Քա­ղա­քա­ցի­նե­րը կտե­սան­կա­րա­հա­նեն ճա­նա­պար­հա­յին եր­թև­ե­կու­թյան խախ­տում­նե­րը.կտու­ժի՞ ար­դյոք անձ­նա­կան կյան­քի գաղտ­նի­ու­թյու­նը

Ազգային ժողովը երկրորդ ընթերցմամբ և ամբողջությամբ ընդունեց երթևեկության կանոնների խախտումները նկարահանելու և ոստիկանությանը փոխանցելու օրենքի նախագիծը, որով քաղաքացիները հնարավորություն կունենան տեսանկարահանել ճանապարհային երթևեկության խախտումները և օնլայն ռեժիմով՝ հատուկ հավելվածի օգնությամբ, փոխանցել ճանապարհային ոստիկանությանը:

Օրինագիծը հանրային հարթակներում և Ազգային ժողովում կայացած քննարկումների ժամանակ տարակարծությունների տեղիք տվեց: 

Ընդհուպ կարծիքներ հնչեցին, որ այս նախագիծը մարդկանց միմյանց դեմ է հանելու, քաղաքացիներից որոշներն, օրինակ՝ կարող են «հետապնդել» մեկին և անընդհատ տեսանկարահանել հենց նրա խախտումները, բացի դա, այս նախագծի ընդունումը կհանգեցնի քաղաքացիների՝ հատկապես վարորդների կողմից նոր խախտումներ կատարելուն: 

Միչնդեռ նախագծի հեղինակ-պատգամավորները վստահ են, որ նաև այս օրինագիծն իրականություն դարձնելու միջոցով հնարավոր կլինի կրճատել տրանսպորտային պատահարները, հետևաբար՝ նաև զոհերի քանակը: 

Երկրորդ ընթերցմամբ և ամբողջությամբ ընդունվելուց առաջ օրինագծում որոշակի փոփոխություններ կատարվեցին: 

Օրինակ՝ նշվեց, որ կառավարությունը կսահմանի ամսական և տարեկան առավելագույն չափը, որով միևնույն քաղաքացուն հնարավորություն կտրվի իրավախախտում կատարած միևնույն անձի վերաբերյալ ուղարկել էլեկտրոնային հաղորդագրություն, այսինքն՝ կգործի սահմանափակում: 

Օրենքն ուժի մեջ կմտնի պաշտոնական հրապարակման օրվանից վեց ամիս անց:

«Վարորդի ընկեր» իրավապաշտպան ՀԿ-ի նախագահ Տիգրան Քեյանը նշում է, որ խախտումները, բացի վարորդներից, կարող է տեսանկարահանել ցանկացած քաղաքացի: 

«Եթե վարորդը գտնվում է երթևեկության մեջ, չպետք է տեսանկարահանի խախտումները: Նա դրանով ավելի մեծ վտանգ կստեղծի, եթե փորձի երթևեկության ընթացքում այդ համակարգի միջոցով իրավախախտում արձանագրել: 

Նա խախտումը չի նկարահանելու ո՛չ իր բջջային հեռախոսի տեսախցիկի, ո՛չ էլ մեքենայում առկա վիդեոռեգիստրատորի միջոցով: 

Հեռախոսի մեջ լինելու է համակարգչային ծրագիր՝ հավելված, որի միջոցով քաղաքացին պետք է արձանագրի իրավախախտումը: 

Այդ խախտումները միայն վարորդները չպետք է արձանագրեն: Ցանկացած քաղաքացի իրավունք կունենա դա անել»,-ասում է Քեյանը:

Նախագծի ընդունման ժամանակ կարծիք էր հնչում նաև, որ նման տեսանկարահանումներ կատարելը անձնական կյանքի գաղտնիության խախտում է: 

Ի դեպ, նման տեսակետ շրջանառվում էր նաև արագաչափ սարքերի և տեսախցիկների գործարկման ժամանակ, երբ մտավախություն կար, որ տուգանքի մասին ծանուցումը ստանալուց հետո, օրինակ՝ վարորդի կինը կամ ամուսինը կարող էին պարզել, որ մեքենայում երրորդ անձ է եղել, ինչն ընդհուպ ընտանեկան խնդիրների պատճառ կդառնար: Արդյո՞ք այս նախագծով վարորդների անձնական կյանքի գաղտնիությունը կերաշխավորվի: 

«Այս օրինագծով քաղաքացիներն իրականացնում են իրավախախտման հատկանիշների արձանագրում: Իրավաբաններն ավելի հստակ կարող են պատասխանել հարցին, թե այս դեպքում սա կարո՞ղ է դիտվել որպես անձնական կյանքի իրավունքի խախտում, թե ոչ: Մեկ բան ակնհայտ է: 

Քաղաքացին ոչ թե հրապարակային է ներկայացնում իրավախախտման վերաբերյալ տեսանյութը, այլ համակարգի միջոցով այդ տեսանյութն ուղարկում է ճանապարհային ոստիկանությանը, որն էլ այն ուսումնասիրում է, վերամշակում և արդյունքում վարչական ակտ ուղարկում իրավախախտում կատարած անձին: 

Այդ իրավախախտումը որևէ կերպ չի հրապարակվելու, քանի որ նման իրավունք ճանապարհային ոստիկանությունը չունի՝ տվյալ դեպքում անձնական տվյալների պաշտպանության մասին օրենքի համաձայն»,-եզրափակում է մեր զրուցակիցը:

ԼՈՒՍԻՆԵ ԱՌԱՔԵԼՅԱՆ