Տեխզնն­ման կտրոն­նե­րի առա­քումն ուշա­ցել է.հ/կ-ն ահա­զան­գում է, նա­խա­րա­րու­թյու­նը՝ պար­զա­բա­նում

«Վարորդի ընկեր» ԻՀԿ-ն տեղեկացնում է՝ վարորդներն ահազանգում են, որ հուլիս ամսվա համար պատվիրված տեխզննման կտրոնները մինչ օրս չեն առաքվել: ԻՀԿ փոխնախագահ Դավիթ Պեդանյանը «Փաստի» հետ զրույցում նախ պարզաբանում է ստեղծված իրավիճակը: «Խոսքը «E-payments.am» համակարգի միջոցով անկանխիկ ու առցանց պատվիրված տեխզննման կտրոնների մասին է, որոնք պետք է առաքվեն քաղաքացու բնակության հասցեով: Ներկա պահին համակարգը գործում է միայն Երևանում հաշվառված փոխադրամիջոցների համար: Առաքումն ամենաշատը տևում է 3-5 օր՝ պատվիրելու պահից սկսած: Ընդ որում՝ պատվիրելու պահին վարորդը կարող է զանգահարել և ասել, որ ինքն է մոտենում կտրոնը վերցնելու: 3-5 օրը կապված է առաքման աշխատանքի հետ», - ասում է Պեդանյանը:

Նա հիշեցնում է, որ տեխզննման կտրոնի վրա միայն ամիս է գրված՝ առանց կոնկրետ ամսաթվի: «Տեխզննման կտրոնի ժամկետը կվերջանա հունիսի 1-ին, թե հունիսի 30-ին, միևնույն է՝ այն վերջանում է հունիսի 30-ով: Մեր վարորդները շատ հաճախ դրանից օգտվելով՝ մի օր մեքենան չեն վարում, հաջորդ օրն են պատվիրում կտրոնը և «մի ամիս առաջ են գցում» իրենց տեխզննման կտրոնը: Դրա հետևանքով տեխզննում անցնելու շրջանը վարորդների կտրուկ մեծամասնության մոտ «ընկնում է» դեկտեմբերին: Մեր գործընկերոջը, որը բախվել էր տեխզննման կտրոնի առաքման խնդրին, ասել էին, որ մոտ 50 հոգի է առցանց պատվիրել է կտրոնը, ու այն երկու շաբաթ է՝ տեղ չի հասել:

Չեմ սխալվի, եթե ասեմ, որ 50 կտրոնը մեծ թիվ չի, որ խնդիրներ առաջանային», - ընդգծում է մեր զրուցակիցը՝ շեշտելով, որ առաջացած խնդիրը հիմնականում կապվում է նախարարությունների միավորման հետ: 

«Ստացվում է, որ նորաստեղծ նախարարության տրանսպորտի վարչությունն իր առաջին թեսթը չհանձնեց: Այս գործը բավական սահուն ձևով պետք է արվեր, նույնիսկ կարող էին տեխզննման կտրոնների, այսպես կոչված, հանձնում-ընդունում չանել: Վարորդների թվաքանակը կա, դրա հիման վրա ամեն տարի տեխզննման կտրոններ են տպվում և «սպասում» վարորդներին: Խնդիրը երևի եղել է առաքման ժամանակ, իսկ թե ինչու են այդ հարցում թերացել, դժվար է ասել», - նշում է ԻՀԿ փոխնախագահը՝ հավելելով, որ տեխզննում անցնելու համար վարորդին պետք է ամենաշատը մեկ ժամ, սակայն նա պետք է ունենա տեխզննման կտրոնը, որպեսզի մեքենան տանի տեխզննման:

«Եթե նույնիսկ տեխզննման կտրոնները տան հուլիսի 1-ին, վարորդները չեն հասցնելու սա անել: Նշանակում է, որ ունենալու ենք X թվով վարորդներ, որոնք չեն ստացել տեխզննման կտրոնները, ստիպված տեխզննում չեն անցել և հիմա փաստորեն պետության մեղքով օրենք են խախտում», ասում է Պեդանյանը:

Արձագանքում ենք՝ չէ՞ որ կան նաև վարորդներ, որոնք վճարումները թողնում են վերջին օրվան: «Անպարտաճանաչ մարդիկ կան տարբեր ոլորտներում: Այստեղ խնդիրն այն է, որ մեզ մոտ տեխզննումն, ըստ էության, ձևական բնույթ է կրում, վարորդներն էլ դրան անլուրջ են վերաբերվում: Հավել յալ հարկ է, որին տվել են տեխզննում անունը: Ես, օրինակ, իմ տեխզննման կտրոնը պատվիրում եմ մի ամիս առաջ, որ փոստով ճիշտ ժամանակին տեղ հասնի: Եթե տեխզննման կտրոնը ծառայեր իր նպատակին, ապա անբարեխիղճ վարորդների թիվն էլ քիչ կլիներ: Մարդիկ, որոնք էլեկտրոնային համակարգից են օգտվում, անկանխիկ վճարում կատարում, ավելի ուշադիր են և սովորաբար կտրոնները պատվիրում են 2 շաբաթ առաջ այն հաշվարկով, որ 5 օրում դրանք պետք է տեղ հասնեն, 10 օրում էլ իրենք ժամանակ կունենան և տեխզննումը կանցնեն», - արձագանքում է ԻՀԿ փոխտնօրենը:

ԻՀԿ-ն նախարարությանը հորդորում է խնդրի վերաբերյալ հանդես գալ պաշտոնական հայտարարությամբ, որպեսզի ճանապարհային ոստիկանությունը ևս տեղեկանա խնդրին և, մինչ հարցը լուծվի, վարորդներին մեղմ վերաբերվի: Բացի դա, այն վարորդներին, որոնք «E-payments.am» համակարգի միջոցով են վճարումներ կատարել, սակայն գնացել են նախարարություն և վերցրել իրենց կտրոնները, վերադարձվեն նրանց կատարած հավել յալ վճարումները:

«Փաստը» առաջացած խնդրի վերաբերյալ մեկնաբանություն խնդրեց տարածքային կառավարման և ենթակառուցվածքների նախարարությունից, որի հասարակայնության հետ կապերի բաժնի պետ Վարուժան Հարությունյանը մեզ հետ զրույցում մասնավորապես նշեց. «Առաջացած խնդիրը կապված է նախարարության կառուցվածքային փոփոխությունների հետ և շուրջ 400 հազար տեխզննման կտրոնի հանձնման-ընդունման գործընթացով: Նախարարությունների միավորումից հետո առաջացել է գործառութային ադապտացման խնդիր: Դրանով պայմանավորված՝ բացառապես էլեկտրոնային համակարգի առցանց եղանակով պատվիրված կտրոնների մասով մի փոքր ուշացումներ են գրանցվել: Այս պահին մեր նախարարությունից իրականացվում է առաքման ծառայություն, իսկ կտրոնների առձեռն հանձնման պարագայում առհասարակ խնդիր չի առաջացել:

Մեր նախարարության համապատասխան ստորաբաժանմունքում քաղաքացիները մոտենում են և իրենց կտրոնները ստանում:

Քաղաքացիների համար առաջացել է անհաղթահարելի խնդիր, որը մեր կողմից վերացվել է: Չեմ կարծում, որ երբ վարորդները գնան տեխզննման կայան, իրենց համար խնդիր, այսինքն՝ վարչական պատասխանատվություն կառաջանա:

Հույս ունենք, որ ճանապարհային ոստիկանության հետ նույնպես քաղաքացիները խնդիր չեն ունենա: Սա քաղաքացու կողմից չարամտություն չէ, այլ՝ օբյեկտիվորեն առաջացած խնդիր: Նման խնդիրներ հետագայում չեն առաջանա, քանի որ փորձում ենք հնարավորինս շուտ կառուցվածքային փոփոխությունների այն գործառույթները, որոնք մեզ են փոխանցվել և մինչ այս մեզ ծանոթ չեն եղել, դնել գործնական ռելսերի վրա, որ ապագայում նմանօրինակ խնդիրներ չառաջանան», - տեղեկացնում է Վարուժան Հարությունյանը:

ԼՈՒՍԻՆԵ ԱՌԱՔԵԼՅԱՆ