Սննդամթերքի որոշ տեսակներ կրկին թանկացել են, այդ թվում՝ առաջին անհրաժեշտության. «Փաստ»

«Փաստ» օրաթերթը գրում է.

Դիտարկելով վիճակագրական կոմիտեի տվյալները, նկատում ենք, որ 2019թ. նոյեմբերին նախորդ տարվա նույն ժամանակահատվածի համեմատ սննդամթերքի շուկայում 0,5 տոկոս գնաճ է արձանագրվել։ 

Ընդհանուր առմամբ, այս շուկայում գնաճի ամենամեծ մասնաբաժինը բանջարեղենինն է, որտեղ գրանցվել է 10 տոկոս, իսկ որոշ տեսակների պարագայում՝ ընդհուպ 18 տոկոս գնաճ։ 

Ինչ վերաբերում է մրգերին, ապա այս շուկայում նախորդ տարվա նույն ժամանակահատվածի համեմատ 4,3 տոկոս գնաճ կա։ Շաքարավազի շուկայում ընթացիկ տարվա նախորդ ամիսների գնանկման միտումը պահպանվել է։ Ձվի գինը ևս նվազել է, իսկ կարագն էժանացել է 5,1 տոկոսով։

Առանձին դիտարկենք սննդամթերքների այլ տեսակների գնային փոփոխությունները։ Հացը, ինչպես մյուս ամիսներին, նոյեմբերին ևս թանկացել է։ Այս անգամ գնաճը կազմել է 3,9 տոկոս։ Ալ յուրի և ձավարեղենի առումով 5 տոկոս գնաճ է գրանցվել, թեպետ հոկտեմբերին նախորդ տարվա հոկտեմբերի համեմատ այդ ցուցանիշն ավելի ցածր էր՝ 4,5 տոկոս։ 

Բրինձը, ինչպես հոկտեմբերին, նոյեմբերին ևս թանկացել է։ Այս տարվա նոյեմբերին նախորդ տարվա նոյեմբերի համեմատ բրինձի գինը 3 տոկոսով ավելացել է։ Մակարոնեղենի շուկայում ավելի բարձր գնաճ է արձանագրվել՝ 7,5 տոկոս՝ նախորդ տարվա նույն ժամանակահատվածի համեմատ։ Նույնը չենք կարող ասել մսի շուկայի պարագայում, որտեղ հիմնականում գերակշռել է գների նվազման միտումը։ 

Ընդհանուր առմամբ, այս շուկայում 2,7 տոկոսով գների նվազում է արձանագրվել։ Ապխտած մսամթերքը թանկացել է 0,9 տոկոսով, կիսաֆաբրիկատները՝ 0,6 տոկոսով։ 

Ձկան շուկայում 5,7 տոկոս գնանկում կա, բայց սառեցված ձկնամթերքի շուկայում նոյեմբերին նախորդ տարվա նույն ժամանակահատվածի համեմատ 2,1 տոկոս գնաճ է արձանագրվել։ Ծովամթերքի շուկայում գնաճ կա, այս անգամ՝ 16 տոկոս։ 

Ի դեպ, 2019թ. նախորդ ամիսներին այդ ցուցանիշն ավելի բարձր է եղել։ Ապխտած, չորացրած ձկնամթերքի ու ծովամթերքի շուկայում հակառակ պատկերն է։ Այստեղ 0,5 տոկոս գների նվազում կա։ Կաթնամթերքի շուկայում գնանկման միտումները հիմնականում պահպանվել են։ Պանիրը նոյեմբերին 3,5 տոկոսով էժանացել է, անարատ կաթը՝ 0,9 տոկոսով, իսկ պահածոյացված կաթը 0,5 տոկոսով թանկացել է։ 

Յոգուրտի և մածունի գները 1,1 տոկոսով են ավելացել։ Այդուհանդերձ, ալկոհոլային խմիչքների շուկայում կրկին գնաճ կա, որը կազմել է 2,4 տոկոս։ Ամենաշատը թանկացումը գրանցվել է գինու շուկայում՝ կազմելով 9,2 տոկոս։ Ծխախոտի գները կրկին 7,6 տոկոսով ավելացել են։