Ավ­տո­երթ և հան­րա­հա­վաք. ջեր­մուկ­ցի­նե­րը պա­հան­ջում են չան­տե­սել իրենց ձայ­նը

Ջերմուկ համայնքի բնակիչներն ավտոերթ և հանրահավաք են նախաձեռնել՝ «Հանուն Ամուլսարի փրկության»: Մայիսի 11-ին՝ առավոտյան ժամը 9:30-ին, մեքենաները կուղևորվեն Ջերմուկից դեպի Արենի, իսկ ժամը 13:00-ին՝ հակառակ ուղղությամբ: Երևանի և Հայաստանի այլ համայնքներից ցանկացողները ժամը 13:00-ին Արենիում կարող են միանալ ավտոերթին:

«Մեր հիմնական միջոցառումը հանրահավաքն է, որը պետք է տեղի ունենա Ջերմուկում: Ուղերձ ենք հղում կառավարությանը, որ Ամուլսարի ոսկու հանքի վերաբերյալ որոշում կայացնելուց հենվի ոչ միայն բնապահպանական փորձագիտական արդյունքների, այլև Սահմանադրության և խախտված իրավունքների վրա, որոնք բարձրաձայնում են ջերմուկցիները: Հանրահավաքի և ավտոերթի միջոցով կառավարությանն ուղերձ ենք հղում, որ ուշադրություն դարձնի նաև այլ բաղադրիչների և ոչ միայն բնապահպանության վրա:

Ջերմուկում մարդիկ են ապրում: Ամուլսարի ճանապարհները փակող ջերմուկցիները միայն բնապահպանական հարցեր չեն բարձրացնում: Կան էլ ավելի կարևոր խնդիրներ: Հանքարդյունաբերության պատճառով մենք ռեալ տնտեսական վնասներ ենք կրում: Ջերմուկի իմիջի հետ կապված լուրջ խնդիրներ են առաջացել այս տարիների ընթացքում, ինչն էլ հանգեցրել է զբոսաշրջիկների թվի կտրուկ անկմանը: Փաստացի տարեկան 2000 զբոսաշրջիկ պակաս է եկել Ջերմուկ: 

Մարդիկ ամբողջ գարնանը Ջերմուկում սունկ և բույսեր էին հավաքում ու բավական հաջող վաճառք իրականացնում: Սակայն Երևանում սկսեցին դրանք չգնել՝ ասելով, որ թունավորված են: Էական չէր, որ հանքը չէր գործում, Երևանում կարծում էին, որ տարածքը թունավոր է», - «Փաստի» հետ զրույցում ասում է Ջերմուկ համայնքի բնակիչ Վազգեն Գալստյանը:

Հարցին՝ իսկ եթե հանքը նորից շահագործվի, ինչ քայլերի կգնան համայնքի բնակիչները, պատասխանում է. «Չեմ կարծում, թե այդ լուրն ուրախությամբ կընդունենք, բայց կառավարության համար լուծելու նոր խնդիրներ կառաջանան: Չգիտեմ, թե ինչ գործողությունների կդիմենք, բայց այն, որ կառավարության կայացրած որոշման և հասարակական շահերի բախում կառաջանա, ակնհայտ է: Մենք հենց դա էլ ուզում ենք ցույց տալ, որ պետք է ավելի մանրակրկիտ ուսումնասիրեն հարցը, և նախքան որոշում կայացնելը՝ հաշվի առնեն բոլոր բաղադրիչները», - ընդգծում է Գալստյանը:

Նա ասում է, որ վերջերս կրկին մի շարք խախտումներ են բացահայտել փաստաթղթերում:

««Լիդիանը» մի քանի անգամ պետությանը ՇՄԱԳ (շրջակա միջավայրի վրա ազդեցության գնահատում) է ներկայացրել: 3-4 անգամ ներկայացված ՇՄԱԳ-ի մեջ նշված է եղել, որ ազդեցությունը ստորերկրյա ջրերի վրա 0 է, որովհետև տարածքում ստորերկրյա ջրեր չկան: Խոսում էին լեռնային կազմի մասին, որ երկրաբանական այդ կառուցվածքի պարագայում ուղղակի ստորերկրյա ջրեր չեն լինում: Բայց 2016 թվականին ներկայացված ընդհանուր փաստաթղթերում, որոնց հիման վրա բնապահպանության նախարարությունը եզրակացություն է տալիս, մի շարք թվեր են նշված: Օրինակ, փաստաթղթում գրված է, որ ստորերկրյա ջրերի հետ կապված խնդիր կա: Բացի դա, որ Կեչուտի խմելու ջրերը մոտ 10 %-ով կրճատվելու են։ Նման խնդիրներ էլի կան: Բայց հանրային լսումներ չեն կազմակերպվել, որ բնակչությունը տեղյակ լինի: Որոշել են, համաձայնության եկել կառավարության հետ և թույլտվություն ստացել», - փաստում է Գալստյանը:

Վերջերս ՀՀ վարչական դատարանը բավարարել էր «Լիդիան Արմենիայի» հայցն ընդդեմ ոստիկանության: Ավելի վաղ մեզ հետ զրույցում Վազգեն Գալստյանն ասել էր, որ դատարանը որոշում է կայացրել Ամուլսարի տարածքում համայնքի բնակիչների տեղադրած գույքի ապամոնտաժման վերաբերյալ: Հետաքրքրվեցինք, թե ո՞ր փուլում է այս գործընթացը:

«Դատարանի որոշումն ուժի մեջ կմտնի մինչև մայիսի 10-ը, եթե ոստիկանությունն այն չբողոքարկի: Դատարանը պարտավորեցրել է, որպեսզի ոստիկանությունը գործողությունների դիմի: Եթե ոստիկանությունը բողոքարկի, դատական պրոցեսը կշարունակվի», - եզրափակում է մեր զրուցակիցը

ԼՈՒՍԻՆԵ ԱՌԱՔԵԼՅԱՆ