Էլեկտրաէներգիայի թանկացման դեմ մեր ժողովուրդը բողոքում է տանը նստած. Կարեն Քոչարյան

Մեր ժողովուրդն անընդհատ բողոքում է, բայց երբ պահը գալիս է, ոչ ոք դուրս չի գալիս փողոց բողոքելու:

«Sputnik-Արմենիա» ռադիոկայանի հետ զրույցում ասել է Քաղաքական և ընտրական տեխնոլոգիաների փորձագետ Կարեն Քոչարյանը՝ անդրադառնալով հոսանքի թանկացման դեմ անցկացվող բողոքի հանրահավաքին եւ նստացույցին: Բանախոսը ցավով արձանագրում է, որ խնդիրը ոչ թե քաղաքական է, այլ սոցիալական, այնուհանդերձ, բոլորը միայն տանը նստած են բողոքում:

«Մի կողմից մթնոլորտն ինձ դուր էր գալիս, այն առումով, որ երիտասարդներ էին, և այն, որ երկար ժամանակ սպասվում էր, որ երիտասարդությունը գա փոխարինելու այս «մսից հոսանք» ստացող սերնդին: Մյուս կողմից, երիտասարդների շրջանում նշմարվում է անփորձություն, և կա մի շատ վատ բան, որը իմ մեծ լավատեսության պարագայում, մի փոքր վշտացնում է. այն, որ մարդիկ դուրս չեն գալիս պայքարելու իրենց իրավունքների համար:

Գուցե ես սուբյեկտիվ եմ և սխալ, բայց մեղադրում եմ այն մարդկանց, ովքեր չեն գնում ցույցի»,-նշել է նա: Այս պայքարը, միևնույն է, պետք է լուծվի քաղաքական մակարդակով: Մինչդեռ, պայքարի դուրս եկած երիտասարդները չեն թողել, որպեսզի քաղաքական ուժերը բարձրանան հարթակ: Քոչարյանն ընդգծում է, որ այդ հարցը կլուծվի այն ժամանակ, երբ այդ քաղաքական հարթակում կլինեն քաղաքական կերպարներ: «Այդ քաղաքական հարթակն Ազգային ժողովն է, եւ այդ հարցը կլուծվի այն ժամանակ, երբ այնտեղ լինեն քաղաքական կերպարներ, ոչ թե՝ ով պատահի: Այդ քաղաքական հարթակում անգամ գրել, կարդալ չգիտեն, չգիտեն ինչի համար են կոճակ սեղմում:

Մինչդեռ հոսանքի հարցը շատ գլոբալ է, այն առումով, որ կան երկկողմ ռիսկեր»,-ասել է նա:

Փորձագետն այս հարցում չի մեղադրում ընկերության գլխավոր տնօրեն Բիբինին: Նա մեղադրում է հայրենական իշխանություններին, Հանրային ծառայությունները կարգավորող հանձնաժողովին: «Փոխարեն Բիբինին ասելու, որ բացի իրավունքներից՝ ունես նաև պարտականություններ, հետեւաբար՝ կհավաքես «փասա-փուսեդ» ու կգնաս, եւ քո տեղն ուրիշը կաշխատի, դեռ մի բան էլ Բիբինի ասածն «ավետում» են ժողովրդին»,-իր վրդովմունքն է հայտնել բանախոսը: Պետությունը պետք է հասկանա, որ կան խնդիրներ, որոնք պետք է լուծվեն այնպես, որ չքաղաքականացվեն: Այս համատեքստում Կարեն Քոչարյանը հարցադրում է անում՝ ի՞նչ է նշանակում տարին մեկ անգամ հոսանքի գինը բարձրացնելը:

Բանախոսը կարծում է, որ ընդդիմադիր քաղաքական ուժերը սպասում են զարգացումների, հետո միայն կհայտնվեն ասպարեզում: «Նրանք հերթական անգամ չեն ցանկանում «ֆիասկո ապրել», այսինքն՝ չեն ցանկանում գալ, երևալ, հետո հերթական անգամ պարտվեն: Եթե տեսնեն այդ զանգվածը մեծանում է, ապա քաղաքական լիդերներ կտեսնենք հարթակում»,-համոզմունքն է հայտնել նա:

Փորձագետը կարծում է, որ մոտակա օրերին պարզ կլինի՝ արդյո՞ք այս «խմորը շատ ջուր կքաշի»: Այնուհանդերձ, ըստ Քոչարյանի, եթե ոչ հիմա, ապա նոյեմբեր- դեկտեմբեր ամիսներին, երբ ամեն ինչ զգալիորեն կթանկանա, չի բացառվում, որ այդ ժամանակ ինչ-որ բան կլինի:

«Կա մի օրենք, որ վկայակոչում է, որ հոսանքի լարումը՝ U-ն, հավասար է հոսանքի ուժի A և հոսանքի դիմադրության R արտադրյալի: Հետևաբար՝ ստացվում է, որ հոսանքի ուժը և դիմադրությունը հակառակ համեմատական են: Եթե հոսանքի ուժը՝ իշխանությունների կամ ՀԷՑ-ի ուժն է կամ գնի բարձրացումը, իսկ R-ն՝ ոչ թե հոսանքի, այլ ժողովրդի դիմադրություն է, ապա ստացվում է, որ եթե դիմադրությունը մեծ է լինում, ախա այդ ուժը փոքրանում է, իսկ եթե դիմադրությունը ձգտում է 0-ի, ապա այդ ուժը և գինը ձգտելու են անվերջության»,- հոսանքի «լեզվով» մեկնաբանություն է արել Կարեն Քոչարյանը :