«Մի­մյանց հար­գե­լու տե­սան­կյու­նից ոչ թե առա­ջըն­թաց, այլ հե­տըն­թաց ենք ապ­րում»

Ազգային ժողովի «Բարգավաճ Հայաստան» խմբակցության պատգամավոր Գևորգ Պետրոսյանի ֆեյսբուքյան էջն արգելափակվում է արդեն չորրորդ անգամ: Պատգամավորը «Փաստի» հետ զրույցում խոսել է այն միտումների մասին, որոնք ինքն է տեսնում՝ բարձրաձայնելով նաև օրենսդրական փոփոխությունների անհրաժեշտության մասին:

«Տպավորություն ունեմ, որ այդ եղանակով որոշ մարդիկ ինձ փորձում են լռեցնել, որովհետև վերջին մեկուկես ամսվա մեջ ֆեյսբուքյան էջը չորրորդ անգամ արգելափակելն աննախադեպ երևույթ է:

Հավանաբար, առանձին մարդիկ խոցվում են իմ ելույթներից, կարծիքներից և հավանաբար մի կազմակերպված խումբ կա, որի շահերից չեն բխում իմ ելույթները:

Ըստ այդմ՝ կազմակերպվում են՝ էջս արգելափակելու համար: Ասում են՝ եթե միանգամից 100-ից ավելի օգտատեր արգելափակում է էջը, Ֆեյսբուքը էջդ արգելափակում է՝ որպես անբարեխիղճ օգտատեր: Խոսքի ազատությունը լռեցնելու համար շատ տհաս տեխնոլոգիա է ընտրված:

Շատերն աչքի են ընկնում ավելի սուր, ավելի վիրավորական արտահայտություններով, բայց, կարծես թե, ես եմ թիրախավորված: Որ օրը ես քննադատական կարծիք եմ հայտնում, և հատկապես ԼԳԲՏ համայնքի վերաբերյալ որևէ ելույթ ունենում կամ գրառում անում, մեկ ժամ հետո էջս արգելափակվում է: Հիմա ով էլ լիներ իմ փոխարեն, իրավունք կունենար կասկածել, որ սա ուղղորդված է. ես որևէ մեկին չեմ անհանգստացնում, չեմ հրապարակում այնպիսի պատկերներ, չեմ անում արտահայտություններ, որոնք հակասում են Ֆեյսբուքի կանոններին»,-նշում է պատգամավորը՝ նշելով, որ ընդամենը սուր ելույթից, սուր հարցից ու գրառումից հետո մեկ ժամ չանցած՝ էջն արգելափակված է լինում:

«Փորձում են ինձ լռեցնել այդպիսի ճղճիմ եղանակով, բայց հայտարարում եմ՝ միևնույն է, ես չեմ լռելու: Ես խոսեցի համասեռամոլության քարոզը քրեականացնելու մասին, անմիջապես էջս ագելափակվեց, երբ կտրուկ քննադատության ենթարկեցի առանձին իշխանավորների առանձին հայտարարությունները՝ կապված Հայաստան-Արցախ փոխհարաբերությունների հետ, էջս արգելափակվեց: Կա մի խումբ, որի համար շատ անցանկալի են իմ գրառումները

Ուրիշ ողջամիտ վարկած չի կարող լինել, քան այն, որ սա ինչ-որ մի խումբ է, որը տառապում է իմ գնահատականներից, և ի նշան բողոքի, այդպիսի ակցիա են կազմակերպում: Սա խոսքի ազատությունը խեղդելու միջոց է: Գիտեք, ես ոչ պակաս ջանասիրությամբ քննադատել եմ նաև նախկին իշխանություններին, վարչապետներին, իրականությունը, բայց այսպիսի տոտալ գրոհ խոսքի ազատության նկատմամբ երբեք չի եղել»,-ընդգծեց Գ. Պետրոսյանը՝ հավելելով, որ առհասարակ ԱԺ ամբիոնից հնչած ելույթներին հետևում են ոչ թե իրավաքաղաքական վերլուծությունները, այլ պարզապես գաղտնի էջերից, ծպտյալ օգտատերերի կողմից տարածվող վիրավորանքները:

«Բայց սա համահունչ չէ սիրո և համերաշխության մթնոլորտին, նոր Հայաստանի բարքերին: Ընդհակառակը՝ մի բան էլ քաղաքակրթության, հասարակական անդորրի, միմյանց հարգելու տեսանկյունից ոչ թե առաջընթաց, այլ հետընթաց ենք ապրում»,նշեց նա:

Գևորգ Պետրոսյանն օրենսդրական փոփոխությունների կարիք է տեսնում, ըստ որի՝ Քրեական օրենսգիրքը կլրացվի «քաղաքական այլախոհության հետապնդումն օրենքով պատժելի լինելու» հանցակազմով:

Պատգամավորը հայտնեց, որ ֆեյսբուքյան էջի վերաբերյալ դիմել են ԱԳ նախարարությանը՝ իր օգնականն է զբաղվել այդ հարցով. «Այդ տեխնիկական հարցերին չեմ տիրապետում, դրա մասնագետը չեմ, բայց եթե Ֆեյսբուքին իրազեկում ես, որ քաղաքական գործչի քաղաքական հայացքներից բխող գնահատականների արտահայտումը սահմանափակվում է, նշան են դնում և էջն անձեռնմխելի է դառնում: Իմ օգնականի և ԱԳՆ աշխատակցի միջև է եղել զրույցը: Երբ իմացել են, թե որ պատգամավորի օգնականն է, ասել են՝ մենք առանձին հայտեր չենք բավարարում, պետք է կոլեկտիվ հայտ լինի: Ես չեմ հասկանում՝ եթե մյուս պատգամավորներն այդ խնդիրը չունեն, ես ո՞ւմ համոզեմ գա ու ինձ հետ դիմում գրի»:

ԱՆՆԱ ԲԱԴԱԼՅԱՆ