Ովքե՞ր կարող են օգտվել անվճար իրավաբանական օգնությունից

«Փաստ» օրաթերթում այսուհետ կարող եք հետևել նոր՝ «Ճանաչեք և պաշտպանեք ձեր իրավունքները» խորագրին: Շատ են դեպքերը, երբ քաղաքացիները չեն կարողանում պաշտպանել իրենց իրավունքները, քանի որ իրազեկված չեն, իսկ երբեմն էլ որոշ պետական հիմնարկներ էլ ավելի են շփոթեցնում նրանց:

Օրաթերթը, համագործակցելով ՀՀ փաստաբանների պալատի հետ, այսուհետ հանրային իրազեկման արշավ է կազմակերպում, որը կօգնի մեր քաղաքացիներին իմանալ և պաշտպանել իրենց իրավունքները: Նշենք նաև, որ յուրաքանչյուր հինգշաբթի՝ ժամը 10:00-ից մինչև 17:00-ն փաստաբանների պալատի հանրային պաշտպանի գրասենյակն անվճար խորհրդատվություն է տրամադրում ՀՀ բոլոր քաղաքացիներին:

Հարց- Ովքե՞ր կարող են օգտվել պետության կողմից երաշխավորված անվճար իրավաբանական օգնությունից:

Հարցին պատասխանում է հանրային պաշտպան Տաթևիկ Շալջյանը:

Պետությունը, ՀՀ փաստաբանների պալատի հանրային պաշտպանի գրասենյակի միջոցով, Սահմանադրությամբ երաշխավորված անվճար իրավաբանական օգնություն է տրամադրում հետևյալ անձանց.

• ՀՀ սահմանների պաշտպանության ժամանակ զոհված (մահացած) զինծառայողի ընտանիքի անդամներին,

• 1-ին և 2-րդ խմբի հաշմանդամներին, • դատապարտյալներին, 

• ընտանիքների անապահովության գնահատման համակարգում հաշվառված` 0-ից բարձր անապահովության միավոր ունեցող ընտանիքի անդամներին,

• Հայրենական մեծ պատերազմի և ՀՀ սահմանների պաշտպանության ժամանակ մարտական գործողությունների մասնակիցներին,

• գործազուրկներին,

• միայնակ բնակվող կենսաթոշակառուներին, 

• առանց ծնողական խնամքի մնացած երեխաներին, ինչպես նաև առանց ծնողական խնամքի մնացած երեխաների թվին պատկանող անձանց,

փախստականներին,

• ՀՀ-ում ժամանակավոր պաշտպանություն ստացածներին

• անվճարունակ այն ֆիզիկական անձանց, որոնք իրենց անվճարունակությունը հաստատող հավաստի տվյալներ են ներկայացնում: Անվճարունակ է համարվում այն ֆիզիկական անձը, որը չունի բավարար եկամուտ, համատեղ բնակվող աշխատող ընտանիքի անդամ, ինչպես նաև բացի անձնական բնակարանից, որպես սեփականություն չունի այլ անշարժ գույք կամ նվազագույն աշխատավարձի հազարապատիկը գերազանցող արժեքի փոխադրամիջոց,

• հոգեբուժական կազմակերպությունում բուժվող հոգեկան խանգարումներ ունեցող անձանց,

• օրենքով սահմանված կարգով մարդկանց թրաֆիքինգի և շահագործման ենթարկված զոհերի նույնացման հանձնաժողովի կողմից զոհ կամ հատուկ կատեգորիայի զոհ ճանաչված անձանց,

• ՀՀ-ում ապաստան հայցողներին• խոշտանգումից տուժած անձանց՝ ՀՀ քաղաքացիական օրենսգրքի 1087.3-րդ հոդվածով սահմանված կարգով փոխհատուցում ստանալու նպատակով,

• «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» ՀՀ օրենքի համաձայն ընտանիքում բռնության ենթարկված անձանց:

Նշված անձանց անվճար իրավաբանական օգնություն ցույց չի կարող տրվել.

• ձեռնարկատիրական բնույթի գործերով (ներառյալ` կոորպորատիվ վեճերով),

• նվազագույն աշխատավարձի հազարապատիկը՝ 1,000 000 ՀՀ դրամը գերազանցող գույքային (գումարի) պահանջով գործերով, բացառությամբ այն գործերի, որտեղ անձը հանդես է գալիս որպես պատասխանող կամ պատասխանողի կողմում հանդես եկող երրորդ անձ,

• եթե առկա են դիմող անձի անվճարունակությունը ժխտող փաստական հավաստի տվյալներ:

Իրենց դիմումի հիման վրա անվճար իրավաբանական օգնություն չի տրամադրվում նաև քրեական գործով կասկածյալի կամ մեղադրյալի դատավարական կարգավիճակ ունեցող անձանց: Այդպիսի դեպքերում տվյալ անձինք պետք է դիմեն քրեական վարույթն իրականացնող մարմնին, որի որոշման հիման վրա էլ հանրային պաշտպանի գրասենյակը կապահովի անձի պաշտպանությունը: