«Ի՞նչ սրտով գնա­յի ու հաշ­վառ­վեի մի հի­վան­դա­նո­ցում, որ­տեղ շա­բաթ­ներ առաջ երի­տա­սարդ կի­նը և նրա չծնված երե­խան մա­հա­ցան

2008 թվականից հղիներին տրվում է ծննդօգնության պետական հավաստագիր, որի համաձայն՝ ՀՀ-ում հղիության ընթացքի և ծննդաբերության հետ կապված բժշկական օգնությունը և սպասարկումն իրականացվում է անվճար: 

Պետպատվերի շրջանակներում մատուցվող ծառայությունները ներառում են հղիության նախածննդյան հսկողությունը, ախտաբանական ընթացքի բուժօգնությունը, ծննդաբերությունը և հետծննդյան խնամքը, ծննդալուծումը կեսարյան հատման ճանապարհով:

Նոր մոլորակ չենք հայտնագործի, եթե ասենք, որ սա էականորեն նվազեցնում է ընտանիքի ծախսերը, որտեղ պետք է երեխա ծնվի, և շատ կարևոր է, որ պետությունը տարիներ առաջ ստանձնել և հիմա էլ շարունակում է կատարել այս պարտավորությունը: 

Մեր ընթերցողներից մեկը, սակայն, շաբաթներ առաջ մի խնդրի հետ է բախվել, երբ գնացել է Երևանի հիվանդանոցներից մեկը՝ որպես հղի հաշվառվելու: 

Մարին (անունը փոխված է-խմբ.) հաշվառված է Արարատի մարզում և չնայած ամուսնությունից հետո բնակվում է Երևանում, սակայն բնակության հաշվառման հասցեն չի փոխել: Օրեր առաջ, երբ նա հաշվառվելու նպատակով այցելել է երևանյան բժշկական կենտրոններից մեկը, նրան տեղեկացրել են՝ պետք է մի շարք վճարումներ կատարի: Վերջինս հետաքրքրվել է՝ իսկ ծննդօգնության պետական հավաստագի՞րը: 

Մարիին իրազեկել են, որ նա չունի Երևանի գրանցում, իրենց հիվանդանոցն էլ մասնավոր է, և դրա համար պետք է գնա իր հաշվառման վայր, այս դեպքում՝ Արարատի մարզ: 

Նա նշում է՝ մասնավոր հիվանդանոցում հաշվառվելը մեծ ծախսեր է պահանջում, ինչի հնարավորությունն ինքը չունի: 

Նաև հավելում է՝ որևէ դեպքում չի հաշվառվի Վեդու ծննդատանը: «Հեռավորությունը լուծելի խնդիր է: Մեքենայով կարող եմ մարզ հասնել հետազոտությունների կամ էլ ստուգման նպատակով: 

Բայց կա մեկ այլ, ավելի կարևոր խնդիր: Ի՞նչ սրտով գնայի ու հաշվառվեի մի հիվանդանոցում, որտեղ շաբաթներ առաջ երիտասարդ կինը և նրա չծնված երեխան մահացան: Ու դա առաջին դեպքը չէր: 

Բոլորն են խոսում, որ չնայած այդ հիվանդանոցնում ծննդկանների ու երեխաների մահվան դեպքեր էլի են գրանցվել, սակայն բժիշկները շարունակում են աշխատել»,«Փաստի» հետ զրույցում ասում է Մարին: 

Նա զանգահարել է առողջապահության նախարարություն՝ իրեն հուզող հարցերի պատասխանները ստանալու համար: 

Նրան տեղեկացրել են, որ ծննդօգնությունը կլինի անվճար, երբ նա հաշվառվի իր բնակության վայրում գտնվող հիվանդանոցում: 

Բացի դա, Երևանի հիվանդանոցներում մատուցվող բուժօգնությունն անվճար է նաև այն դեպքում, եթե մարզում հաշվառված ծննդկանի կամ նրա պտղի կյանքին վտանգ է սպառնում։ 

Այս դեպքում մարզային հիվանդանոցը տալիս է ուղեգիր, ըստ որի՝ ծննդկանը դիմում է մայրաքաղաքի այն հիվանդանոցը, որտեղ ցանկանում է անցնել բուժզննում:

Երկար պրպտումներից հետո Մարին այժմ հաշվառվել է Երևանի Սուրբ Գրիգոր Լուսավորիչ ԲԿ-ում, որտեղ հաշվառման օրից ոչ մի վճարում չի կատարել: 

Այստեղ անկետա են լրացրել, նա տեղեկանք է բերել իր փաստացի բնակության վայրից, որ այժմ ապրում է Երևանում: Վճարումներ կկատարի միայն այն դեպքում, երբ անհրաժեշտություն առաջանա լրացուցիչ հետազոտություն անցնելու մայրաքաղաքի որևէ ախտորոշիչ լաբորատորիայում։ 

Մարին նշում է՝ լիովին հասկանալի է, որ այս մեխանիզմը ստեղծվել է նրա համար, որ կանոնակարգվի հղիների՝ բժիշկներին դիմելիության խնդիրը. մարզում հաշվառված կանայք դիմեն մարզային, իսկ Երևանում հաշվառվածները՝ մայրաքաղաքի բուժհաստատություններ, և միայն ծայրահեղ անհրաժեշտության դեպքում կինը ուղեգրով գա մայրաքաղաքի հիվանդանոց: 

«Գաղափարը հասկանալի է, բայց մարզային բուժհաստատություններում խնդիրներ շատ կան: Եթե հաշվառվեի Վեդու հիվանդանոցում, արդյո՞ք իմ վախերը հղիությանս ընթացքում չէին վնասի թե՛ ինձ, թե՛ երեխայիս: 

Նախարարությունն այս խնդիրներին պետք է լուծումներ տա, իր ուշադրության կենտրոնում պահի հատկապես մարզային բուժհաստատությունները»,եզրափակում է մեր զրուցակիցը:

Հ. Գ. Մեր նյութի հերոսը կարողացել է կողմնորոշվել և ի վերջո գտնել բուժհաստատություն, որտեղ ծառայությունները մատուցվում են անվճար, բայց վստահաբար կան բազմաթիվ դեպքեր, երբ չիմացության կամ չկողմնորոշվելու դեպքում շատերը կկանգնեն նույն խնդրի առջև, ուստի նախարարությունը պետք է ձգտի նրան, որ գործընթացներն ավելի պարզ ու հասկանալի լինեն:

ԼՈՒՍԻՆԵ ԱՌԱՔԵԼՅԱՆ