Ֆլոմաստեր՝ եգիպտական պղնձե «մատիտից» մինչև տասնյակ գուներանգներ

Ֆլոմաստերը «մատիտի» ծայրից հոսող ներկերի օգնությամբ գրելու և նկարելու գործիք է։ 

Ինչպես և շատ այլ իրեր, ֆլոմաստերի նախատիպը ևս հայտնվել է Հին Եգիպտոսում: Թութանհամոնի գերեզմանի պեղումների ժամանակ հնագետները հայտնաբերել են պղնձից պատրաստված մատիտ, որի ներսում եղել է թանաքով ներծծված եղեգ: 

Այդ սարքի կառուցվածքը թույլ է տվել, որ թանաքը աստիճանաբար հոսի, այլ ոչ թե անմիջապես: Հին եգիպտացիների այդ գործիքն էլ համարվում է ներկայիս գունավոր նշիչների նախահայրը: 

Այնուամենայնիվ, երկար տարիներ այդ գաղափարը չի օգտագործվել, և միայն 1942 թվականին Տոկիոյի գրենական պիտույքների ընկերության ճապոնացի աշխատակից Յուկիո Հորին է ներկայացրել իր գյուտը, որը շատ նման էր հին եգիպտացիների պղնձե մատիտին, սակայն նաև ուներ հատուկ ծայրակալ, որն ապահովում էր գունանյութի համասեռ և ճշգրիտ հոսելը: 

Իսկ Եվրոպայում գերմանացիներն են առաջինը արտադրել ֆլոմաստերներ 1960 թվականին:

 «Edding» ընկերությունը, որը հայտնի էր իր ներկերով, թանաքներով և մատիտներով, թողարկել է «Edding N1» նմուշը: Դրա ծայրակալը պատրաստված էր մամլած  վուշից: Ընկերությունը ներկայացրել է տարբեր գույների ֆլոմաստերներ: 

Նույն թվականի մարտին «Pentel» ընկերությունն է սկսել ֆլոմաստերներ արտադրել Ճապոնիայում: Շուտով թաղիքե ծայրակալներով ֆլոմաստերներ է ներկայացրել «Tokyo Stationery Company»-ն: Փորձենք հասկանալ «ֆլոմաստեր» բառի ծագումնաբանությունը: Այս գրենական պիտույքի նման անունը տարածված է «Flowmaster» ապրանքանիշի շնորհիվ:

Հենց այդ անվան տակ են ժամանակին լայնորեն օգտագործվել թանաքները գրեթե բոլոր գունավոր նշիչներում: Իսկ ընդհանրապես, անգլերեն «flow» բառը նշանակում է «հոսել, թափվել»: Ֆլոմաստերների ժողովրդականության գագաթնակետը 20-րդ դարի 80-ականներն են: Ներկայումս արտադրողները առաջարկում են ֆլոմաստերների հավաքածուներ տարբեր փաթեթավորմամբ` սկսած ստվարաթղթից մինչև մետաղական: 

Բացի դա, առաջարկում են գույների հսկայական ընտրություն: Չինաստանում նույնիսկ 72 երանգային հավաքածուներ կան: Պարզագույն ֆլոմաստերը իրենից ներկայացնում է պլաստմասե պատյան և մամլած թաղիքե ծայրակալ, իսկ պատյանի ներսում ծակոտկեն միջուկի ձողն է, որը ներծծված է համապատասխան գույնի ներկով: 

Օգտագործմանը զուգընթաց միջուկի ներկի քանակը նվազում է, բայց թաղիքե ծայրակալը թույլ է տալիս օգտագործել բացարձակապես ամբողջ ներկը առանց մնացորդի: 

Ֆլոմաստերների օգտագործման ոլորտները ներկայումս շատ են՝ սկսած տեքստիլ արտադրությունից վերջացրած շինարարությամբ:

 Այնուամենայնիվ, դրանց ամենաշատ օգտագործողները եղել և մնում են երեխաները. հազիվ թե գտնվի մի երեխա, որը կյանքում չի ունեցել իր ֆլոմաստերների հավաքածուն՝ գոնե 4 կամ 6 գույնով:

Նյութը հրապարակման պատրաստեց Past.am-ը