Առա­ջարկ­վում է նվի­րատ­վու­թյան ներ­կա­յաց­նել 56 բնա­կե­լի տա­րածք

Պետական գույքի կառավարման կոմիտեն իրավական ակտերի նախագծերի հրապարակման միասնական կայքում հանրային քննարկման է ներկայացրել մի նախագիծ, որի ընդունման արդյունքում ՀՀ տեղաբնակ քաղաքացիներին պետությունը կնվիրի բնակելի տարածքներ: Ինչի՞ մասին է խոսքը։ 

Պետգույքի կոմիտեն առաջարկում է լրացումներ կատարել ՀՀ կառավարության 2011 թվականի մարտի 24-ի թիվ 305-Ն որոշման մեջ։ 

Նախագծի հիմնավորման մեջ նշվում է, որ տարածքային կառավարման և ենթակառուցվածքների նախարարության պետական գույքի կառավարման կոմիտեի կողմից դեռևս 2018 թվականի առաջին եռամսյակում նախապատրաստված «ՀՀ կառավարության 2011 թվականի մարտի 24-ի թիվ 305-Ն որոշման մեջ փոփոխություններ և լրացումներ կատարելու մասին» կառավարության որոշման նախագծի` նվիրատվության ենթակա բնակելի տարածքների ցանկն ի սկզբանե բաղկացած էր 214 բնակելի տարածքներից:

 Կադաստրի կոմիտեի կողմից տրված տեղեկատվության արդյունքների հիման վրա վերոնշյալ նախագծի N3 հավելվածում` նվիրատվությամբ տրամադրվող բնակելի տարածքների ցանկում, ընդգրկվեց 106 բնակելի տարածք, որոնց վերաբերյալ 2019 թվականի հուլիսի 25-ին ընդունվել է կառավարության N971-Ն որոշումը, 8 բնակելի տարածքի բնակիչներին մերժում ուղարկվեց, իսկ 100 բնակելի տարածքի նվիրատվության գործընթացին ժամանակավորապես ընթացք չտրվեց` հաշվի առնելով, որ կադաստրի կոմիտեի կողմից հնարավոր չէր եղել իրականացնել բնակելի տարածքների բնակիչների նույնականացման աշխատանքները։

 Մասնավորապես, հնարավոր չէր եղել հստակ տեղեկատվություն տալ նշված բնակելի տարածքների բնակիչների անունով ՀՀ-ում անշարժ գույքերի նկատմամբ գրանցված սեփականության իրավունքի վերաբերյալ, ինչը կառավարության 2011 թվականի մարտի 24-ի N305-Ն որոշման պահանջներից է: 

Վարչապետի՝ 2019 թվականի փետրվարի 14-ի N02/16.3/5305-2019 հանձնարարականով հանձնարարվել էր ստեղծել աշխատանքային խումբ՝ հնարավորինս կարճ ժամկետում իրականացնելու 100 բնակելի տարածքների բնակիչների նույնականացման գործընթացը: 

Նշվում է, որ համապատասխան աշխատանքների կատարման արդյունքում կադաստրի կոմիտեն 2019թ.-ի հոկտեմբերի 25-ի N ՍՊ//8151-2019 գրությամբ պետգույքի կառավարման կոմիտե է ներկայացրել նշված 100 բնակելի տարածքից 56 բնակելի տարածքի բնակիչների նույնականացման աշխատանքների արդյունքները: 

Կոմիտեն նախապատրաստել է «ՀՀ կառավարության 2011 թվականի մարտի 24-ի թիվ 305-Ն որոշման մեջ լրացումներ կատարելու մասին» կառավարության որոշման նոր նախագիծ, որով նախատեսվում է ՀՀ քաղաքացիներին նվիրատվությամբ տրամադրել 56 բնակելի տարածք: 

Նախագծում ընդգրկվել են կոմիտեի տնօրինության տակ գտնվող Երևանի Մոլդովական փողոցի 29/1 հասցեի, Վարդաշեն 6-րդ փողոց 66/1 հասցեի, Աճառյան 20/3 հասցեի, Կոտայքի մարզի Ֆանտան գյուղի ուսուցչի տան, Սյունիքի մարզի Գորիս քաղաքի Կոմերիտմիության 2/1 հասցեի, Վայոց ձորի մարզի Աղավնաձոր գյուղի 3-րդ փողոց 33/1 հասցեի, Լոռու մարզի Սվերդլով գյուղի հասցեի, Արարատի մարզի Արարատ քաղաքի Աբովյան 12 հասցեի և Դարբնիկ համայնքի, Արագածոտնի մարզի Աշտարակ քաղաքի Գիտավան ՌՖԷԻ-ի 1-ին և 11-րդ շենքի հանրակացարանների բնակիչները՝ թվով 30 բնակելի տարածքի բնակիչներ: 

Նախագծում ընդգրկվել են նաև ՀՀ արտակարգ իրավիճակների նախարարության տնօրինությանը հանձնված Երևանի Արցախի 61/3 հասցեի, Սևանի 124 հասցեի, Աբովյան քաղաքի Հատիսի 4 հասցեի, Իսակովի 9 հասցեի և Արթիկ քաղաքի Շահումյան 5/20 հասցեի հանրակացարանային մասնաշենքերի բնակելի տարածքները՝ 13 բնակելի տարածք, կրթության, գիտության, մշակույթի և սպորտի նախարարության տնօրինությանը հանձնված Լոռու մարզի Ստեփանավան քաղաքի Երիտասարդական 51/2 հասցեի բնակելի տարածքները՝ 4 բնակելի տարածք, Վայոց ձորի մարզպետարանի ենթակայության Վայոց ձորի մարզի Շատին գյուղի 15րդ փողոցի 3/3 հասցեի՝ 1 բնակելի տարածք, և Արագածոտնի մարզպետարանի տնօրինության տակ գտնվող Բյուրական, Շամիրամ, Աշնակ, Վարդենուտ և Կարմրաշեն համայնքների ուսուցչի տների բնակելի տարածքները՝ 8 բնակելի տարածք: 

Նախագծում նշվում է, որ պետգույքի կառավարման կոմիտեն, ուսումնասիրելով ներկայացված փաստաթղթերը, դրանք ներկայացրել է ոստիկանության անձնագրային և վիզաների վարչություն` նշված բնակարաններում հաշվառված անձանց վերաբերյալ տեղեկատվություն ստանալու նպատակով: 

Բնակելի տարածքների բնակիչների վերաբերյալ համապատասխան տեղեկատվությունը ստուգվել է նաև կադաստրի կոմիտեի հետ: Դրանից հետո նախագիծը, ՀՀ օրենսդրությամբ սահմանված կարգով, դրվել է շրջանառության մեջ: Ընդհանուր հաշվով՝ նախագծով առաջարկվում է նվիրատվության ներկայացնել 56 բնակելի տարածք (51 ընտանիք, 133 անձ):

ԼՈՒՍԻՆԵ ԱՌԱՔԵԼՅԱՆ