեթոդներով՝ վարժություն, դասընթաց և նախագծում։ Վարժությունները կանխամտածված անցկացվում են և՛ հայերեն, և՛ անգլերեն լեզուներով, որի նպատակն է աշակերտների մեջ ինքնուրույն սովորելու ունակություն ձևավորել։

«Թումո» ստեղծարար տեխնոլոգիաների կենտրոնը ստեղծվել էր չորս տարի առաջ: Նպատակն է դեռահասներին տալ այնպիսի կրթություն, որը նրանք չեն ստանում դպրոցում։ Նրանց հնարավորություն տալ բացահայտել սեփական թաքուն ունակությունները, որոնք մինչ այդ անհայտ են եղել։ Այդ գաղափարի իրականացման արդյունքում կենտրոններ բացվեցին Երևանում, Գյումրիում, Դիլիջանում, Ստեփանակերտում։ Այս նախաձեռնությունից անմասն չի մնա նաև Ջավախքը։