Ի՞նչ չափանիշներ են գործում գովազդի համար

«Փաստ» օրաթերթը շարունակում է ներկայացնել «Ճանաչեք և պաշտպանեք ձեր իրավունքները» խորագիրը: Շատ են դեպքերը, երբ քաղաքացիները չեն կարողանում պաշտպանել իրենց իրավունքները, քանի որ իրազեկված չեն, իսկ երբեմն էլ որոշ պետական հիմնարկներ էլ ավելի են շփոթեցնում նրանց:

Օրաթերթը, համագործակցելով ՀՀ փաստաբանների պալատի հետ, այսուհետ հանրային իրազեկման արշավ է կազմակերպում, որը կօգնի մեր քաղաքացիներին իմանալ և պաշտպանել իրենց իրավունքները: Նշենք նաև, որ յուրաքանչյուր հինգշաբթի՝ ժամը 10:00-ից մինչև 17:00-ն փաստաբանների պալատի հանրային պաշտպանի գրասենյակն անվճար խորհրդատվություն է տրամադրում ՀՀ բոլոր քաղաքացիներին:

Հարց.- Ինչպիսի՞ն պետք է լինի գովազդը, ի՞նչ չափանիշներ են սահմանված դրա համար:

Պատասխանում է հանրային պաշտպան Նաիրա Համբարձումյանը:

Գովազդը պետք է լինի օրինական, հավաստի և պատշաճ, իսկ գովազդի լեզուն՝ գրական հայերեն։ Գովազդի շարադրանքը պետք է ապահովի գրական հայերենի անաղարտությունը, պահպանի ամրագրված լեզվական կանոնները։ Ավելին, Հայաստանում միայն օտար լեզվով գովազդն արգելվում է։ Սակայն այս արգելքը չի տարածվում օտար լեզուներով գրանցված ապրանքային նշանների և մակնիշների վրա: Օտարալեզու բովանդակության օգտագործումն էլ գովազդում պետք է համապատասխանի օրենսդրության պահանջներին: 

Ֆիզիկական անձանց անվան կամ պատկերների օգտագործումը գովազդում, առանց նրանց համաձայնության, չի թույլատրվում:

Գովազդի օրինական լինելը նշանակում է, որ գովազդը չպետք է իրականացվի օրենքների խախտմամբ: Գովազդը օրինական չէ, երբ այն իրականացվում է՝ օգտագործելով. • մարդկանց վստահությունը, փորձի կամ գիտելիքների պակասը,

• նախապաշարումները և սնահավատությունը,

• մրցակիցներին, նրանց արտադրանքն ու իրացվող ապրանքների հատկությունները վարկաբեկող արտահայտությունները կամ այլ անհարկի համեմատությունները, 

• քաղաքացիներին բռնության, հարձակողականության, խուճապի, ինչպես նաև բարոյականության համընդհանուր նորմերի խախտման դրդող կոչերը,

• սպառողի կյանքին, առողջությանը կամ անվտանգությանը սպառնացող գործողությունների դրդող կոչերը և փաստարկումները և այլն:

Արգելվում է այն գովազդը, որում խախտվում է գովազդի հավաստիությունը և որը վերաբերում է`

• ապրանքի հատկանիշներին, բնույթին, կազմին, պատրաստման ժամանակին, նշանակությանը, սպառողական հատկություններին, կիրառման պայմաններին, համապատասխանությանը ստանդարտին, քանակին, ծագման երկրին,

• գովազդի հրապարակման պահին ապրանքի արժեքին և գնին, վճարման լրացուցիչ պայմաններին, ապրանքի առաքմանը, փոխանակմանը, վերադարձմանը, նորոգմանը, սպասարկմանը, շահագործմանը, այլ ապրանքների, այլ կազմակերպությունների և մարդկանց իրավունքների և դիրքի հետ համեմատություններին և այլն:

Արգելվում է այն գովազդը, որում խախտվում է գովազդի պատշաճությունը, այն է` 1. վարկաբեկում է բարոյականության նորմերը,

2. պարունակում է ռասային, ազգությանը, մասնագիտությանը կամ սոցիալական ծագմանը, տարիքային խմբին կամ սեռին, լեզվին, կրոնական և այլ համոզմունքներին վերաբերող վիրավորական արտահայտություններ, համեմատություններ և պատկերներ,

3. ուղղակի կամ անուղղակի ձևով արատավորում կամ անհարգալից վերաբերմունք է արտահայտում պետական զինանշանի, դրոշի, օրհներգի, դրամանիշի և այլնի նկատմամբ,

4. վարկաբեկում է իրավաբանական և ֆիզիկական անձանց, ինչպես նաև արտադրական, առևտրային կամ այլ գործունեությունը, մասնագիտությունը, ապրանքատեսակը և այլն: