Հրդեհներ, ՃՏՊ-եր, այլ արտակարգ իրավիճակներ. ՀՀ ԱԻՆ-ը տեղեկացնում է

Past.am

Հայաստանի հանրապետության արտակարգ իրավիճակների նախարարությունը տեղեկացնում է հանրապետություն արձանագրված դեպքերի մասին:

Հրդեհ վագոն-տնակում

Հունիսի 16-ին, ժամը 13:03-ին «911» ծառայությանն ահազանգ է ստացվել, որ Արարատի մարզի Արգավանդ գյուղից Գեղանիստ գյուղ տանող ավտոճանապարհին այրվում է վագոն-տնակ:

Դեպքի վայր է մեկնել ԱԻՆ ՓԾ հրշեջ-փրկարարական ջոկատից  երկու մարտական հաշվարկ:

 Հրդեհը մեկուսացվել է ժ.14:53-ին, մարվել՝ ժ.15:57-ին:

Պարզվել է, որ քաղաքացի Ն.Ս.-ին պատկանող հողատարածքում այրվել են վագոն-տնակ (մոտ 12 քմ) և ներսում կուտակած շինարարական աղբ:

 

ՃՏՊ Ախուրյան-Բասեն ավտոճանապարհին. կա տուժած

Հունիսի 16-ին, ժամը 16:49-ին «911» ծառայությանն ահազանգ է ստացվել, որ Ախուրյան-Բասեն ավտոճանապարհին տեղի է ունեցել ՃՏՊ. անհրաժեշտ է փրկարարների օգնությունը:

Դեպքի վայր է մեկնել ԱԻՆ ՓԾ հրշեջ-փրկարարական ջոկատից մեկ մարտական հաշվարկ:

Պարզվել է, որ Ախուրյան-Բասեն ավտոճանապարհի 5-րդ կմ-ին «Mercedes» մակնիշի (վարորդ՝ Հ.Ս., ծնված 1992 թ.) ավտմեքենան դուրս է եկել ճանապարհի երթևեկելի հատվածից և կողաշրջվել, ինչի հետևանքով վարորդը տարբեր աստիճանի մարմնական վնասվածքներով հոսպիտալացվել է Գյումրու ԲԿ, որտեղ բժիշկները տուժածի առողջական վիճակը գնահատել են միջին ծանրության:

Փրկարարները հոսանքազրկել են ավտոմեքենան և փակել գազի բալոնի փականը:

 Հրդեհ անասնագոմում

Հունիսի 16-ին, ժամը 16:45-ին «911» ծառայությանն ահազանգ է ստացվել, որ Գեղարքունիքի մարզի Թթուջուր համայնքի 1-ին փողոցի տներից մեկին հարակից գոմում հրդեհ է բռնկվել։

Դեպքի վայր է մեկնել ԱԻՆ ՓԾ հրշեջ-փրկարարական ջոկատից մեկ մարտական հաշվարկ:

Հրդեհը մեկուսացվել է ժամը 17։45-ին, մարվել՝ 18։29-ին:

Պարզվել է, որ հրդեհի հետևանքով այրվել են քաղաքացի Ղ.Գ.-ին պատկանող անասնագոմի տանիքը՝ մոտ 80 քմ և տանիքում գտնվող մոտ 50 հակ անասնակեր։

 

Հրդեհ Հրազդան քաղաքում. տուժածներ չկան

 Հունիսի 16-ին, ժամը 20:01-ին «911» ծառայությանն ահազանգ է ստացվել, որ հրդեհ է բռնկվել Կոտայքի մարզի Հրազդան քաղաքի Միկրոշրջան թաղամասի «Բարեկամություն» կինոթատրոնում:

Դեպքի վայր է մեկնել ԱԻՆ ՓԾ հրշեջ-փրկարարական ջոկատից երեք մարտական հաշվարկ:

Պարզվել է, որ հրդեհը բռնկվել է Ա. Ղ.-ին պատկանող շինությունում:

Հրդեհը մեկուսացվել է ժամը 22:05-ին, մարվել՝ 22:55-ին:

Այրվել են շինության փայտե առաստաղը (մոտ 800 քմ), ներքին երեսպատումը (մոտ 600 քմ) և բեմահարթակը (մոտ 40 քմ): Հրդեհի հետևանքով տուժածներ չկան:

 

Հրդեհ Ջրառատ գյուղում. տուժածներ չկան

Հունիսի 16-ին, ժամը 19:52-ին «911» ծառայությանը տեղեկություն է հաղորդվել, որ Արմավիրի մարզի Ջրառատ գյուղում այրվում է չշահագործվող պահեստ:

Դեպքի վայր է մեկնել ԱԻՆ ՓԾ հրշեջ-փրկարարական ջոկատից մեկ մարտական հաշվարկ:

Հրդեհը մեկուսացվել է ժամը 20:30-ին, մարվել՝ 20:56-ին:

Այրվել է չգործող շինության սառնարանը՝ իր ջերմամեկուսիչ պենոպլաստներով (մոտ 300 քմ):

 

Հրդեհ ավտոտնակում. տուժածներ չկան

 Հունիսի 16-ին, ժամը 16:44-ին «911» ծառայությանն ահազանգ է ստացվել, որ Երևան քաղաքի Սեբաստիա փողոցի թիվ 84 հասցեում գտնվող Շավարշ Սիմոնյանի անվան թիվ 112 փորձարարական ավագ դպրոցի մոտակայքում այրվում է ավտոտնակ:

Դեպքի վայր է մեկնել ԱԻՆ ՓԾ հրշեջ-փրկարարական ջոկատից երկու մարտական հաշվարկ:

Պարզվել է, որ հրդեհը բռնկվել է Ծերենցի փողոցի թիվ 5 շենքի մոտակայքում գտնվող ավտոտնակում:

Հրդեհը մեկուսացվել է ժամը 16:59-ին, մարվել՝ 17:07-ին: Մ.Ե.-ին պատկանող ավտոտնակում այրվել են կենցաղային իրեր և ավտոպահեստամասեր՝ 15 քմ:

 

Փրկարարները հեռացրել են շենքի տանիքից կախված երկաթյա թիթեղը

 Հունիսի 16-ին, ժամը 18:24-ին «911» ծառայությանն ահազանգ է ստացվել, որ Արմավիրի մարզի Արմավիր քաղաքի Սայաթ-Նովայի փողոցի թիվ 109 շենքի տանիքի թիթեղը պոկվել է, առկա է ընկնելու վտանգ. անհրաժեշտ է փրկարարների օգնությունը:

Դեպքի վայր է մեկնել ԱԻՆ ՓԾ հրշեջ-փրկարարական ջոկատից մեկ մարտական հաշվարկ:

Փրկարարները հեռացրել են շենքի տանիքից կախված երկաթյա թիթեղը: