Քայլերթ Երևանի կենտրոնում՝ նվիրված Ամուլսարի պաշտպանությանը (տեսանյութ)

20:05

Գործնականում բացառվում է Ջերմուկի հարակից տարածքում հանքի շահագործումը: Այս մասին ասաց Երևանի ավագանու անդամ Դավիթ Խաժակյանը:

«Ամուլսարի շահագործումը բնապահպանական աղետի կարող է հանգեցնել: Վարչապետը պարզապես պետք է հասկանա, որ գործընթացը չի կարող գնալ այդ ուղղությամբ: Վարչապետի` Ջերմուկ այցը համոզելու գործընթաց էր, բայց դրա ժամանակն անցել է, իր փաստարկներն այլևս լսելի չեն կարող լինել»,- հավելեց նա՝ նշելով, որ կառավարությունը փորձում է ցույց տալ, որ ռիսկերը կառավարելի են:

Նա ասաց, որ գործընթացը փակուղում է, պետք է վերանայվի: 

20:04

Երթի հիմնական իմաստն այն է, որ ցույց տանք, որ մեր դիրքորոշումն անբեկանելի է: Այս մասին երթի ընթացքում ասաց նախաձեռնության անդամ Ալեքս Մելիքյանը: Նա նշեց, որ կառավարությունը երկար ժամանակ ուներ ընտրելու հանքի չշահագործման տարբերակը, բայց, ըստ նրա, Նիկոլ Փաշինյանը 99.9 տոկոսով վստահ է, որ Ամուլսարի շահագործումն անվնաս է: 

«Մեր երթի առաջնային պահանջն այն է, որ կասեցվի 2016թ.-ին տրված դրական եզրակացությունը, ինչից հետո Լիդիանը թող ինքը մտածի՝ ինչ անել»,- ասաց ակտիվիստը: 

Ալեքս Մելիքյանի խոսքով՝ ինքը տարբեր իրավաբաններից տարբեր տեսակետներ է լսել, թե արդյոք Լիդիանը կարո՞ղ է դիմել դատարան, թե չէ: 

«Վերջին տվյալներով` դատարան կարող են դիմել այն ժամանակ, երբ դրա մասին պայմանագրում գրված է, իսկ պայմանագիրն ասում է, որ եթե կոնֆլիկտ կա, պետք է կողմերը լուծեն»,- ասաց նա:

19:56

Ամուլսարի շահագործումը քիմիական տարրեր է դուրս բերելու, որի դեմը մենք չենք կարող առնել: Այս մասին քայլերթի ժամանակ հայտարարեց առողջապահական ոլորտի ներկայացուցիչ Հովհաննես Գևորգյանը: 

«Մեր հարգարժան վարչապետն ասում է, որ պաշտպանելու է ՀՀ հավասարակշռության շահերը՝ բարոյականության, տնտեսական, քաղաքական, բնապահպանական շահերը, ժողովրդի շահը: Որպեսզի հասկանանք՝ նժարի վրա որն է գերակշռում, մնում է տնտեսական ու քաղաքական օգուտը»,- ասաց նա: 

19:54

Երթին մասնակցում է ԲՀԿ խմբակցության պատգամավոր Նաիրա Զոհրաբյանը: Մեր թղթակցի հետ զրույցում վերջինս ասաց, որ Ամուլսարի շահագործումը կլինի ցեղասպանություն, ինչի մասին տարիներ առաջ իրենք ԱԺ ամբիոնից հայտարարել են: 

«Որևէ որոշում առանց ժողովրդի համաձայնության չի կարող կայացվել: Մենք այստեղ ենք, լիազորված ենք ջերմուկցիների շնորհիվ: Երկու կարծիք լինել չի կարող. եթե ժողովուրդը դեմ է, չի կարող հանքը շահագործվել: Ինձ համար անհասկանալի է, թե ինչի համար են դոլարներ վճարել մի կազմակերպության, որը նախորդ իշխանության կողմից արված ուսումնասիրությունների հիմքում եզրակացություն է տվել»,- ասաց նա: 

Նաիրա Զոհրաբյանի խոսքով՝ երթը վարչապետի դեմ չէ, պարզապես մարդիկ մտահոգ են, որովհետև հասկանում են, որ քաղցկեղի աճը բնապահպանական խնդիրներով ևս պայմանավորված է: 

«Կլինի վարչապետի հերթական խորհրդատվությունը Լիդիանի ղեկավարների հետ, կգան համաձայնության, օքեյ, չեն գա համաձայնության... »,- նշեց նա: Նա հիշեցրեց վարչապետի նախկինում արված հայտարարությունը, որ հանքարդյունաբերության վրա տնտեսությունը զարգացնելու մոտեցումը պետք է վերանայել: 

19:46

Խնդիրը ծայրաստիճան է դառնում ու վարչապետը պարտավոր է պահել իր խոստումը: Այս մասին երթի ժամանակ հայտարարեց «Լուսավոր Հայաստան» խմբակցության պատգամավոր Գևորգ Գորգիսյանը: 

«Եթե խոստացվել էր, թե քանի դեռ չկան հստակ երաշխիքներ, որ Ամուլսարի շահագործումը չի ունենա անդառնալի հետևանքներ, ուրեմն չպետք է այն շահագործվի: Ապացույցներ դեռ չկան»,- ասաց պատգամավորը: 

Գորգիսյանը նկատեց, որ հարցի առնչությամբ դիրքորոշում պետք է հայտնի նաև բնապահպանության նախարարը, այնինչ նա «Ձմեռ պապիկի, բարի փերիի պես մի բան է դարձել. բոլորը նրա մասին խոսում են, բայց նա գոյություն չունի»:

19:00

«Ամուլսարն առանց հանքի» նախաձեռնության անդամներն այս պահին պատրաստվում են մեծ քայլերթ իրականացնել Երևանի կենտրոնում՝ նվիրված Ամուլսարի պաշտպանությանը։

Քայլերթը մեկնարկում է Ազատության հրապարակից, կանցնի Մաշտոց, Ամիրյան, Տիգրան Մեծ, Խանջյան, Սայաթ Նովա փողոցներով և կավարտվի Ազատության հրապարակում։ 

Կազմակերպիչները հաղորդագրություն են տարածել, ըստ որի՝ քայլերթի նպատակն է՝
-Զորակցություն Ջերմուկի մեր պայքարող հայերնակիցներին,

-Մեր հստակ դիրքորոշման արտահայտումը թե՛ ներքին իշխանություններին, թե՛ արտաքին ուժերին,

-Մեր միասնականության և հավաքականության ցուցադրումն Ամուլսարի պաշտպանության հարցում։

Տարածված հայտարարության մեջ ասվում է նաև, որ ակնկալում են բոլոր մտահոգ քաղաքացիների ներկայությունն Ամուլսարի համար այս վճռորոշ օրերին։