Փոքր և մի­ջին ձեռ­նար­կու­թյուն­նե­րի հա­մար տե­ղա­կան տուր­քի ար­տո­նու­թյուն­ներ կսահ­ման­վեն. քա­ղա­քա­պե­տա­րա­նը նա­խագ­ծեր է ներ­կա­յաց­րել

Իրավական ակտերի նախագծերի հրապարակման միասնական կայքում Երևանի քաղաղաքապետարանը ներկայացրել է մի քանի նախագիծ, որոնք վերաբերում են 2020 թվականի տեղական տուրքերի և վճարի գծով արտոնություններ սահմանելուն։ 

Բացի դա, քաղաքապետարանը ներկայացրել է նաև «Երևանի 2020 թվականի բյուջեի մասին» մայրաքաղաքի ավագանու որոշման նախագիծը։ 

«Փաստը» որոշեց առանձնացնել Երևանի ավագանու որոշման նախագծերը, որոնք առնչվում են 2020 թվականի տեղական տուրքերի և վճարի գծով արտոնություններ սահմանելուն։ 

Քաղաքապետարանի ներկայացրած նախագծերից մեկի հիմնավորման մեջ նշվում է, որ Երևանում գործող փոքր և միջին ձեռնարկությունների ֆինանսական բեռը թեթևացնելու նպատակով անհրաժեշտություն է առաջացնել սահմանել տեղական տուրքի արտոնություններ: 

Նախագծի համաձայն՝ ավագանին սահմանում է, որ Երևանի վարչական տարածքում գործունեություն իրականացնող տնտեսվարող սուբյեկտների համար, որոնց 2019 թվականի հարկային տարվա ընթացքում գործունեության բոլոր տեսակների մասով իրացման շրջանառությունը չի գերազանցել 115 միլիոն դրամը, 2020 թվականի համար սահմանված տեղական տուրքի դրույքաչափերի նկատմամբ կիրառվում են դրույքաչափի նվազեցման արտոնություններ, մասնավորապես՝ դրանք սահմանելով Երևանի վարչական տարածքում հեղուկ վառելիքի, սեղմված բնական կամ հեղուկացված նավթային գազերի վաճառքի, առևտրի օբյեկտների, հանրային սննդի և զվարճանքի օբյեկտների կեսգիշերից հետո աշխատելու թույլտվությունների համար։ 

Ընդ որում՝ նախատեսված արտոնությունները կիրառվում են նաև այն տնտեսվարողների համար, որոնք ՀՀ արդարադատության նախարարության աշխատակազմի իրավաբանական անձանց պետական ռեգիստրի գործակալությունում հաշվառվել կամ գրանցվել են 2020 թվականի հունվարի 1-ից: 

Նախագծերից հաջորդով տեղական վճարի արտոնություններ են տրվելու Երևանի քաղաքապետարանի ենթակայության ներքո գտնվող մշակութային և կրթական կազմակերպություններում սովորողներին։ 

Օրինակ՝ նախագծում նշվում է, որ վերջին տարիներին որոշ նվագարանների (ազգային, լարային, փողային) ուսուցման հանդեպ հետաքրքրությունը նվազել է: 

Պետության իրականացրած երաժշտական և արվեստի դպրոցներում ազգային և լարային նվագարանների ուսուցման վարձավճարների փոխհատուցման ծրագրի շնորհիվ այդ նվագարանների ուսուցումը որոշակիորեն կանոնակարգվել է, սակայն խնդիրն ամբողջապես լուծված չէ։ 

Ուսուցման համար նվագարանների ընտրության հարցում անհրաժեշտ է իրականացնել այնպիսի քաղաքականություն, որը թույլ կտա խթանել սիմֆոնիկ նվագարաններում և համույթներում պահանջված, սակայն ոչ բավարար չափով դասավանդվող գործիքների ուսուցումը: 

Այդ նպատակով Երևանի քաղաքապետարանի ներկայացրած նախագծով առաջարկվում է 2020 թվականի համար մինչև 800 երեխայի հաշվարկով սահմանել ուսման վճարների նվազեցման արտոնություններ՝ այն սահմանելով 4000 դրամ:

 Նախատեսվում են նաև արտոնություններ և վճարների նվազեցումներ Երևանի ենթակայության արտադպրոցական դաստիարակության հաստատությունների (երաժշտական, նկարչական և արվեստի դպրոցներ և այլն) ծառայություններից օգտվելիս, Երևանի ենթակայության թանգարաններ այցելելիս։ 

Ավտոկայանատեղիներում կայանելու համար կշարունակեն տուրք չվճարել հաշմանդամություն ունեցող անձինք, ինչպես նաև էլեկտրամոբիլների սեփականատերերը կամ դրանց այլ օրինական տիրապետողները։ 

Կշարունակեն արտոնություններ գործել Երևանի ենթակայության մանկապարտեզներ հաճախող այն երեխաների դեպքում, որոնք համապատասխանում են մի շարք պայմանների.

1. երեխայի օրինական ներկայացուցիչներից մեկը մշտապես կամ փաստացի հաշվառված է Երևան քաղաքում,

2. երեխայի ծնողը ազատամարտիկ է և (կամ) զոհված ազատամարտիկի ընտանիքի անդամ է,

3. երեխայի օրինական ներկայացուցիչներից մեկը Հայաստանի Հանրապետության զինված ուժերում պարտադիր ժամկետային, պայմանագրային և այլ զորքերում պայմանագրային զինվորական ծառայություն են իրականացնում Երևան քաղաքում,

4. զոհված զինծառայողի երեխա է,

5. երկկողմանի ծնողազուրկ երեխա է,

6. Սիրիայից Հայաստան տեղափոխված հայ ընտանիքի երեխա է։

Նախագծերում արտոնությունների և այս կամ այն ծառայությունների վճարները չեղարկելու առաջարկներն այսքանով չեն սահմանափակվում։ Ի դեպ, «2020 թվականի տեղական տուրքերի և վճարների գծով արտոնություններ սահմանելու մասին» Երևան քաղաքի ավագանու որոշման նախագծի վերաբերյալ կազմակերպվելու է հանրային քննարկում, որը տեղի կունենա քաղաքապետարանում նոյեմբերի 27-ին։ 

Բաց լսումներին կարող են մասնակցել շահագրգիռ բոլոր կողմերը։

ԼՈՒՍԻՆԵ ԱՌԱՔԵԼՅԱՆ